ნაციონალური მოძრაობა: კალაძის ფიცი მწამს, ბოლო მაკვირვებს

საკრებულოს წევრი „ნაციონალური მოძრაობიდან“ ლევან ხაბეიშვილი აცხადებს, რომ თბილისის მთავრობის ახალ შემადგენლობაში დავით ნარმანიას დროინდელი კადრების შენარჩუნება ცინიზმი და მოსახლეობის ინტერესების იგნორირებაა.

„მერიაში 80% ფაქტობრივად ის ხალხია წარმოდგენილი, ვინც სამწელიწადნახევრის განმავლობაში დავით ნარმანიას დროს მერიაში მუშაობდა. ყველაზე მეტი პრობლემა იყო სოციალური მიმართულებები და ამ კუთხით საქალაქო სამსახურის უფროსმა თანამდებობა შეინარჩუნა, ასევე ყველაზე მეტი პრობლემა იყო საგზაო და ინფრასტრუქტურული კუთხით და კეთილმოწყობის სამსახურის უფროსი დარჩა თანამდებობაზე. ტრანსპორტის მიმართულებით იყო სერიოზული პრობლემა და ამ სამსახურის უფროსიც დარჩა თანამდებობაზე. შესაბამისად, ამ პოლიტიკურ გუნდზე, რომელიც ნარმანიას პირდაპირი მემკვიდრეა, პასუხისმგებლობას ვერ ავიღებთ. ის, რომ დღეს საკრებულოში კალაძე არ მოდის, კიდევ ერთი უხერხული ამბავია. სავარაუდოდ, რცხვენია მთავრობის წარდგენა. როგორ შეიძლება შეფასდეს ახლადარჩეული მერი, რომელიც არ მოდის დასაწყისშივე. კალაძე ამბობს, რომ იქნება კონსტრუქციული, ითანამშრომლებს ოპოზიციასთან, მაგრამ კალაძის ფიცი მწამს, ბოლო მაკვირვებს. ოპოზიციასთან და თავისივე უმრავლესობასთანაც კი არ მოდის და თბილისელებმა თავად განსაზღვრონ, არის თუ არა ეს ადამიანი თანამშრომლობისთვის მზად", - განაცხადა ლევან ხაბეიშვილმა. 

დღეს თბილისის საკრებულომ დედაქალაქის მთავრობის 28 წევრი უნდა დაამტკიცოს, მათ შორის გამგებლები, კახა კალაძის 4 მოადგილე და მერიის საქალაქო სამსახურების უფროსები.

თბილისის საკრებულოში ახალი მთავრობის წევრთა დასამტკიცებლად კენჭისყრა 17:00 საათზე იგეგმება. 16:00 საათიდან კი კანდიდატებს დედაქალაქის საკრებულოს გაერთიანებული კომიტეტების სხდომაზე მოუსმენენ.