მე ვარ მიკერძოებული ეროვნული ინტერესების დაცვის საკითხში და ვერასოდეს დავდგები მათ მხარეს, ვისთვისაც ამ ქვეყანას დასავლეთიდან გადმორიცხული გრანტის ფასი აქვს - ირაკლი ჩიხლაძის მონოლოგი

ამ ქვეყანაში საინფორმაციო დღის წესრიგის ქმნის ერთადერთი არხი და ეს არხი არის ქართველი ხალხის იმედი, სწორედ ამიტომ ვართ განსაკუთრებული თავდასხმის ეპიცენტრში, ყველამ ზუსტად იცით, რომ თუ არ გამორთავთ „იმედს“ ისე, როგორც ეს 2007 წელს გააკეთეთ, სხვაგვარად ,,მეორე ფრონტის“ პოლიტიკა და საქართველოს უკრაინიზაცია ვერ მოხდება, - განაცხადა „იმედის კვირის“ წამყვანმა, ტელეკომპანია „იმედის“ გენერალური დირექტორის მოადგილემ, ირაკლი ჩიხლაძემ „იმედის კვირის“ წლის შემაჯამებელ გადაცემაში.

მან ვრცლად მიმოიხილა ის ამბები, რომლითაც მიმდინარე წელი მნიშვნელოვანი იყო ტელეკომპანიისთვის და ქვეყნისთვის.

„2025 წელი წარმატებული იყო „ტელეიმედისთვის“. ტრადიციულად, წლის ბოლო ეთერს გავხსნი ჩემი მონოლოგით, რომლის მთავარი ადრესატი არის „იმედი“ და ჩვენი არხის უალტერნატივო ძალა - მისი უდიდებულესობა, ტელემაყურებელი.

დავიწყებ მადლიერებით, რადგან ის, რომ დღეს თამამად შემიძლია ვთქვა: ქართულ სატელევიზიო სივრცეში ისევ უპირობო ლიდერები ვართ და ყველა სხვა ტელეკომპანიის ერთად აღებულ რეიტინგს სამჯერ ვუსწრებთ, ეს არის მხოლოდ და მხოლოდ თქვენი ნდობისა და „იმედელების“ დაუღალავი შრომის შედეგი.

რა თქმა უნდა, ყველასთვის მოსაწონი ვერ ვიქნებით, ყველას აზრსა და პოზიციას ვერ გავიზიარებთ, მაგრამ ჩვენ თანხვედრაში ვართ საქართველოსთან, ჩვენს სამშობლოსთან, ამ ქვეყნის უდიდესი უმრავლესობის ინტერესებთან. დიახ, ჩვენ ვართ მიკერძოებულები - არა ვინმეს, არამედ ჩემი და თქვენი ქვეყნის სასარგებლოდ.

მე ვარ მიკერძოებული ეროვნული ინტერესების დაცვის საკითხში და ვერასოდეს დავდგები მათ მხარეს, ვისთვისაც ამ ქვეყანას დასავლეთიდან გადმორიცხული გრანტის ფასი აქვს; ვერც მათ გვერდით დავდგებით, ვისთვისაც მშვიდობაზე უფრო ძვირფასი ომი და „მეორე ფრონტია“; ვერც მათთან გამოვნახავთ საერთო ენას, ვინც მედიის სახელს ამოფარებული, ე.წ. კოლეგები, უცხო ქვეყნის სპეცსამსახურების დავალებით აფინანსებენ და აკეთებენ ისეთ სტატიებს, რომლებიც ჩვენი ქვეყნის ინტერესებს ეწინააღმდეგება. ორიენტირებული არიან, აგრესია გააღვივონ საზოგადოებაში. რა თქმა უნდა, წითელი ხაზია საპატრიარქოსა და უწმინდესის შეურაცხყოფა.

