შალვა პაპუაშვილი: ჩამოყალიბდეს ნატო, რა უნდა. ასე ბუნდოვანებაში და გაუგებრობაში რომ ჰყავს მთელი ერები, ეს არის სწორედ მიუღებელი. ღია კარში ვდგავართ, ორპირ ქარში, ნაცვლად იმისა, რომ გადაწყვეტილება მიიღონ

ჩამოყალიბდეს ნატო-ს რა უნდა. ასე ბუნდოვანებაში და გაუგებრობაში რომ ჰყავს მთელი ერები, ეს არის სწორედ მიუღებელი. ქართველი ხალხი აღარ არის ისეთი მიამიტი, რომ ლამაზი სიტყვები დაიჯეროს, - განუცხადა პარლამენტის თავმჯდომარე შალვა პაპუაშვილმა ჟურნალისტებს.

პაპუაშვილი მარკ რუტეს განცხადებას გამოეხმაურა, რომელმაც „რადიო თავისუფლების“ კითხვის საპასუხოდ, არის თუ არა საქართველო კვლავ ასპირანტი ქვეყანა, თქვა, რომ ნებისმიერ ქვეყანას, რომელსაც ნატოს წევრობა სურს, შეუძლია სურვილი გამოხატოს და შემდეგ პროცესი იწყება.

„თუ მიამიტობაზეა საუბარი, ქართველი ხალხი აღარ არის უკვე მიამიტი ამგვარი განცხადებების მიმართ. ნატო ჩამოყალიბდეს რა უნდა. მგონი ძალიან კარგად ხედავს ქართველი ხალხი რასთან გვაქვს საქმე. 2008 წელს თქვე ს[ნატო-მ] კარი ღიააო, იმის შემდეგ 17 წელი გავიდა და საქართველომ ყველაფერი გააკეთა როგორც ინსტიტუციურად, ისე სამხედრო დაახლოების მხრივ და ისე პირდაპირ ომებში შესვლით და ბრძოლებით ნატო-ს ჯარისკაცების მხარდამხარ. ღია კარში ვდგავართ, ორპირ ქარში ნაცვლად იმისა, რომ გადაწყვეტილება მიიღონ, გაუგებრობაში და ბუნდოვანებაში აყენებენ საქართველოს.

ბატონი რუტე რომელ ქვეყანასაც წარმოადგენს და რომლის პრემიერ-მინისტრიც იყო, იმ ქვეყანაზე ათჯერ მეტი კონტინგენტი გვყავდა ავღანეთში გაგზავნილი. ასე რომ, ჩვენკენ თითის გამოშვერა და კითხვების დასმა უნდა დასრულდეს. ბურთი სრულად ნატო-ს ტერიტორიაზეა. საქართველოს ყველაფერი აქვს გაკეთებული იმისთვის, რომ ნატო-ს წევრი იყოს. საქართველოს არათუ სურვილი აქვს გამოთქმული, კონსტიტუციაში გვაქვს ჩაწერილი ეს საკითხი, თუმცა ვხედავთ, რომ ვიღაცას აწყობს, რომ საქართველო იქნება ეს, უკრაინა, თუ სხვა ასეთი ქვეყანა, ჰყავდეს რაღაც ლიბოში - არც იქით, არც აქეთ, შუაში გაჭედილი. ეს სინამდვილეში უფრო ზრდის ჩვენი უსაფრთხოების რისკებს, ვიდრე ამცირებს“, - აღნიშნა პაპუაშვილმა.

მისი თქმით, ნატომ უკრაინა ყველაზე კრიტიკულ სიტუაციაშიც კი არ მიიღო წევრად.

„ვხედავთ მათ შორის უკრაინის მაგალითზე. როდესაც ომი იწყებოდა 2022 წელს, გამოვიდა მაშინ პრეზიდენტი ზელენსკი და თქვა - ბოლო-ბოლო გაგვაგებინეთ გვიღებთ ამ ნატო-ში, თუ არაო. არც „ხო“ უთხრეს და არც „არა“. როგორც თავსებადობით, ისე ინსტიტუციურად, ყველა საკითხით, ნატო-ს წევრ 7-8 ქვეყანას ვუსწრებთ ყველა პარამეტრებით, გინდა დემოკრატიული განვითარებით, ინსტიტუციური განვითარებით, მმართველობით, ანტიკორუფციული მდგომარეობით და ა.შ.

ჩამოყალიბდეს ნატო, რა უნდა. ასე ბუნდოვანებაში და გაუგებრობაში რომ ჰყავს მთელი ერები, ეს არის სწორედ მიუღებელი. ქართველი ხალხი აღარ არის ისეთი მიამიტი, რომ ლამაზი სიტყვები დაიჯეროს. არანაირი ღია კარი და მიპატიჟება არ უნდა - უნდა გადაწყვეტილებები“, - აღნიშნა პაპუაშვილმა.