ლაშა გეგეჭკორი: დადასტურებული ინფორმაციით, 6 აპრილს, ცხოველების მოყვარულთა გარკვეული ჯგუფი გურჯაანში, მიუსაფარ ცხოველთა პოპულაციის მართვის კახეთის რეგიონული ცენტრის დირექტორს საცხოვრებელ სახლთან პროვოკაციას უმზადებს

დადასტურებული ინფორმაციით, 6 აპრილს, ცხოველების მოყვარულთა გარკვეული ჯგუფი აპირებს გურჯაანში, საცხოვრებელ სახლთან პროვოკაცია მოუწყონ მიუსაფარ ცხოველთა პოპულაციის მართვის კახეთის რეგიონული ცენტრის დირექტორს, ბატონ თეიმურაზ ზავრაშვილს. ასევე, მიუსაფარ ცხოველთა პოპულაციის მართვის შიდა ქართლის რეგიონული ცენტრის უფროსს, - წერს სოციალურ ქსელში მიუსაფარ ცხოველთა პოპულაციის მართვის კახეთის, შიდა ქართლის, ქვემო ქართლის და სამცხე-ჯავახეთის რეგიონული ცენტრის კონცეპტუალური პროექტის თანაავტორი ლაშა გეგეჭკორი.

„დადასტურებული ინფორმაციით, მ/წ 6 აპრილს, ცხოველების მოყვარულთა გარკვეული ჯგუფი აპირებს გურჯაანში, საცხოვრებელ სახლთან პროვოკაცია მოუწყონ მიუსაფარ ცხოველთა პოპულაციის მართვის კახეთის რეგიონული ცენტრის დირექტორს, ბატონ თეიმურაზ ზავრაშვილს. ასევე, მაქვს ინფორმაცია, რომ კახეთის შემდეგ ასეთივე “აქცია” იგეგმება მიუსაფარ ცხოველთა პოპულაციის მართვის შიდა ქართლის რეგიონული ცენტრის უფროსის წინააღმდეგ.

ამ “აქციებს” არ აქვს შინაარსობრივი, თემასთან დაკავშირებული, ზოგადად ქვეყანაში ამ პრობლემის მოგვარების მიზანი და მთლიანად ემყარება ისევ ამ ჯგუფის მიერ გავრცელებულ ჭორებს, რომელთა დასამტკიცებლად მათ მიერ ვერ იქნა წარმოდგენილი ვერც ერთი დადასტურებული ფაქტი.

“აქციის” ორგანიზატორებს არ აინტერესებთ, თუ რამდენად არის გაზრდილი ამ ცენტრებში გახსნის დღიდან სტერილიზაცია-კასტრაციის ოპერაციები. არადა, სწორედ ეს არის პოპულაციის მართვის ერთადერთი ჰუმანური მეთოდი. ყოველწლიური ანტირაბიული (ცოფზე) აცრა, სტერილიზაცია-კასტრაციის ოპერაციები და ცხოველთა(ძაღლი/კატა) რეგისტრაცია არის პრობლემის მეთოდური გადაწყვეტის გზა, რომელსაც წარმატებულად ახორციელებენ ზემოთ მოყვანილი ცენტრები.

“აქციის” ორგანიზატორებს ამოძრავებთ სხვა მიზანი,რომელიც ჩემთვის ცნობილია და საჭიროების შემთხვევაში მზად ვარ გავაცნო სამართალდამცავ სტრუქტურებს. მოვუწოდებ შინაგან საქმეთა სამინისტროს აღკვეთილ იქნას მსგავსი პროვოკაციული ქმედება.

ლაშა გეგეჭკორის განცხადებას გამოეხმაურა არასამთავრობო ორგანიზაცია „ადამიანები ცხოველებისთვის“ დამფუძნებელი და დირექტორი მარინა ბერსენაძე-კაციტაძე. მისი თქმით, 6 აპრილს ცხოველების უფლებების დამცველები და მოყვარულები გურჯაანის რაიონში მშვიდობიან აქციას მართავენ.

„გიდასტურებთ, რომ 6 აპრილს ცხოველების უფლებების დამცველები და მოყვარულები ვმართავთ მშვიდობიან აქციას გურჯაანის რაიონში. აქციის მიზეზი გახდა არაერთი გადაცდომა, რაც გურჯაანის რაიონის ცხოველთა კასტრაციისა და სტერილიზაციის ცენტრში ხდება. ჩვენ გვსურს გამოვხატოთ ჩვენი მშვიდობიანი პროტესტი და მოვითხოვოთ არსებული დარღვევების დაუყოვნებლივი აღმოფხვრა. ბატონი ლაშა გეგეჭკორი, რომელმაც თავის ფეისბუკ გვერდზე გამოაქვეყნა ტექსტი, სადაც ის საუბრობს დაგეგმილ პროვოკაციაზე, ბატონი გეგეჭკორისთვის, როგორც ის აცხადებს, გამოხატვის მშვიდობიანი ფორმა და პროტესტი, რასაც ჩვენ ვგეგმავთ, არის პროვოკაცია. აღნიშნულ საკითხში ჩაერთნენ სამართალდამცავი სტრუქტურები, რათა ნათელი მოეფინოს ბატონი ლაშას ბრალდების მართებულობასა და წყაროს. ასევე, მინდა განვაცხადო, რომ მე ვცადე მასთან სატელეფონო კომუნიკაცია და ასევე მივწერე, თუმცა მან არ მიპასუხა, ხოლო ჩემი მოწოდება, აეღო ტექსტი, სადაც პირდაპირ ბრალდებას გვიყენებს, შეაფასა ზეწოლად და შანტაჟად. კიდევ ერთხელ მოვუწოდებ ბატონ ლაშას, თავი შეიკავოს უსაფუძვლო განცხადებებისგან, დაბრუნდეს კონსტიტუციურ ჩარჩოში და ხელს ნუ გვიშლის კონსტიტუციით მონიჭებული ქმედებების განხორციელებაში“, - ნათქვამია მარინა ბერსენაძე-კაციტაძის განცხადებაში.