ნიკოლოზ სამხარაძე აქციაზე წაკითხულ წერილზე: რა ჯანსაღ ოპონირებაზე შეიძლება იყოს საუბარი, როდესაც ადამიანები, უმარტივეს საკითხსაც კი, როგორიც არის განცხადების დაწერა, უთანხმებენ ვიღაც სხვებს უცხოეთში

რა ოპონირებაზე და ჯანსაღ პოლიტიკური სისტემაზე შეიძლება იყოს საუბარი, როდესაც ადამიანები, უმარტივეს საკითხსაც კი, როგორიც არის განცხადების დაწერა, უთანხმებენ ვიღაც სხვებს უცხოეთში, - განაცხადა საგარეო ურთიერთობათა საპარლამენტო კომიტეტის თავმჯდომარემ, ნიკოლოზ სამხარაძემ წერილთან დაკავშირებით, რომელიც რადიკალური ოპოზიციის აქციაზე წაიკითხეს და რომელიც ბრიუსელიდან გამოგზავნილ ტექსტს იმეორებდა.

მისი თქმით, გუშინდელმა შემთხვევამ აჩვენა, რომ რადიკალებს იმის უნარიც კი არ შესწევთ, განცხადება თავად დაწერონ.

„გუშინდელი ფაქტი კიდევ ერთი ნათელი ილუსტრირება და ნათელი დადასტურებაა იმისა, რომ სამწუხაროდ, საქართველოში არსებობენ პოლიტიკური მოთამაშეები, რომელთაც თვითონ არ შეუძლიათ არა თუ რაღაც პოლიტიკური ნაბიჯების გადადგმა, არამედ განცხადების დაწერაც კი და განცხადებასაც ვიღაცები უწერენ უცხოეთიდან. ამის შემდეგ საერთოდ რა ოპონირებაზე და ჯანსაღ პოლიტიკური სისტემაზე შეიძლება იყოს საუბარი, როდესაც ადამიანები, უმარტივეს საკითხსაც კი, როგორიც არის განცხადების დაწერა, უთანხმებენ ვიღაც სხვებს უცხოეთში“, - განაცხადა ნიკოლოზ სამხარაძემ.

ოპოზიციის ლიდერები ბრიუსელიდან გამოგზავნილი ბრიფინგის ტექსტის შედგენას ერთმანეთს აბრალებენ.

Prime Time-ის ინფორმაციით, ბრიუსელიდან მათ მიაწოდეს დოკუმენტი, რომელიც ადგილობრივ ოპოზიციას ევროკავშირის კონკრეტულმა მაღალჩინოსნებმა გაუგზავნეს. აცხადებდნენ, რომ აღნიშნულ ტექსტს რამდენიმე წუთში რადიკალური ოპოზიციის წარმომადგენლები უცვლელად წაიკითხავდნენ.

ამასთან, რამდენიმე წუთის შემდეგ პარლამენტთან ჩატარდა რადიკალური ოპოზიციის ბრიფინგი, რომელზეც აქციის ერთ-ერთმა ორგანიზატორმა, ლევან ჯობავამ აღნიშნული ტექსტი წაიკითხა და აღნიშნა, რომ მას სამოქალაქო ორგანიზაციების, საპროტესტო ჯგუფების, პოლიტიკური პარტიებისა და პოლიტპატიმრების წარმომადგენლების სახელით კითხულობდა.