ირაკლი კობახიძე: ჩვენ ვართ ორიენტირებულები, რომ 2030 წლისთვის ბევრად უფრო წინ ვიყოთ ეკონომიკური ზრდის თვალსაზრისით და ასეთ პირობებში აბსოლუტურად რეალური იქნება საუბრები ევროინტეგრაციაზე

ჩვენ ვფიქრობთ, რომ საშუალოვადიან პერსპექტივაში შევძლებთ იმ ტემპის შენარჩუნებას, რაც ამ 4 წლის განმავლობაში გვაქვს აღებული ეკონომიკური ზრდის თვალსაზრისით, ევროინტეგრაციის მთავარი წინაპირობაც არის ეკონომიკური ზრდა, - განაცხადა საქართველოს პრემიერ-მინისტრმა ირაკლი კობახიძემ გადაცემა „იმედი LIVE”-ში.

მისივე თქმით, ოპოზიციას აქვს ქვეყნის ჩამოქცევის ფუჭი იმედები.

„ჩვენ ოპონენტებს ფუჭი იმედები აქვთ, რომ ქვეყანა ჩამოიქცევა. პირდაპირ საუბრობენ ამაზე, მათ შორის, საინტერესო რაც არის, არიან „კოლექტიური ნაცმოძრაობის“ მხარდამჭერი ბიზნესმენები, რომლებიც სუბიექტურად არიან, რა თქმა უნდა, დაინტერესებულნი, რომ ეკონომიკურად განვითარდეს ქვეყანა, ვინაიდან ეს პირდაპირ აისახება მათ ბიზნესინტერესებზე და ეს ბიზნესმენებიც კი ამ ტყუილებს უერთდებიან, იმიტომ რომ როცა ხარ „ნაცი“, გაქვს ერთადერთი მიზანი, შეიძლება შენი საკუთარი ბიზნესი ჩამოიქცეს, ოღონდ მთავარია, „ნაცები“ დაბრუნდნენ ხელისუფლებაში. ასეთია „ნაცის“ მენტალიტეტი, ამას ვერაფერს უზამ. ეს არის მათი საქმე, ჩვენი საქმეა ზრუნვა ქვეყნის ეკონომიკურ განვითარებაზე. ამისთვის გვაქვს მათ შორის ვიზიტები, რომლებიც არის ყოველთვის კონკრეტული შედეგების მომტანი, როგორც ჩვენს სამეზობლოში, ასევე ზოგადად ფართო რეგიონში. გვინდა ცენტრალური აზიის, შუა აზიის მიმართულებით ასევე კიდევ უფრო მეტად ეკონომიკური თანამშრომლობის გაღრმავება. ჩინეთთან ეკონომიკური თანამშრომლობის გაღრმავება არის განსაკუთრებული პრიორიტეტი. ყველა მიმართულებით კეთდება ყველაფერი ეკონომიკური ზრდის მაღალი ტემპის შესანარჩუნებლად და ეს არის მთავარი ფაქტორი იმისათვის, რომ ჩვენ დავეწიოთ ევროკავშირის განვითარებულ ქვეყნებს ეკონომიკური თვალსაზრისით. როცა საუბარია ევროინტეგრაციაზე, ევროინტეგრაციის მთავარი წინაპირობაც არის ეკონომიკური ზრდა. თუ შენი ეკონომიკა დარჩება დაბალ დონეზე, არავინ განიხილავს ევროინტეგრაციას. თუ გაზრდი შენს ეკონომიკას, ამ შემთხვევაში, უკვე რეალური გახდება საუბრები ევროინტეგრაციასთან დაკავშირებით. ჩვენ ვართ ორიენტირებულები, რომ 2030 წლისთვის ბევრად უფრო წინ ვიყოთ, ვიდრე ვართ თუნდაც დღეს და ასეთ პირობებში აბსოლუტურად რეალური იქნება საუბრები ევროინტეგრაციაზე“, - განაცხადა პრემიერმა.