ვინც გვებრძვით და ჩვენი დისკრედიტაციით ხართ დაკავებულნი (საბედნიეროდ, ძალიან ცოტანი ხართ), იქნებ, დადგა დრო და დაგიფიქრდეთ, რატომ არის „ტელეიმედი“ უკონკურენტო და რატომ სარგებლობს საზოგადოების მაღალი ნდობით? ნდობას ხომ საერთაშორისო კვლევითი ორგანიზაციებიც ადგენენ? - ვერ იტყვით, რომ ეს მე გამოვიგონე. პასუხი ძალიან მარტივია: ტელეკომპანია „იმედის“ თითოეულ ჟურნალისტს, პროდიუსერს, ოპერატორს, ყველას, ვინც აქ მუშაობს, აქვს უმაღლესი მორალური სტანდარტი, ღირსება, რომელსაც არაფრის ფასად არ დაკარგავს; აქვს ინტელექტი და შესაბამისი კომპეტენცია, რომ მაყურებელს მიაწოდოს თავისი ქვეყნის უახლესი რეალური ამბები. ჩვენ არ ვკარგავთ დროს თქვენთან იაფფასიან ფეისბუქ-დისკუსიებში, არც პოსტებს ვაქვეყნებთ ჩვენი მხარდამჭერების მოსახიბლად, ეს არ გვჭირდება - ჩვენ ჩვენი საქმით ვემსახურებით „იმედს“, საზოგადოებას და საქართველოს.

თქვენ კი მაყურებელს გასული წლების მსგავსად ისევ მხოლოდ შეკვეთილი, გამოგონილი, საქართველოს საწინააღმდეგო ნეგატივზე ორიენტირებული ინფორმაციით კვებავთ, უფრო სწორად, ამის მცდელობა გაქვთ. თუმცა, რეიტინგები და ციფრები ცხადყოფს, რომ თქვენი გავლენა საზოგადოებაზე, თითქმის ნულის ტოლია, ისევე როგორც თქვენი დამფინანსებელი რადიკალური ოპოზიციის და მათი გარე პატრონების.

ამ ქვეყანაში საინფორმაციო დღის წესრიგის ქმნის ერთადერთი არხი და ეს არხი არის ქართველი ხალხის იმედი, სწორედ ამიტომ ვართ განსაკუთრებული თავდასხმის ეპიცენტრში, ყველამ ზუსტად იცით, რომ თუ არ გამორთავთ „იმედს“ ისე, როგორც ეს 2007 წელს გააკეთეთ, სხვაგვარად ,,მეორე ფრონტის“ პოლიტიკა და საქართველოს უკრაინიზაცია ვერ მოხდება - ვერ დააჯერებთ ადამიანებს, რომ ეს აუცილებელია.

საბედნიეროდ, „ნაცმოძრაობის“ რეჟიმისგან განსხვავებით დღეს ამ ქვეყანას მართავს ძალა, რომელიც იცავს მედიას (მედიაში ყველას ვგულისხმობ, ყველაზე მიკერძოებულ პლატფორმასაც კი) და თქვენც კი იცით, რომ ყველაზე მრავალფეროვანი და თავისუფალი მედიაგარემო არის საქართველოში - ევროპის უამრავ ქვეყანასაც რომ შეშურდება აი, ისეთი. ნუ ვიკამათებთ მზია ამაღლობელზე! თქვენ ჩემზე უკეთ იცით, რა ხდება მის საქმესთან დაკავშირებით“, - განაცხადა ჩიხლაძემ.

მისივე თქმით, 2025 წელს ისტორიული მნიშვნელობა ჰქონდა „იმედის“ სოციალური მედიისთვის - „იმედის“ იუთუბარხმა ოქროს ღილაკი მიიღო, რაც ნიშნავს, რომ არხს მილიონზე მეტი გამომწერი ჰყავს.

„ჩვენ ვართ პირველი ტელეკომპანია საქართველოში, რომელსაც ეს პატივი ერგო და ესეც, რა თქმა უნდა, ჩვენი გუნდის დაუღალავი შრომის და ჩვენი მაყურებლის დამსახურებაა. გამოწვევები ბევრია. რთულ დროში გვიწევს იმ საქმის კეთება, რომელიც ჩვენი ცხოვრების ნაწილია. ერთ-ერთი ყველაზე დიდი გამოწვევა ყალბი ამბებია, რომელთა წინააღმდეგ ბრძოლას ვაგრძელებთ. ტექნოლოგიების საუკუნეში ეს ყოველდღიურად უფრო და უფრო რთულდება, თუმცა სანამ თქვენ უყურებთ „იმედს“, გპირდებით, ფეიკამბების მსხვერპლი არ გახდებით.

