მიხეილ გიორგაძე წიგნის ეროვნული ცენტრის დირექტორის გადადგომაზე თხოვნას ეხმიანება

კულტურის მინისტრი მიხეილ გიორგაძე ქართული წიგნის ეროვნული ცენტრის ხელმძღვანელის მედეა მეტრეველის მიერ თანამდებობიდან წასვლის შესახებ დაწერილ განცხადებას ეხმიანება და აცხადებს, რომ თუ ეროვნული ცენტრის გუნდი პოზიციებს არ იშეიცვლის, იძულებული იქნება მეტრეველის განცხადება დააკმაყოფილოს. ამის შესახებ "ნეტგაზეთი" წერს.

მინისტრის თქმით, წიგნის ეროვნულ ცენტრში სტრუქტურული ცვლილებები დაგეგმილი არ არის. გიორგაძე დასძენს, რომ მედეა მეტრეველის განცხადებაში მეტრეველი მას "გარკვეულ პირობებს" უყენებს, რათა ამ თანამდებობაზე მუშაობა გააგრძელოს.

"მე მქონდა შეხვედრა როგორც მასთან პირადად ასევე წიგნის ცენტრის მთელ გუნდდთან, სადაც ჩვენ-ჩვენი პოზიციები გავცვალეთ და მე პირდაპირ ვთქვი, რომ ამ პირობების დაკმაყოფილება არ მგონია იყოს სწორი.

საუბარია რაზე, რომ წიგნის ცენტრს მოსცილდეს ყველა ფუნქცია და ყველა ვალდებულება, რაც მას გააჩნია ფრანკფურტის წიგნის ბაზრობისთვის მომზადებასთან დაკავშირებით. რომ მას დარჩეს მხოლოდ თარგმანები და ლიტერატურული პროგრამა, რაც არის აბსოლუტურად შეუძლებელი. მით უმეტეს ახლა, როდესაც სხვადასხვა შინაარსობრივ და საკონტრაქტო ურთიერთობებში არის შესული წიგნის ცენტრი და მე ამის შესახებ პირდაპირ ვთქვი.

ვთხოვე როგორც ხელმძღვანელს ისე გუნდს ცენტრის, რომ კიდევ ერთხელ გადეხედათ თავისი პოზიციისთვის, რადგან თუ ისინი ამ პოზიციას არ შეიცვლიან მე ვიქნები იძულებული განცხადება გათავისუფლების თაობაზე დავაკმაყოფილო, თუმცა ამის გაკეთება არ მინდა, მიმაჩნია, ამ ადამიანების გუნდი თავის საქმეს კარგად აკეთებს. თუმცა, ამ პირობის სანაცვლოდ მუშაობის გაგრძელება ჩემთვის მიუღებელია” – ამბობს მიხეილ გიორგაძე.

ქართული წიგნის ეროვნული ცენტრის სამეთვალყურეო საბჭო წერილს ავრცელებს, რომელშიც წერია, რომ კულტურის სამინისტრო პროექტის საორგანიზაციო ჯგუფის მენეჯმენტში "მნიშვნელოვან ცვლილებებს გეგმავს". განცხადებაში ასევე ვკითხულობთ, რომ ცენტრის დირექტორმა მედეა მეტრეველმა თანამდებობის დატოვების განცხადებით კულტურის მინისტრს მიმართა, რაც საბჭოს წევრების აზრით, მნიშვნელოვნად შეაფერხებს ცენტრის საქმიანობას.