ლევან მახაშვილი „კამიტის“ გამოყენების შესახებ კამპანიაზე: გამოძიებამ უკვე დაადასტურა, რომ ეს იყო უცხოეთში დაგეგმილი და საქართველოში რადიკალური ჯგუფების, ე.წ. კოლექტიური ნაციონალური მოძრაობის მიერ გაკეთებული საინფორმაციო ტერორიზმი

ლევან მახაშვილი სახელმწიფო უსაფრთხოების სამსახურის მიერ „კამიტის“ საქმეზე გამოძიების შედეგებს ეხმაურება. პარლამენტის ევროპასთან ინტეგრაციის კომიტეტის თავმჯდომარე აღნიშნავს, რომ ეს არ არის პირველი შემთხვევა, როდესაც რადიკალური ჯგუფები, უცხოეთში დაგეგმილი სქემებით საქართველოში შიშის და დაპირისპირების კერების გაჩენას ცდილობენ.

„გამოძიებამ უკვე დაადასტურა, რომ ეს იყო უცხოეთში კარგად დაგეგმილი და საქართველოში რადიკალური ჯგუფების, ე.წ. კოლექტიური ნაციონალური მოძრაობის მიერ გაკეთებული საინფორმაციო ტერორიზმი. ეს იყო რეალურად, საკუთარი მოსახლეობის ამ ტყუილებით მოწამვლა, რომლის მიზანიც იყო ბრაზისა და მღელვარების გამოწვევა მოსახლეობაში და კარგია, რომ ამ რამდენიმედღიან ტყუილს აეხადა ფარდა. საზოგადოებამ დაინახა, რეალურად ვინ იყო შემსრულებელი და ვინ იყო ამ პროცესის იდეის ავტორი. ამ ყველაფრის მიზანი იყო მოსახლეობაში უმწეობის, შიშის, ხელისუფლების მიმართ მღელვარებისა და სიბრაზის გამოწვევა და აი, ამ ფონზე ისევ დაპირისპირების კერების გაჩენა საზოგადოებაში. ეს არ არის პირველი, ბევრჯერ სცადეს“, - განაცხადა მახაშვილმა.

სახელმწიფო უსაფრთხოების სამსახურში გამართულ ბრიფინგზე ითქვა, რომ 2024 წლის 4-5 დეკემბრის ღამით, გამოყენებული იყო ნივთიერება „ქლორობენზილიდინ მალონონიტრილი“, რომლის გამხსნელადაც გამოიყენეს ნივთიერება „პროპილენ გლიკოლის“ ხსნარი, აღნიშნული ნივთიერებებიდან არცერთი განეკუთვნება აკრძალულ ნივთიერებათა კატეგორიას, ხოლო „ბრომობენზილ ციანიდი“, იგივე „კამიტი“ საქართველოს შინაგან საქმეთა სამინისტროს არასოდეს შეუძენია.

BBC-მ გამოაქვეყნა სტატია, რომელშიც საუბარია იმაზე, რომ „ქართული ოცნების“ ხელისუფლებამ აქციაზე პირველი მსოფლიო ომის დროინდელი ქიმიური იარაღი გამოიყენა. „ქართული ოცნება“ BBC-ის წინააღმდეგ საერთაშორისო სასამართლოებში სამართლებრივ დავას იწყებს. ამასთან, სახელმწიფო უსაფრთხოების სამსახურმა BBC-ის მიერ საჯარო სივრცეში დანაშაულის შესახებ გავრცელებულ ინფორმაციასთან დაკავშირებით გამოძიება დაიწყო.