პოლიტოლოგმა ანატოლ ლივენმა გადაცემაში „თბილისის დროით“ ევროპული ზეწოლის შემცირების შესაძლო ფაქტორები დაასახელა

პოლიტოლოგმა, მწერალმა, ქუინსის ინსტიტუტის Responsible statecraft-ის ევრაზიის პროგრამის დირექტორმა ანატოლ ლივენმა გადაცემაში „თბილისის დროით“ ისაუბრა იმ ფაქტორებზე, რომლებმაც შესაძლებელია, ევროკავშირის მხრიდან ზეწოლა შეამციროს.

მან აღნიშნა, რომ არსებობს ორი ფაქტორი, რომლებიც მომავალში შესაძლოა, ევროკავშირის შერბილება განაპირობოს.

ანალიტიკოსის თქმით, ევროკავშირის შერბილების შემთხვევაში საქართველოს გაწევრიანების შანსები გაიზრდებოდა.

„მიმაჩნია, რომ ორი ფაქტორი განაპირობებს ევროპული ზეწოლის შემცირებას მომავალში, ეს არის პირველ რიგში მოცემულობა რომლის თანახმად, უკრაინაში როდესაც ომი დასრულდება, ევროკავშირი იქნება წარმოუდგენელი გამოწვევის წინაშე. საქმე ეხება უკრაინის ევროკავშირში გაწევრიანებას და ეს მოხდება მხოლოდ და მხოლოდ გაცილებით შერბილებული ევროკავშირის ჩამოყალიბებით.

არსებობს კიდევ ერთი გამოწვევა, მაგალითად თუ საფრანგეთის ხელისუფლების სათავეში მარინ ლე პენის პარტია მოვა, შესაძლოა საფრანგეთმა მიბაძოს რიგ აღმოსავლეთ ევროპულ სახელმწიფოს. და შესაძლოა ვიხილოთ, რომ საფრანგეთმა უკანონო მიგრაციის შეჩერების მიზნით დატოვოს ევროპული სასამართლოს რიგებიც. საფრანგეთში ლტოლვილის სტატუსის მიღება შეუძლებელი იქნება. ევროკავშირი გადაიტანს მსგავს ქმედებას სლოვაკეთისა და უნგრეთისგან, მაგრამ საფრანგეთი ამ შემთხვევაში ევროპის ცენტრს დააზიანებდა. განსაკუთრებით კი მაშინ, თუ საფრანგეთი კიდევ უფრო შორს წავა და შენგენის ზონასაც დატოვებს.

შესაძლოა ევროკავშირის შერბილება ამ მოქმედებების გამოც ვიხილოთ. ეს კი თავის მხრივ გაზრდიდა საქართველოს გაწევრიანების შანსებს, გვექნებოდა სხვა ევროკავშირი, გაცილებით უფრო ნაკლები კონტროლის მქონე“, - განაცხადა პოლიტოლოგმა.

ანატოლი ლივენის შეფასებით, ევროკომისიამ უკრაინაში ომი საკუთარი ძალაუფლების რადიკალური სახით ზრდისთვის გამოიყენა. მან უკრაინის თემაზე ევროკომისიასა და გერმანიას შორის წინააღმდეგობაზეც გაამახვილა ყურადღება.

„პრეზიდენტი, ურსულა ფონ დერ ლაიენი თავად გერმანიის თავდაცვის მინისტრმა გააკრიტიკა. საუბარი ეხება ურსულა ფონ დერ ლაიენის განცხადებას უკრაინაში საერთო ევროპული სამხედრო მისიის მომზადების თაობაზე. ბორის პისტორიუსმა, გერმანიის თავდაცვის მინისტრმა კი განაცხადა, რომ ეს საკითხი არ არის ევროკომისიის გადასაწყვეტი. ის, თუ რას იზამს გერმანული არმია, არის ბერლინის საქმე და არა ბრიუსელში მსხდომი არავისგან არჩეული ოფიციალური პირებისა. მე ზუსტ ციტირებას არ ვახდენ, მაგრამ ამ ურთიერთგაცვლის სულისკვეთება სწორედ ასეთი გახლდათ. სახეზეა წინააღმდეგობა“, - განაცხადა ლივენმა.