რა თქმა უნდა, ახლა ყველაფერს ერთ მონოლოგში ვერ ჩავატევ, მაგრამ როგორი ბრძოლა და რა მასშტაბის შრომა უწევს ამ არხის თითოეულ თანამშრომელს, ვფიქრობ, იცით ყველამ და უნდა ვთქვა, რომ ეს არის გმირობის ტოლფასი და თუ შენი საქმე და შენი ქვეყანა არ გიყვარს, მხოლოდ ხელფასის გამო ამას არ და ვერ გააკეთებ. ისევე როგორც მე, ამ არხის ყველა თანამშრომელს, გვეამაყება ის ლოგო, რომლის ქვეშაც ვმაუწყებლობთ და მორალისტებს გულწრფელად გეუბნებით - იქნებ, დაისვენოთ?! შეუძლებელია, რეპუტაციულად შელახულებმა სიტყვებით რაიმე გავლენა მოახდინოთ ჩვენზე“, - აღნიშნა ჩიხლაძემ.

მან მადლობა გადაუხადა „იმედის“ მაყურებელს მხარდაჭერისთვის და საახალწლოდ დაგეგმილ გადაცემებზეც ისაუბრა.

„მის უდიდებულესობა მაყურებელს კი ვუხდი უდიდეს მადლობას იმ მხარდაჭერისთვის, რომელსაც ყოველდღიურად ვგრძნობთ და რომელიც განსაზღვრავს უკეთესი ხვალინდელი დღის იმედს. აქვე ვისარგებლებ შემთხვევით და გეტყვით რომ „იმედი“ განსაკუთრებულად ემზადება საახალწლო დღეებისთვის. ყველა რედაქცია მუშაობის 24-საათიან რეჟიმზეა გადასული. პირველი წელია, როდესაც რეპორტაჟს არ ვამზადებთ საახალწლო კონცერტებსა და პროგრამებზე და მინდა, მოკლედ ვთქვა, რომ ვიდრე პოლიტიკურ წელს შევაჯამებ და გასულ წელს დეტალურად განვიხილავ, მოკლედ გეტყვით, რა გელოდებათ ახალი წლის დღეებში თქვენს არხზე.

31 დეკემბერს, 21:00 საათზე, იწყება „ცეკვავენ ვარსკვლავების“ მე-14 სეზონი - ქართული ნაციონალური ცეკვების ოსტატები და სამეჯლისო ცეკვების მოცეკვავეები ერთად წარდგებიან თქვენს წინაშე. ეს იქნება დაუვიწყარი სანახაობა, ექსპერიმენტი, რომელიც ამ პროექტის ისტორიაში გაბედა მხოლოდ „იმედმა“.

31 დეკემბრის ღამეს, როცა საათი თორმეტს გვიჩვენებს, ტრადიციულად დაიწყება ცენტრალური საახალწლო კონცერტი - ნამდვილი ვარსკვლავთცვენა გელოდებათ.

პოლიტიკაში ვინ ვინ არის - ამას ცოტა ხანში გეტყვით. ხოლო 1 იანვარს ნახეთ ბოლო დროის ყველაზე რეიტინგული მეგა-შოუს „ვინ ვინ არის“ მეხუთე სეზონის ფინალი - წარმოუდგენელი დასასრულით, ყველა გაოცდებით, როცა გამარჯვებული ნიღაბს მოიხსნის.

2 იანვარიც დატვირთულია საახალწლო პროგრამებით - ჭეშმარიტად სახალხო და ქართული პროექტი „მიმღერე“, რომელიც „იმედზე“ დაიბადა, სპეციალური შემადგენლობით ბრუნდება. ყველა სეზონის მონაწილე ერთად იკრიბება 2 იანვარს, 22:00 საათზე.

ასევე, მოინიშნეთ სატელევიზიო კალენდარში 3 იანვარიც - „ქართული ხმების“ კონცერტი, დაიწყება 23:00 საათზე და მიეძღვნება ლეგენდარულ პირველ თაობას.

რაც მთავარია, 31 დეკემბერს, 20:00 საათზე, არ გამოტოვოთ „ქრონიკა“, რომელიც შეაჯამებს წელს და წარმოგიდგენთ ძალიან საინტერესო თვალით დანახულ საინფორმაციო ველს.

ახლა ნამდვილად დადგა დრო დავიწყოთ ჩვენი გადაცემის ძირითადი ნაწილი. დიდი ეთერი გელოდებათ, მაგრამ სრულ და ამომწურავ ინფორმაციას მიიღებთ როგორც საშინაო, ისე საგარეო პოლიტიკაზე“, - განაცხადა ჩიხლაძემ.