მამუკა მდინარაძე ირაკლი ზარქუასა და ვიქტორ სანიკიძეზე: მიმდინარეობდა ინტენსიური საგამოძიებო მოქმედებები. იყვნენ აბუ-დაბიში პოლიციის განყოფილებაში, შემდეგ სასტუმროში, დასრულდა სამართალწარმოება და დატოვეს აბუ-დაბი, არიან თბილისში

ორივე თბილისშია. პატიმრობაში არ ყოფილან ისინი. ორი დღის განმავლობაში მიმდინარეობდა ინტენსიური საგამოძიებო მოქმედებები. იყვნენ აბუ-დაბიში პოლიციის განყოფილებაში, შემდეგ სასტუმროში, შემდეგ დასრულდა სამართალწარმოება და დატოვეს აბუ-დაბი და არიან თბილისში ორივე, - განაცხადა ქართული ოცნების“ აღმასრულებელმა მდივანმა, საპარლამენტო უმრავლესობის ლიდერმა, ფრაქცია „ქართული ოცნების“ თავმჯდომარემ მამუკა მდინარაძემ, ჟურნალისტის კითხვის საპასუხოდ, რომელიც დაინტერესდა იმყოფებიან თუ არა პატიმრობაში „ქართული ოცნების“ წევრები ირაკლი ზარქუა და ვიქტორ სანიკიძე.

მამუკა მდინარაძის თქმით, ისინი პატიმრობაში არ ყოფილან და მხოლოდ დღე-ნახევარი გაატარეს პოლიციის განყოფილებაში, როდესაც სამართალწარმოება მიმდინარეობდა. მისი განცხადებით, გამოძიების დასრულების შემდეგ ორივე დაპირისპირებულმა მხარემ ჯარიმები გადაიხადა.

მედიის წარმომადგენლის კითხვაზე, განიხილავს თუ არა ირაკლი ზარქუას და ვიქტორ სანიკიძის წინააღმდეგ პოლიტიკურ პასუხისმგებლობას „ქართული ოცნება“, მამუკა მდინარაძე აცხადებს, რომ - არა.

„ის ადამიანი სამი დღის განმავლობაში მძიმე შეურაცხყოფას აყენებდა ჩვენს კოლეგებს. მე თუ ვინმე თავს მესხმის აუცილებლად პასუხს გავცემ. მეორე, გამართლება შეიძლება ძალადობას არც ერთ შემთხვევაში არ ჰქონდეს, მაგრამ ერთი სამწუხარო კია, რომ პროვოკაციაზე რაღაც დოზით იმ ადამიანმა შეძლო და წამოაგო. როდესაც სამი დღე ითმენდნენ ეს ბიჭები, დეპუტატის იქით ხომ ადამიანია პირველ რიგში და რთულია ქართველმა კაცმა მოითმინო დედის გინება“, - განაცხადა მამუკა მდინარაძემ.

ცნობისთვის, აბუ-დაბიში „ქართული ოცნების“ დეპუტატებს, ირაკლი ზარქუასა და ვიქტორ სანიკიძეს და მოქალაქე ლაშა გაბიტაშვილს შორის ფიზიკური დაპირისპირება მოხდა. ინციდენტის ამსახველი ვიდეოკადრები სოციალურ ქსელში გავრცელდა.