ჯონ ლაფლენდი: თუ შენ ხარ ლიდერი შენი ქვეყნის, იღვწი შენი ქვეყნის სახელით, თუ სატელეფონო კომუნიკაციებს არ მიჰყიდი BLACKROCK-ს, თუ NATO-ს პოლიტიკას არ მიყვები, შენ დიდი ალბათობით ადამიანის უფლებების დარღვევაში დაგდებენ ბრალს

ადამიანის უფლებებზე ბევრი მაქვს ნამუშევარი 90-იანი წლების მიწურულს და 2000-იანი წლების დასაწყისში, მქონდა ჩემს მეგობრებთან ერთად მცირე NGO, ერთგვარი დისიდენტური მიმართულებისა. ამ საქმიანობისას არაერთხელ წავაწყდით, განსაკუთრებით ყოფილი საბჭოთა კავშირის სახელმწიფოებში, მათ შორის საქართველოშიც - ედუარდ შევარდნაძისა და ეგრეთწოდებული ვარდების რევოლუციის შემდგომ პერიოდზე მაქვს საუბარი - თუ როგორ ხდებოდა ადამიანის უფლებათა პოლიტიკური ინსტრუმენტალიზაცია, - განაცხადა გადაცემაში „თბილისის დროით“ დემოკრატიისა და თანამშრომლობის ინსტიტუტის კვლევითი პროგრამების დირექტორმა, ფილოსოფიის დოქტორმა ჯონ ლაფლენდმა.

მან ამგვარად უპასუხა გადაცემის წამყვანის, იან პრაუდის კითხვას, ორმაგი სტანდარტის შესახებ, როლითაც პრაუდის თქმით, „ევროპელი ლიდერები გაუთავებლად ჭკუას ასწავლიან საქართველოს და სხვებს, დემოკრატიაზე, ადამიანის უფლებებზე, წუხან დემოკრატიულ უკუსვლაზე. ამავე დროს კი ბევრს ვერაფერს უბედავენ დონალდ ტრამპს“. „სახეზეა ორმაგი სტანდარტი, როგორ ვერ ხედავენ ამას ბრიუსელში?“ - მიმართა მან რესპონდენტს.

ლაფლენდის თქმით, თუ „შენ ხარ ლიდერი შენი ქვეყნის, იღვწი შენი ქვეყნის სახელით, იქნება ეს ალბანეთში, სლოვაკეთში თუ საქართველოში, თუ სატელეფონო კომუნიკაციებს არ მიჰყიდი BLACKROCK - ს, თუ NATO-ს პოლიტიკას არ მიყვები, შენ დიდი ალბათობით ადამიანის უფლებების დარღვევაში დაგდებენ ბრალს“.

„თუკი შენ შენს ენერგო რესურსებს და ბევრ სხვა რამეს მიჰყიდი დასავლელ ინვესტორებს იაფად, მაშინ ადამიანის უფლებათა დაცვის ჩემპიონი ხარ. შეიძლება მარტივ და პროვოკაციულ ენაზე ვსაუბრობ, მაგრამ ეს სწორედ ისაა, რის შესახებაც მრავალი წელი ვწერდი და ამ ყველაფერს დოკუმენტურად აღვწერდი. სირცხვილია, თუ როგორ ხდება ადამიანის უფლებათა დაცვის გამოყენება.

ახლა კი, როდესაც ვახსენებთ გრენლანდიის გარშემო არსებულ ვითარებას, ევროპა არა მხოლოდ ვერ ბედავს დაპირისპირებას, ის არამხოლოდ სუსტია, ევროპა დაშამათებულია. ევროპამ უარი თქვა იაფ რუსულ ენერგორესურსებზე და ახლა როგორც ბრიტანული პრესაც ადასტურებს, ევროკავშირი სრულად დამოკიდებულია ამერიკის შეერთებულ შტატებზე და მის გაცილებით უფრო ძვირ რესურსებზე.

როგორც დონალდ ტრამპმა ზელენსკის განუცხადა ოვალურ კაბინეტში, რომ უკრაინელს სვლები აღარ დარჩა, ზუსტად იმავე ვითარებაშია ევროკავშირიც. ევროპა კუთხეშია მომწყვდეული. ევროპის სტრატეგიული კატასტროფა ენით აღუწერელია. ჩვენ რამდენიმე თაობის განმავლობაში გვექნება სირცხვილის საუკუნე. ეს გახლავთ ევროპელი ლიდერების მიერ არასწორი გადაწყვეტილებების მიღების შედეგი“, - აღნიშნა ჯონ ლაფლენდმა.