რატი იონათამიშვილი: ძალიან კარგად გამოჩნდა, რომ ე.წ. ბალტიისპირეთის ქვეყნები იქნება თუ სხვა, მათ არ აქვთ არანაირი არგუმენტი - ჩვენ დასაბუთებით შეგვიძლია, ნებისმიერ საკითხზე ვისაუბროთ და ჟენევის ფორმატმა ეს გამოაჩინა

მათი სურვილები და მოთხოვნები იყო: ისევ და ისევ, გავაუქმოთ ოჯახური ღირებულებებისა და არასრულწლოვანთა დაცვის შესახებ კანონი; „ხავერდოვნად გადავაბაროთ“ ხელისუფლება იმათ, ვინც მათ მოსწონთ და ასე შემდეგ. დაახლოებით, ასეთი არარელევანტური პოზიციები მოვისმინეთ, - განაცხადა „დღის ქრონიკაში“ ჟენევაში გამართულ შეხვედრაზე საუბრისას ადამიანის უფლებათა დაცვისა და სამოქალაქო ინტეგრაციის საპარლამენტო კომიტეტის თავმჯდომარემ, რატი იონათამიშვილმა.

მან ისაუბრა იმ მოთხოვნებზე, რომელიც საქართველოს მიმართ ზოგიერთი ქვეყნის წარმომადგენელს გააჩნია ადამიანის უფლებების დაცვაზე საუბრისას. იონათამიშვილმა აღნიშნა, რომ ქართულმა მხარემ ჟენევის ფორმატში დასმულ თითოეულ კითხვას ამომწურავი პასუხი გასცა.

„ძალიან კარგად გამოჩნდა ერთი რამ: აი, ის ქვეყნები, რომელთაც დაკარგული აქვთ სუვერენიტეტი და სხვისი აზრებით გამოდიან, ჩვენ ვნახეთ, მათი გამოსვლები როგორიც იყო. ამავდროულად, ნებისმიერი ის ქვეყანა, რომელსაც გულწრფელად და ობიექტურად აინტერესებს ადამიანის უფლებების დაცვა, ის პოზიციურად აფასებდა ჩვენს ქვეყანას და იმ საქმიანობას, რომელიც ჩვენს ქვეყანას ამ მიმართულებით აქვს.

აქედან გამომდინარე, კიდევ ერთხელ ძალიან კარგად გამოჩნდა, რომ ე.წ. ბალტიისპირეთის ქვეყნები იქნებოდნენ თუ სხვა, საიდანაც, როგორც წესი, გვესმის ხოლმე ასეთი კითხვები, მათ არ აქვთ არანაირი არგუმენტი. ჩვენ ყველა არგუმენტში ვართ ძალიან ძლიერები. ჩვენ დასაბუთებით შეგვიძლია ნებისმიერ პლატფორმაზე, ნებისმიერ საკითხზე ვისაუბროთ და ჟენევის ფორმატმა სწორედ ეს გამოაჩინა.

მათი სურვილები და მოთხოვნები იყო - ისევ და ისევ, გავაუქმოთ ოჯახური ღირებულებებისა და არასრულწლოვანთა დაცვის შესახებ კანონი; „ხავერდოვნად გადავაბაროთ“ ხელისუფლება იმათ, ვინც მათ მოსწონთ და ასე შემდეგ. დაახლოებით, ასეთი არარელევანტური პოზიციები მოვისმინეთ მათი მხრიდან, მაგრამ ჩვენ თითოეულ კითხვას გავეცით ამომწურავი პასუხი.

ვფიქრობ, ვინც ამ დისკუსიას ადევნებდა თვალს, ნებისმიერი ამაში დარწმუნდებოდა. ჩვენ ღიად და არგუმენტირებულად ვისაუბრეთ, რომ ადამიანის უფლებების დაცვა წლიდან წლამდე ძლიერდება ჩვენს ქვეყანაში ნებისმიერი მიმართულებით. ამას კონკრეტული როგორც საერთაშორისო ობიექტური და ავტორიტეტული კვლევები და ინდექსები აფუძნებს, ასვე კონკრეტული კანონშემოქმედებითი თუ სხვა პროცესებითაა ჩვენს ქვეყანაში უზრუნველყოფილი. მეორე მხარის მიერ, ცხადია, იქ არანაირი არგუმენტები არ გაჟღერებულა. შესაბამისად, ისეთი რეკომენდაციები, რომელიც წინააღმდეგობაში მოვა ჩვენი ქვეყნის სუვერენიტეტთან, ეროვნულ ამოცანებთან და ინტერესებთან, ვერ იქნება გაზიარებული“, - განაცხადა იონათამიშვილმა.

ჟენევაში, გაერო-ს ადამიანის უფლებების საბჭოს უნივერსალური პერიოდული მიმოხილვის (UPR) მე-4 ციკლის ფარგლებში, საქართველოში ადამიანის უფლებების დაცვის მდგომარეობის შესახებ 2025 წლის ეროვნული ანგარიშის განხილვაში რატი იონათამიშვილი მონაწილეობდა.