პრემიერი: ტყვიით მოწამვლა ნამდვილად არის საზოგადოებრივი ჯანდაცვის სისტემების ყველაზე აქტუალური გამოწვევა მთელი მსოფლიოს მასშტაბით. დიდი მადლობა ჩვენი მოწვევისთვის და საქართველოს წარმატების შესახებ საუბრის შესაძლებლობისთვის

საქართველოს პრემიერ-მინისტრმა ირაკლი ღარიბაშვილმა, USAID-ის ადმინისტრატორის სამანტა პაუერის მიწვევით, მონაწილეობა მიიღო პანელურ დისკუსიაში, სახელწოდებით „ტყვიის შემცველობისგან თავისუფალი ატმოსფერული ჰაერისკენ“. პანელური დისკუსია დავოსის ეკონომიკური ფორუმის ფარგლებში USAID-ის ორგანიზებით გაიმართა.

საქართველოს პრემიერ-მინისტრთან ერთად დისკუსიაში მონაწილეობდნენ USAID-ის ადმინისტრატორი სამანტა პაუერი, McKinsey Global Health Institute-ის დირექტორი ლუსი პერეზი და ტანზანიის სახელმწიფო მინისტრი ეკონომიკისა და ინვესტიციების საკითხებში მუდრიკ სორაღა.

პრემიერ-მინისტრმა განმარტა რა ნაბიჯები გადაიდგა საქართველოში ამ პრობლემასთან ბრძოლის მიზნით.

„უპირველეს ყოვლისა, დიდი მადლობა მინდა მოვახსენო ამერიკის შეერთებული შტატების საერთაშორისო განვითარების სააგენტოს დირექტორს, ქალბატონ პაუერს. ძვირფასო მეგობრებო და კოლეგებო, დიდი მადლობა ჩვენი მოწვევისთვის და საქართველოს წარმატების შესახებ საუბრის შესაძლებლობისთვის. მეც მინდა აღვნიშნო, რომ ტყვიით მოწამვლა ნამდვილად არის საზოგადოებრივი ჯანდაცვის სისტემების ყველაზე აქტუალური გამოწვევა მთელი მსოფლიოს მასშტაბით. მნიშვნელოვანია აღინიშნოს, რომ ეს გამოწვევა სცილდება საქართველოს ან ნებისმიერ სხვა ქვეყნის საზღვრებს. ეს არის გლობალური პრობლემა.

ბოლოდროინდელი კვლევებით ცხადი ხდება, რომ ჩვენს პლანეტაზე სამიდან ერთი ბავშვი ტყვიით მოწამვლის მსხვერპლია სავარაუდოდ, რადგან ისეთ გამოწვევასთან უწევთ კავშირი, როგორიცაა საღებავი, ელემენტებისა და სამუხტი საშუალებების რეციკლირების ცენტრები, საკვები, კოსმეტიკური საშუალებები და ზოგიერთ შემთხვევაში სუნელი, როგორც თქვენ აღნიშნეთ. ასევე მნიშვნელოვანია გავაცნობიეროთ, რომ ტყვიით მოწამვლით არის გამოწვეული გლობალურად გარდაცვალების წლიური მაჩვენებლის 1,5%. ის მწვანე რისკებს ქმნის, განსაკუთრებით ბავშვებისა და ორსული ქალებისთვის დაბალ და საშუალოშემოსავლიან ქვეყნებში.

რაც შეეხება საქართველოს წარმატებას, უპირველეს ყოვლისა აღსანიშნავია 2018 წელს ამერიკის შეერთებული შტატების საერთაშორისო განვითარების სააგენტოს ხელშეწყობით, გაეროს ბავშვთა სააგენტოს ფონდის მიერ ჩატარებული მრავალკლასტერული და მრავალინდიკატორიანი კვლევა, რომელმაც გამოავლინა, რომ 2-დან 7 წლის ასაკამდე ბავშვების 51%-ს დაშვებულ ზღვრულოდენობაზე მაღალ ნიშნულზე ჰქონდათ სისხლში ტყვიის შემცველობა. ამ მონაცემებს მოჰყვა მყისიერი რეაგირება მთავრობის მხრიდან. ჩვენ სწრაფად გადავდგით შესაბამისი ნაბიჯები რისკების გასანეიტრალებლად და ქვეყანაში ტყვიით მოწამვლის შემთხვევების პრევენციისთვის.

2019 წელს ინიცირებული ეროვნული რეაგირების პაკეტი, გაეროს ბავშვთა ფონდისა და ამერიკის შეერთებული შტატების საერთაშორისო განვითარების სააგენტოს ხელშეწყობით, მოიცავდა ფართომასშტაბიან კამპანიას საზოგადოების შემეცნების გასაზრდელად, ბავშვებისა და ორსულების მონიტორინგის წარმოებას, ქიმიური რისკების შეფასების ლაბორატორიის შექმნასა და ტყვიის კონტროლის სისტემის შემუშავებას სისხლში მისი შემცველობის მონიტორინგისთვის და შეხების წერტილები გამოსავლენად. იმავე პროგრამის ფარგლებში დავიწყეთ ატმოსფერული გარემოპირობების შეფასება. ამ ინიციატივების შედეგად, მაჩვენებლები სწრაფად გაუმჯობესდა, რამაც რეაგირების პროგრამის ეფექტიანობა დაადასტურა“, - აღნიშნა პრემიერმა.

დისკუსიაზე USAID-ის ადმინისტრატორმა სამანტა პაუერმა სისხლში ტყვიის შემცველობის დონის შემცირების კუთხით საქართველოს წარმატებულ მაგალითზე ისაუბრა და ამ მიმართულებით გაწეული ძალისხმევისთვის პრემიერ-მინისტრ ირაკლი ღარიბაშვილს მადლობა გადაუხადა.