შალვა პაპუაშვილი ე.წ. „სამხრეთ ოსეთის ადმინისტრაციის“ გაუქმებაზე: ქართველი ხალხის რეაქცია ადასტურებს ჩვენი გადაწყვეტილების სისწორეს - 2006-2007 წლებში გადაწყვეტილებები იყო გარედან ნაკარნახევი

მნიშვნელოვანია, ის, რაც ეწინააღმდეგება ჩვენს კონსტიტუციას და ეროვნულ ინტერესებს, ჩვენს სამართლებრივ ტერმინოლოგიურ სივრცეში არ დარჩეს და სწორედ ამას ემსახურება ეს გადაწყვეტილება, - განაცხადა საქართველოს პარლამენტის თავმჯდომარემ შალვა პაპუაშვილმა „ნაციონალური მოძრაობის“ ხელისუფლების მიერ შექმნილი „ყოფილი სამხრეთ ოსეთის ავტონომიური ოლქის ტერიტორიაზე შექმნილი ადმინისტრაციულ-ტერიტორიული ერთეულის ადმინისტრაციის“ გაუქმების გადაწყვეტილების შესახებ.

ამასთან, მან აღნიშნა, რომ ადმინისტრაციის თანამშრომლები და ხელმძღვანელები წლების განმავლობაში კეთილსინდისიერად ემსახურებოდნენ თავის საქმე და ისინი გარკვეულწილად თავადაც ამ გარემოების მძევლები იყვნენ. თავად ორგანო კი, შალვა პაპუაშვილის განმარტებით სრულად ანტიკონსტიტუციურია.

„მიდგომა, რომელმაც თავის დროზე მიგვიყვანა 2008 წლის ომამდე, რა თქმა უნდა, ითხოვს გადაწყვეტილებას და შესაბამის საკანონმდებლო ქმედებებს.

ჩვენ ვმოქმედებთ ჩვენი ეროვნული ინტერესების შესაბამისად და ჩვენი გადაწყვეტილებები არ ეყრდნობა იმას, ვის მოეწონება ან არ მოეწონება, ვის გაუხარდება ან ეწყინება. ეს განსაკუთრებით დადასტურდა ბოლო წლების განმავლობაში - ჩვენ არ ვუყურებთ, ვინ როგორ უყურებს ჩვენს გადაწყვეტილებებს, ჩვენ ვუყურებთ, ქართველი ხალხი როგორ აღიქვამს ამ გადაწყვეტილებებს. ჩვენთვის საზომი არის, რას იტყვის ქართველი ხალხი და ქართველი ხალხის რეაქცია ადასტურებს ჩვენი გადაწყვეტილების სისწორეს“, - განაცხადა პარლამენტის თავმჯდომარემ.

კითხვაზე, ამ დრომდე არ იყო ეს გადაწყვეტილება მიღებული, შალვა პაპუაშვილმა აღნიშნა, რომ ყველა გადაწყვეტილებას მომზადება სჭირდება.

„ხელის გულზე დევს, რომ თავის დროზე - 2006-2007 წლებში ეს გადაწყვეტილება გარედან ნაკარნახევი იყო და ეს გარე ძალების გეოპოლიტიკურ თამაშში შესაწირ პაიკად საქართველოს ჩართვა. როდესაც ამ გადაწყვეტილების შესახებ განვაცხადეთ, პოლიტიკოსების, პარტიების მხრიდან რაიმე უარყოფითი რეაქცია არ ყოფილა, მაგრამ ალბათ დააკვირდით, ვინ გამოიყვანეს ამ გადაწყვეტილების წინააღმდეგ - უცხოეთიდან დაფინანსებული „ენჯეოები“. პირველი, ვინც ამ გადაწყვეტილებას კრიტიკულად შეხედა და თქვა, რომ „როგორ შეიძლება, ტერმინი სამხრეთ ოსეთი გავაქროთ ჩვენი სამართლებრივი სივრციდან“, იყვნენ უცხოეთიდან დაქირავებული „ენჯეოები“. ესეც კიდევ ერთხელ ადასტურებს, რომ ეს პროექტი თავის დროზე იყო სრულად გარედან ნაკარნახევი“, - განაცხადა შალვა პაპუაშვილმა.

მისი შეფასებით, მთავარია, რომ სწორი და არასწორი გავარჩიოთ ერთმანეთისგან და არასწორია, როდესაც ხელისუფლების გადაწყვეტილებით, ქვეყნის ტერიტორიული მოწყობა კონსტიტუციის მიღმა დება.

„ამავე დროს, გაკეთდა ისე, რომ სეპარატიზმის ირიბი აღიარება მოხდა მაშინდელი ხელისუფლების მხრიდან“, - აღნიშნა შალვა პაპუაშვილმა.

ხელისუფლების გადაწყვეტილებით, მიხეილ სააკაშვილის მიერ შექმნილი „ყოფილი სამხრეთ ოსეთის ავტონომიური ოლქის ტერიტორიაზე შექმნილი ადმინისტრაციულ-ტერიტორიული ერთეულის ადმინისტრაცია“ უქმდება. საკანონმდებლო ინიციატივა პარლამენტის ბიუროს დღევანდელ სხდომაზე ინიციირდება.