შალვა პაპუაშვილი: მნიშვნელოვანია, რომ უკრაინაში მშვიდობა დამყარდეს. რა პირობებით იქნება მშვიდობა, ეს საკითხი უკრაინის და უკრაინის ხელისუფლების გადასაწყვეტია. ფაქტია, უკრაინის ხელისუფლებას დღეს არჩევანი აქვს ცუდსა და უარესს შორის

პირველი, ჩვენთვის მნიშვნელოვანია, რომ უკრაინაში მშვიდობა დამყარდეს, რა პირობებით იქნება ეს მშვიდობა, რა თქმა უნდა, ეს საკითხი უკრაინის და უკრაინის ხელისუფლების გადასაწყვეტია, - განუცხადა ჟურნალისტებს საქართველოს პარლამენტის თავმჯდომარე შალვა პაპუაშვილმა.

მისი თქმით, ფაქტია, რომ უკრაინის ხელისუფლებას დღეს არჩევანი აქვს ცუდსა და უარესს შორის.

„ის 28 პუნქტიანი საკითხები რაც ვნახეთ, ძირითადად მთელი სიმძიმე მდგომარეობის არის იმაში, რომ რეალურად ეს არის სტამბოლში 2022 წლის მარტ-აპრილში, წინასწარ შეთანხმებული საკითხები რაც იყო, ან წარმოდგენილი საკითხები რაც იყო, მინიმუმ იმის გამეორებაა. რიგ ნაწილებში უარესი პირობებია, მათ შორის, მაგალითად ტერიტორიულ პრეტენზიებთან დაკავშირებით. ასე, რომ სამ წელიდან ნახევრის წინ, 2022 წლის მარტში რაც იყო მდგომარეობა და შეთანხმების საფუძველი, სამ წელიწად ნახევრის თავზე ზუსტად იგივე არის საფუძველი შეთანხმებისა, რის გარშემოც მიდის საუბარი. სხვაობა არის ასობით ათასი სამხედრო, ასობით ათასი სამოქალაქო პირი, რომელიც დაიღუპა ამასობაში.

ის პირობები შეთანხმებისა, რომელიც დღეს არის და რომლის გარშემოც მიდის საუბარი, ყველა მხარეს აქვს იმედი, რომ შეთანხმება შედგება, მათ შორის ვხედავთ რომ უკრაინა არის ოპტიმისტურად განწყობილი, ის საკითხები ერთი-ერთში იმეორებს იმას, რაც იყო სტამბოლში ომის დაწყებიდან რამდენიმე კვირაში. გახსოვთ თქვენ, პარაფირებულ იქნა უკრაინის მხარის მხრიდან და გახსოვთ თქვენ უკრაინელი დეპუტატის, არახამიას განცხადება, რომ უკრაინისთვის მისაღები იყო მაშინ ის შეთანხმება. ბორის ჯონსონი ჩავიდა და ევროპელების ჩარევით ჩაიშალა მაშინდელი შეთანხმება. ეს არის არახამიას განცხადება. ასე, რომ უკრაინის ხელისუფლებას ჰკითხონ, რა მოხდა მაშინ, 2022 წლის მარტში. გავიდა სამ ნახევარი წელიწადი, ასობით ათასობით ადამიანი დაიღუპა, სამხედრო, სამოქალაქო პირი, ქალი, ბავშვი და სამ ნახევარი წლის თავზე ისევ იგივე ევროპელები, ისევ იგივე მხარე სხედან და იგივე საკითხები არის საფუძველი შეთანხმების.

ასე, რომ ეს იქნებოდა ყველაზე მძიმე, აღმოჩნდეს შემდეგ, რომ სამ წელიწად ნახევრის თავზე თურმე სტამბოლის შეთანხმების პირობებია გამეორებული და ის, რაც შესაძლოა მომხდარიყო სამი წლის წინ, სამწლიანი განსხვავებით და ასობით ათასი ადამიანის დაღუპვის შემდეგ იყო შეთანხმებული. ამიტომ ვამბობთ, რომ ეს არის ცუდსა და უარესს შორის არჩევანი, თუმცა, რა თქმა უნდა, მშვიდობას არ აქვს ალტერნატივა. უბრალოდ, ამ მდგომარეობაში არის დღეს უკრაინის ხელისუფლება, რომ მას არც მშვიდობა შეუძლია და არც ომი. ომისთვის ვხედავთ უკვე, რომ არის სკეპტიციზმი, მათ შორის აშშ-ს მხრიდან რომ გააგრძელოს დახმარება და ამ დახმარების გარეშე რთულია გააგრძელოს ომი. ეს ნიშნავს მეტ სისხლის ღვრას უკრაინაში და მშვიდობაც რთულია, ვინაიდან მოსახლეობისთვის ასახსნელია, რომ ეს სამი წელი, თუკი იგივე პირობებია, რაც სტამბოლის შეთანხმების დროს უნდა ყოფილიყო, მაშინ რა ომი იყო მთლიანად ამ სამი წლის განმავლობაში“, - აღნიშნა შალვა პაპუაშვილმა.