პაპუაშვილი: ვინ გვასწავლის ჭკუას, კომისარი, რომელიც არავის აურჩევია. ამ მხრივ ევროკავშირი არის მაგალითი დემოკრატიის დეფიციტისა, სადაც უმაღლესი თანამდებობის პირები არავის მიერ არ არიან არჩეულები და არიან პოლიტიკური კონსენსუსის შედეგი

ვინ გვასწავლის ჭკუას, არა არჩეული კომისარი, კომისარი, რომელიც არავის აურჩევია, - განუცხადა ჟურნალისტებს საქართველოს პარლამენტის თავმჯდომარე შალვა პაპუაშვილმა გაფართოების საკითხებში ევროკომისარ, მარტა კოსის განცხადებასთან დაკავშირებით.

შალვა პაპუაშვილის თქმით, ამ მხრივ ევროკავშირი არის მაგალითი დემოკრატიის დეფიციტისა, სადაც უმაღლესი თანამდებობის პირები არავის მიერ არ არიან არჩეულები და არიან პოლიტიკური კონსენსუსის შედეგი.

„ყველა დანიშნული კომისარი არის პოლიტიკური კონსენსუსის შედეგი და არა დემოკრატიული არჩევნების შედეგი. ისინი ჩვენ მიგვითითებდნენ საკუთარი ხალხის მოსმენა როგორ უნდა და როგორ არა, ეს არის სასაცილო დამოკიდებულება.
ხელისუფლება ხალხს რომ უსმენს, იმიტომ მოვიდა მილიონ 100 ათასი და მოგვცა ხმა „ქართულ ოცნებას“ სულ რაღაც ორი თვის წინ“, - აღნიშნა შალვა პაპუაშვილმა.

ევროპული საბჭოს მიერ მიღებული გადაწყვეტილებისთვის პასუხისმგებლობას, საქართველოს ხელისუფლებას აკისრებენ. მარტა კოსის თქმით, იმისთვის, რომ ქვეყანამ ევროკავშირში გაწევრების პროცესი განაგრძოს, საქართველოს მთავრობამ მიდგომები და დღის წესრიგი უნდა შეცვალოს. მმართველი გუნდის შეფასებით, სახეზეა ევრობიუროკრატების არათანმიმდევრული განცხადებები. სწორედ მარტა კოსის აქვს რამდენიმე კვირის წინ ნათქვამი, რომ პროცესი ევროპულმა საბჭომ შეაჩერა და არა საქართველოს ხელისუფლებამ.