შალვა პაპუაშვილი: დიდი ხანია ჩვენ ვამბობთ, რომ ბურთი სრულად არის ნატო-ს მოედანზე. დიდი ხანია ველოდებით პასუხს, ბოლოსდაბოლოს რას ნიშნავს ეს გაღებული კარი. ჯერ კიდევ ედუარდ შევარდნაძემ დასვა ეს კითხვა, რას ნიშნავს ღია კარი

დიდი ხანია ჩვენ ვამბობთ, რომ ბურთი სრულად არის ნატო-ს მოედანზე, დიდი ხანია ველოდებით პასუხს, ბოლოსდაბოლოს რას ნიშნავს ეს გაღებული კარი, - განუცხადა ჟურნალისტებს საქართველოს პარლამენტის თავმჯდომარე შალვა პაპუაშვილმა.

პაპუაშვილის თქმით, ჯერ კიდევ ედუარდ შევარდნაძემ დასვა ეს კითხვა, რას ნიშნავს ღია კარი.

„საქართველომ უნდა იზრუნოს საკუთარ უსაფრთხოებაზე და უპირველეს ყოვლისა, უნდა იზრუნოს საკუთარი ტერიტორიული მთლიანობის აღდგენაზე. ასე, რომ ჩვენი მთავარი ამოცანაა ის მავნე ინტერესები, რომელიც შეიძლება სხვადასხვა ქვეყანას თუ გარე პოლიტიკურ ძალებს ჰქონდეთ საქართველოს წინააღმდეგ, ეს მავნე ინტერესები არ განხორციელდეს. ამისთვის სხვადასხვა ინსტრუმენტი არსებობს, როგორც სხვადასხვა საერთაშორისო ორგანიზაციის გამოყენებით, ასევე სხვადასხვა ალიანსთან დაკავშირებით.

რაც შეეხება კონკრეტულად აშშ-ს პოზიციას, რომელიც ახლა უსაფრთხოების ახალ დოკუმენტში ვნახეთ, მათ შორის ნატო-სთან დაკავშირებით, ეს ის საკითხია, რომელსაც ჩვენ დიდი ხანია უკვე ვაყენებთ ნატო-ს წინაშე. დიდი ხანია ჩვენ ვამბობთ, რომ ბურთი სრულად არის ნატო-ს მოედანზე. ჩვენ დიდი ხანია ველოდებით პასუხს, ბოლოსდაბოლოს რას ნიშნავს ეს გაღებული კარი. ჯერ კიდევ ედუარდ შევარდნაძემ დასვა ეს კითხვა, რას ნიშნავს ღია კარი. თუკი ღია კარი ნიშნავს, რომ იქ უნდა ვიდგეთ უსაშველოდ, იქ რისკი არის, რომ ღია კარში დგომისას ორპირ ქარში გაცივდეს და შეეყაროს ადამიანს რაიმე, ზოგადად და იგივე ეხება, რა თქმა უნდა, სახელმწიფოსაც, რომელსაც, ასეთ დროს რისკები პირიქით, შეიძლება გაეზარდოს.

ჩვენ, სამწუხაროდ ვხედავთ გარკვეულ განცხადებებს, რომ არ არსებობს კონსენსუსი გაფართოებასთან დაკავშირებით. ვხედავთ ამავე დროს, განცხადებებს მათ შორის უკრაინასთან დაკავშირებით, რომ აუცილებლად გახდება ნატო-ს წევრი, მაგრამ სად არის ქმედებები. სინამდვილეში, ამ ქმედებებს ვერ ხედავს და უპირველეს ყოვლისა, ჩვენ ამას ვუყურებთ ახლა უკრაინელი ხალხის მაგალითზე, რომელიც საკუთარი უფლებისთვის, რომ იყოს ნატო-ს წევრი, ამისთვის სისხლს ღვრის უკვე სამ წელზე მეტია. სისხლს ღვრის ამისთვის და ნორმალურ პასუხსაც არ აკადრებენ უკრაინელ ხალხს, ბოლო-ბოლო ან კი უთხრან, ან არა. რისთვის დაღვარეს სისხლი, ხომ უნდა გაიგონ.

გუშინაც ვთქვი, ეს ჰგავს უკვე იმ მომენტს, როდესაც არის რაღაც ჩამოკიდებული სტაფილოსავით, რომელსაც უნდა მისწვდე და ამით საკუთარი მიმართულებები მისცე ისე, რომ ვერასდროს მისწვდება იმ სატყუარას, რომელიც წინ აქვს ჩამოკიდებული.
კიდევ ერთხელ, მნიშვნელოვანი არის, რომ ჩვენ გვქონდეს მკაფიო პასუხები საკითხებთან დაკავშირებით. საქართველომ ნატო-ში საკუთარი წევრობისთვის გააკეთა ყველაფერი, როგორც ინსტიტუციურად, ასევე იმით, რომ ნატო-ს ომებში მივიღეთ მონაწილეობა, როდესაც ნატო-ს წევრი ქვეყნები ემალებოდნენ ამ ომებს. ომებში მივიღეთ მონაწილეობა, ინსტიტუციურად, ჩახედეთ სხვადასხვა შედარებას, ნატო-ს წევრ ბევრ ქვეყანას, 7-8 ქვეყანას როგორც წესი, ვჯობივართ ხოლმე ინსტიტუციური განვითარებით, იქნება ეს კორუფციის სიმცირე, კანონის უზენაესობა თუ სხვა მსგავსი ინდიკატორები. ამიტომ, დიდი ხანია ბურთი არის ნატო-ს მოედანზე, გასცენ პასუხი უპირველეს ყოვლისა უკრაინელ ხალხს და გასცემ პასუხი ყველას“, - აღნიშნა შალვა პაპუაშვილმა.