ეკა სეფაშვილი ევროპელი ლიდერების შეცვლილ რიტორიკაზე რუსეთის მიმართ: რუსეთი თურმე ევროპული ქვეყანაა და თურმე დიალოგიც აუცილებელია

საქართველო კვლავ აგრძელებს პრაგმატულ გზას, რომელიც ნაკარნახევია ცივი გონებით და არა ემოციებით“,- განაცხადა „ხალხის ძალის“ საერთაშორისო ურთიერთობების მდივანმა ეკა სეფაშვილმა ჟურნალისტებთან საუბრისას, როდესაც კომენტარი გააკეთა ევროპელი ლიდერების განცხადებებზე რუსეთის ევროპულობასა და მასთან დიალოგის აუცილებლობის შესახებ.

ეკა სეფაშვილმა ხაზი გაუსვა, რომ მაშინ, როდესაც საქართველოს რუსეთთან ორმხრივ დონეზე სანქციების დაწესებას სთხოვდნენ, საქართველომ თავი შეიკავა და ამისთვის არსებობდა კონკრეტული მიზეზები.

„ჩვენ ამაზე მტკიცე უარი განვაცხადეთ და შეგახსენებთ, რომ ამან ქვეყნის შიგნით დიდი მღელვარება გამოიწვია. თუმცა რამდენიმე დღეში მმართველმა პარტიამ დეტალურად განმარტა, რას ნიშნავდა რუსეთისთვის ორმხრივი სანქციების დაწესება საქართველოს მოქალაქეებისთვის: ეს იქნებოდა ჩვენი ეკონომიკისთვის უკიდურესად მძიმე დარტყმა — მინუს 18%-იანი ვარდნა, მაშინ როდესაც რუსეთის ეკონომიკაზე ეს პრაქტიკულად არანაირ გავლენას არ მოახდენდა.

ანუ, საქართველოს რომ დაეწესებინა რუსეთისთვის ორმხრივი სანქციები, რუსეთი ამას საერთოდ ვერ იგრძნობდა, ჩვენ კი მივიღებდით მინუს 18%-იან ეკონომიკურ ვარდნას. შედარებისთვის — კოვიდის პერიოდში ეკონომიკის ვარდნა მინუს 6% იყო. წარმოიდგინეთ, სამჯერ უფრო მძიმე შედეგს მივიღებდით“, — განაცხადა ეკა სეფაშვილმა.

მისივე თქმით, იმ პერიოდში ევროკავშირი საქართველოს მკაცრად აკრიტიკებდა.

„გვაკრიტიკებდნენ მაშინაც, როდესაც რუსეთმა ცალმხრივად აღადგინა პირდაპირი ფრენები საქართველოსთან. გვადანაშაულებდნენ, თითქოს რუსულ პოლიტიკას ვატარებდით და ა.შ. სინამდვილეში, ჩვენი პოლიტიკა პირველ რიგში მიმართული იყო საკუთარი მოსახლეობის ინტერესებისა და მათი დაცვისკენ“, — აღნიშნა სეფაშვილმა.

დღეს კი, მისი შეფასებით, ევროპელი ლიდერების რიტორიკა რადიკალურად შეცვლილია.

„ახლა რას ვხედავთ? ევროპული ბიუროკრატია საკმაოდ კომიკურ ვითარებაში აღმოჩნდა. მაშინ, როცა ჩვენ ორმხრივი ვაჭრობის გამო გვამუნათებდნენ, თავად ჩუმად აგრძელებდნენ რუსეთთან ვაჭრობას — ნავთობით, ფარმაცევტული პროდუქციით, ღვინითა და ალმასებით.

გამოიკვეთა, რომ რუსეთის წინააღმდეგ მიღებულმა სანქციების პაკეტებმა, მიუხედავად იმისა, რომ დიდი ეკონომიკის მქონე ქვეყნებმა მიიღეს, რუსეთის ეკონომიკაზე სერიოზული გავლენა ვერ მოახდინა. დღეს, სამი წლის შემდეგ, თავადვე მიხვდნენ, რომ ეს სანქციები პირველ რიგში მათ საკუთარ ეკონომიკებს აზიანებს.

შედეგად, აღმოჩნდნენ აბსურდულ მდგომარეობაში და ახლა უკვე თავად საუბრობენ დიალოგის აუცილებლობაზე. თავიდან რომ სახელმწიფოებრივი სიმტკიცე გამოეჩინათ, ეზრუნათ საკუთარ ხალხზე და არ აჰყოლოდნენ გლობალური აქტორების პოლიტიკურ რიტორიკას, ეს სამი წელი, რომელიც მძიმე ეკონომიკურ შედეგებად დაუბრუნდათ, საერთოდ არ იარსებებდა.

დღეს კი ვხედავთ მათი რიტორიკის სრულ საპირისპიროს — თურმე რუსეთი ევროპული ქვეყანაა და თურმე დიალოგი აუცილებელია! აქამდე დემოკრატია არ უნდოდათ? აქამდე დიალოგი არ იყო საჭირო?“ - განაცხადა ეკა სეფაშვილმა.