მამუკა მდინარაძე: „ხალხის ძალის“ წარმომადგენლებმა გადაწყვიტეს, რომ არ შემოსულიყვნენ ფრაქცია „ქართულ ოცნებაში“. პირადად ჩემთვის ერთ-ერთი ყველაზე გასაზიარებელი არგუმენტი იყო ის, რომ რეალურად ცალკე პარტიას წარმოადგენენ

„ხალხის ძალის“ ყველა წარმომადგენელმა გადაწყვიტა, რომ პარლამენტში არ შემოსულიყვნენ ფრაქცია „ქართულ ოცნებაში“. მათ ბევრი არგუმენტი ჰქონდათ, - განუცხადა ჟურნალისტებს საპარლამენტო უმრავლესობის ლიდერმა, ფრაქცია „ქართული ოცნების“ თავმჯდომარემ და პარტიის აღმასრულებელმა მდივანმა მამუკა მდინარაძემ.

მისივე თქმით, პირადად მისთვის ერთ-ერთი ყველაზე გასაზიარებელი არგუმენტი იყო ის, რომ რეალურად ცალკე პარტიას წარმოადგენენ.

„ჩვენ ამ დღეებში, ერთადერთი შეკრება რომ იყო უმრავლესობის სტილის, მაგრამ არა უმრავლესობის, იმ დღესაც გვქონდა ლაპარაკი ამასთან დაკავშირებით, ბევრი ვისაუბრეთ. „ხალხის ძალის“ ყველა წარმომადგენელმა გადაწყვიტა, რომ პარლამენტში არ შემოსულიყვნენ ფრაქცია „ქართულ ოცნებაში“. მათ ბევრი არგუმენტი ჰქონდათ. პირადად ჩემთვის ერთ-ერთი ყველაზე გასაზიარებელი არგუმენტი, რის გამოც ძალიან დიდი მიმღებლობა მქონდა ამის იყო, რომ ისინი წარმოადგენენ რეალურად ცალკე პარტიას. კი ბატონო, „ქართული ოცნების“ სიით გავიდნენ, ვინაიდან კანონიც ამას გვავალდებულებდა, სხვაგვარი შესაძლებლობაც არ იყო, მაგრამ ისინი არიან ცალკე, სხვა პარტიის წარმომადგენლები", - აღნიშნა მამუკა მდინარაძემ.

მისივე თქმით, ის უდიდეს პატივს სცემს მათ გადაწყვეტილებას.

„დანარჩენი მათი საქმეა. ისინი მხარს უჭერენ მთავრობის იმ შემადგენლობას, რომელიც პრაქტიკულად უკვე თქვენთვის ცნობილია. შესაბამისად, ისინი წარმოადგენენ საქართველოს პარლამენტის უმრავლესობას.

სხვათა შორის, ერთი სიახლე გვაქვს, არ ვიცი უნდა ვასწრებდე თუ არა მათ ამის გახმოვანებაში, ისინი იმდენად ცდილობენ ცალკე იყვნენ, როგორც ცალკე პარტიის წარმომადგენლები, რომ როგორც წინა პარლამენტში ისინი ითხოვენ ჩვენგან ცვლილებებს პოლიტიკური ჯგუფის შესაქმნელად. ამაზე ვიმსჯელებთ და გადაწყვეტილებას მივიღებთ“, - აღნიშნა მამუკა მდინარაძემ.