მთავრობაში სტრუქტურული რეორგანიზაცია ბიუჯეტის პროექტში მხოლოდ ტექნიკურად აისახა

მთავრობაში დაგეგმილი სტრუქტურული ცვლილებები 2018 წლის ბიუჯეტის საბოლოო ვარიანტში ასახულია, თუმცა მხოლოდ ტექნიკურად და არა სავარაუდო ოპტიმიზაციის გათავლისწინებით.

კერძოდ, მომავალი წლის მთავარი ფინანსური დოკუმენტის პროექტში წერია, რომ განათლებისა და მეცნიერების სამინისტროს სისტემაში გათვალისწინებულია მთავრობის სტრუქტურაში დაგეგმილი ცვლილებები და სპორტის და ახალგაზრდობის სამინისტროდან გადმოტანილია ახალგაზრდობის პოლიტიკის დაგეგმვასა და შესაბამის პროგრამებზე გათვალისწინებული თანხები 4.4 მლნ ლარი.

შესაბამისად ბიუჯეტის საბოლოო პროექტის მიხედვით, 2018 წლისთვის აღნიშნული უწყების ასიგნებები განსაზღვრულია 1 186.2 მლნ ლარით. 

"მთავრობის სტრუქტურაში დაგეგმილი ცვლილებების გათვალისწინებით ბიუჯეტში განსაზღვრულია საქართველოს გარემოს დაცვის, სოფლის მეურნეობისა და სოფლის განვითარების სამინისტრო, რომლისთვისაც გამოყოფილია 274.8 მლნ ლარი. საგარეო საქმეთა სამინისტროსთვის გათვალისწინებულია 120.9 მლნ ლარი. ბიუჯეტის პროექტის მეორე წარდგენასთან შედარებით გაზრდილია 3.0 მლნ ლარამდე, რაც გამოწვეულია
ევროპულ და ევროატლანტიკურ სტრუქტურებში ინტეგრაციის საკითხებში საქართველოს
სახელმწიფო მინისტრის აპარატის სამინისტროსთან შერწმით.დაგეგმილი სტრუქტურულ-ფუნქციური ცვლილებების გათვალისწინებით სპორტისა და ახალგაზრდობის საქმეთა სამინისტროს სპორტის მიმართულება შეუერთდა საქართველოს კულტურისა და ძეგლთა დაცვის სამინისტროს. შედეგად ჩამოყალიბდა კულტურისა და სპორტის სამინისტრო, რომლისთვისაც გათვალისწინებულია 285.3 მლნ ლარი", - წერია ბიუჯეტის პროექტში. 

დაგეგმილი სტრუქტურულ-ფუნქციური ცვლილებების გათვალისწინებით, ეკონომიკისა და მდგრადი განვითარების სამინისტროს შეუერთდა ენერგეტიკის სამინისტრო და გარემოსა და ბუნებრივი რესურსების დაცვის სამინისტროს ბუნებრივი რესურსების მართვის მიმართულება.

აღნიშნულის გარდა გათვალისწინებულია შემდეგი 2017 წლის სახელმწიფო ბიუჯეტში
დაგეგმილი ცვლილებები, კერძოდ: 2017 წელს ეკონომიკის სამინისტროს სსიპ - ქონების მართვის სააგენტოს ემატება 106,0 მლნ ლარი, რომელიც მიიმართება სახელმწიფო საწარმოების კაპიტალში და მოხმარდება 2018 წელს დაგეგმილი მშენებლობების დაფინანსებას (ქუთაისის აეროპორტის II ტერმინალის მშენებლობა, ბიზნეს სახლის მშენებლობა, მთის კურორტების ინფრასტრუქტურა), შესაბამისად 2018 წლის პროექტში სსიპ - ქონების მართვის სააგენტოს ბიუჯეტი შემცირებულია 108,0 მლნ ლარით;

2018 წელს განულებულია გაზიფიცირების სამუშაოებისთვის გათვალისწინებული 30,0 მლნ ლარი, თუმცა 2018 წელს გაზიფიცირების მიმართულებით განსახორციელებელი სამუშაოებისთვის 2017 წელს ენერგეტიკის სამინისტროს ემატება 50,0 მლნ ლარი,

შესაბამისად პროექტის წინა ვარიანტში გაზიფიცირებისთვის გათვალისწინებული 30,0
მლნ ლარის ნაცვლად დაიხარჯება 50,0 მლნ ლარი.

2018 წელს დონორების მიერ დაფინანსებული ელექტროგადამცემი ხაზების მშენებლობის
(განმახორციელებელი - სს „სახელმწიფო ელექტროსისტემა“) თანადაფინანსების მიზნით
ენერგეტიკის სამინისტროს 2017 წლის ბიუჯეტით გამოეყო 15,0 მლნ ლარი და
შესაბამისად აღნიშნული თანხით მცირდება შესაბამისი პროგრამა; 

ყოველივე ზემოაღნიშნულის გათვალისწინებით ეკონომიკისა და მდგრადი განვითარების
სამინისტროსათვის განსაზღვრულია 229.6 მლნ ლარი.