შესაძლოა ნდობის ჯგუფი სუსის უფროსსა და შს მინისტრს შეხვდეს

შესაძლოა პარლამენტის ნდობის ჯგუფი სუსის უფროსს ვახტანგ გომელაურსა და შინაგან საქმეთა მინისტრს გიორგი გახარიას შეხვდეს. იურიდიული კომიტეტის თავმჯდომარე ეკა ბესელია აცხადებს, რომ ნდობის ჯგუფის მანდატს დიდი პოლიტიკური და სამართლებრივი დატვირთვა აქვს.

კითხვაზე, თუ დადასტურდა, რომ ერთ-ერთი ლიკვიდირებული აჰმედ ჩატაევი იყო, იღებს თუ არა პოლიტიკურ პასუხისმგებლობას მმართველი პოლიტიკური გუნდი, ბესელია პასუხობს, რომ "მეტი მოთმინებაა საჭირო, ვიდრე ბრალდებების უფლებას მისცემს ვინმე თავს".

"უნდა დაველოდოთ გამოძიების შედეგებს. ეს არის ის წესი, რომელსაც ყველა ქვეყანაში, ყველა საზოგადოებაში იცავენ და მათ შორის ვიცავთ ჩვენც. პირველი შეხვედრა შეეხება ჯგუფის საქმიანობას და არ შეიძლება გვერდი ავუაროთ ისეთ ძალიან მნიშვნელოვან მოვლენას, რომელიც ბოლო პერიოდში მოხდა, სპეცოპერაციის საქმეს. თუმცა, ვიმსჯელებთ იმაზე, თუ რა ფორმატში მოხდება ამ თემის განხილვა ჯგუფსა და შესაბამისს უწყებებს შორის ინფორმაციის გაზიარება. ვეცდები მოგაწოდოთ ინფორმაცია, რასაც ვიღებთ, რათა კარგად დავინახოთ ვისი პასუხისმგებლობა შეიძლება დადგეს, თუკი გვარები რომლებიც სახელდება, დადასტურდება. ზედმეტი სიჩქარე მეტ ეჭვებს ბადებს იმ ადამიანების მიმართაც, ვინც ამ უსაფუძვლო ბრალდებით გამოდის",- განაცხადა ეკა ბესელიამ.

ბესელიას თქმით, სამწუხაროა რომ ჯგუფის სრულად ფორმირება ვერ მოხდა. თუმცა ეს არ უნდა გახდეს ამ ჯგუფის მუშაობის შეფერხების მიზეზი.

1 ნოემბერს პარლამენტის პლენარულ სხდომაზე, ერთწლიანი მუშაობის შემდეგ, ნდობის ჯგუფი საბოლოოდ შეიქმნა.

ნდობის ჯგუფში ხუთის ნაცვლად 4 წევრია: უმრავლესობის ლიდერი არჩილ თალაკვაძე, თავდაცვის კომიტეტის თავმჯდომარე ირაკლი სესიაშვილი, იურიდიულ საკითხთა კომიტეტის თავმჯდომარე ეკა ბესელია და საპარლამენტო უმცირესობის წევრი ირაკლი აბესაძე.

ნდობის ჯგუფის 4 წევრისგან დაკომპლექტება იმან განაპირობა, რომ ნაციონალური მოძრაობა და პატრიოტთა ალიანსი, ხუთი კაცისგან შემდგარ ნდობის ჯგუფში, დარჩენილ ერთი ადგილის კანდიდატურაზე, ვერ შეთანხმდნენ - მეხუთე კვოტის პრეტენდენტები სალომე სამადაშვილი და ირმა ინაშვილი იყვნენ.