ნინო წილოსანი რუტეს განცხადებაზე: იქნებ იმაზე იყოს აღშფოთებული, რომ სახელმწიფოს გადატრიალების მცდელობები? ან იქნებ იმაზე, რომ ევრობიუროკრატების მხრიდან საქართველოს კონკრეტული დავალება მოეთხოვებოდა და ჩვენ არ შევასრულეთ?

დასავლელი პოლიტიკოსების ერთ-ერთი დამახასიათებელი თვისებაა ორაზროვანი განცხადებები. მარკ რუტეს განცხადება, რომ აღშფოთებულია რიგი საკითხებით საქართველოსთან მიმართებაში, მაგრამ ამ ყველაფრის არ დაკონკრეტება შეიძლება ბევრნაირად გაიგოს ადამიანმა, - განაცხადა საქართველოს პარლამენტის თავმჯდომარის მოადგილემ ნინო წილოსანმა „დღის ქრონიკაში“. მან ნატოს გენერალური მდივნის განცხადების შესაძლო ინტერპრეტაციებზე ისაუბრა.

„იქნებ იმაზე იყოს აღშფოთებული, რომ სახელმწიფოს გადატრიალების მცდელობები ხდება და რადიკალური ოპოზიცია ასე მოქმედებს? ან იქნებ იმაზე არის აღშფოთებული, რომ ევრობიუროკრატების მხრიდან საქართველოს კონკრეტული დავალება მოეთხოვებოდა და ჩვენ არ შევასრულეთ? რაზეა აღშფოთებული ნატოს გენერალური მდივანი, რა თქმა უნდა, მან უკეთ იცის“, - განაცხადა წილოსანმა.

დეპუტატმა აღნიშნა, რომ ნატო ყოველთვის ერთ-ერთი სამაგალითო ქვეყანა იყო როგორც ევროკავშირის, ასევე ნატოს შემთხვევაშიც და მაგალითად ავღანეთის მისია მოიყვანა. მისივე თქმით,საქართველო არასოდეს იხევდა უკან, რომ ზედმიწევნით შეესრულებინა ნატოს ფარგლებში მიღებული დავალებები და ამის საპასუხოდ არაერთხელ დამდგარა ძალიან დიდი რისკის ქვეშ.

წილოსანი ერთ-ერთ ასეთ რისკად 2008 წელს, ბუქარესტის სამიტზე საქართველოს ნატოში გაწევრიანების შესახებ გაკეთებულ განცხადებას იხსენებს და მის აგვისტოს ომთან შესაძლო კავშირზე საუბრობს.

„ლოგიკური დასკვნაა, რომ რუსეთი ყველაზე მეტად რეაგირებს, თუ ნატოს საზღვრები მას უახლოვდება. ახლაც, როდესაც უკრაინასთან დაკავშირებული 28-პუნქტიანი გეგმა ამბობს, რომ ერთ-ერთი უმსხვილესი პუნქტია, რომ ნატომ თავისი ჯარები არ განათავსოს უკრაინაში, უკრაინამ კონსტიტუციაში არ ჩაწეროს, რომ ნატოში არ შევა, ეს იდენტურად საქართველოზეც ვრცელდება და რუსეთის მოთხოვნა მთელი ამ წლების განმავლობაში ეს იყო. ამიტომ, როდესაც ნატოს მხრიდან ეს იგნორირებულია და ჩვენ ფაქტობრივად შიშველი ხელით ვართ აქვე, ამ ოკუპანტი ქვეყნის მეზობლად, ამ დიდი რისკების წინაშე და ნატოს გენმდივანი ამბობს, რომ აღშფოთებულია პირობითად იმით, როგორ მოქმედებენ პოლიციელები აქციის მონაწილეებთან, უბრალოდ ირონიულია ეს დამოკიდებულება და ვფიქრობ, რომ არ მიუთითებს ამ კომენტარის სამართლიანობაზე“, - განაცხადა წილოსანმა.

ნატოს გენერალურმა მდივანმა, მარკ რუტემ „რადიო თავისუფლებასთან“ განაცხადა:

„ევროატლანტიკურ სივრცეში ნებისმიერ ქვეყანას, რომელსაც ნატოს წევრობა სურს, შეუძლია სურვილი გამოხატოს და შემდეგ პროცესი იწყება. მიამიტი არ ვარ იმასთან დაკავშირებით, რაც საქართველოში ხდება. ჩვენ ძალიან შეშფოთებულები ვართ. ამის შესახებ ქართველებს ნათლად ვაცნობეთ“.