შალვა პაპუაშვილი: გაქვს სათქმელი, რომელიც გინდა, რომ მანიფესტაციით თუ აქციით გამოხატო? გამოდი, თქვი, რაც გინდა. თუ სათქმელის თქმის გარდა აპირებ, შექმნა რაღაც სხვა ბარიერები თანამოქალაქეებისთვის, უნდა იყო საკმარისი რაოდენობით

ჩვენ ვხედავთ 4 ოქტომბრის თავდამსხმელების მცდელობებს, რომ თბილისის მოსახლეობას შეუქმნან დისკომფორტი. შესაბამისი ცვლილებებით [კანონში] შევძელით, რომ მათ თავად აიღეს ხელი 20-30 კაცით საავტომობილო გზის გადაკეტვაზე, - განაცხადა საქართველოს პარლამენტის თავმჯდომარემ შალვა პაპუაშვილმა „შეკრებისა და მანიფესტაციების შესახებ კანონთან“ დაკავშირებით.

მან აქვე მოიყვანა ოპოზიციის ერთ-ერთი ლიდერის რამდენიმე დღის წინანდელი განცხადება აქციის მონაწილეთა მცირე რაოდენობით საავტომობილო გზის გადაკეტვის საკითხზე.

„სხვათა შორის, გუშინ თუ გუშინწინ ერთ-ერთი მათი რადიკალი ლიდერი აცხადებდა, გასაგებია სულისკვეთება, რომ 50-მა კაცმა არ უნდა გადაკეტოს გზა და ამიტომაც აღარ ვკეტავთო - არა მხოლოდ იმიტომ, რომ ჯარიმის და სხვა სანქციის შეგვეშინდა, არამედ იმიტომ, რომ ვხვდებით, რომ 50-მა კაცმა არ უნდა გადაკეტოსო. კი, ბატონო, ამას თუ ხვდები, სამმა რომ არ უნდა გადაკეტოს ქუჩა, ესეც ხომ მისახვედრია?

საერთო ჯამში საქმე ეხება ელემენტარულ საღ ადამიანურ ლოგიკას და გონივრულ განსჯას. გაქვს რაიმე სათქმელი, რომელიც გინდა, რომ მანიფესტაციით თუ აქციით გამოხატო? გამოდი, თანხმობის გარეშე თქვი, რაც გინდა. თუ შენ სათქმელის თქმის გარდა აპირებ, რომ შექმნა რაღაც სხვა ბარიერები თანამოქალაქეებისთვის - გადაკეტო საავტომობილო, საფეხმავლო გზა, უნდა იყო საკმაო რაოდენობით. თუ იქნები საკმაო რაოდენობით, არავინ გიშლის. ხოლო თუ ხარ ცოტა - 20-მა კაცმა არ გადაკეტო საავტომობილო გზა და სამმა არ გადაკეტო საფეხმავლო გზა. რა არის ამაში გაუგებარი, აუხსნელი და მიუღებელი? პარლამენტის წინ ტერიტორია საკმაოდ ბევრ ადამიანს იტევს, ხედავთ, რომ ვერც ავსებენ ამ ტერიტორიას. შეიკრიბონ, იყვნენ, არავინ არავის არაფერს უშლის.

ბოლო 13 წლის განმავლობაში ვერ დაასახელებთ ვერც ერთ ფაქტს, როდესაც რაღაც შეკრება იყო და ვინმე ვინმეს რამეს უზღუდავდა. როდესაც პარლამენტის შენობაზე ხდება შტურმი, ამის საშუალება არავის მიეცემა”, - განაცხადა შალვა პაპუაშვილმა.

პარლამენტმა „შეკრებებისა და მანიფესტაციების შესახებ“ კანონში ცვლილებები თანმდევ პროექტებთან ერთად მესამე მოსმენით 10 დეკემბერს მიიღო.