პრეზიდენტი: სასწაულია, რომ ფინალურ ეტაპზე გადავიდა ჩვენი ქვეყანა, უკან მოიტოვა ჩინეთი, სამხრეთ კორეა, საფრანგეთი, პოლონეთი, ბრიტანეთი - რა რესურსის ქვეყნები და მათ შორის წარმოდგენილია პატარა, მაგრამ ძლიერი სპორტსმენებით ჩვენი ქვეყანა

მართლა სასწაულია, რომ ფინალურ ეტაპზე გადავიდა ჩვენი ქვეყანა და უკან მოიტოვა ჩინეთი, სამხრეთ კორეა, საფრანგეთი, პოლონეთი, ბრიტანეთი. რა ქვეყნები, რა შესაძლებლობების, რა რესურსის და ამ ქვეყნებს შორის წარმოდგენილია პატარა, მაგრამ ამბიციური და ძლიერი სპორტსმენებით ჩვენი ქვეყანა. ამაზე დიდი ბედნიერება რა არის?!, - განაცხადა გადაცემაში „იმედის კვირა“ საქართველოს პრეზიდენტმა, მიხეილ ყაველაშვილმა ზამთრის XXV ოლიმპიურ თამაშებზე საუბრისას.

როგორც პრეზიდენტმა აღნიშნა, საქართველოს ხუთეულში მოხვედრა იყო ისტორიული შედეგის დაფიქსირება.

„თითქმის ყველა ლიდერი ესწრებოდა ამ ღონისძიებას, პირველ სპორტულ შეჯიბრებას ჩვენი სპორტსმენების მონაწილეობით და ალბათ ყველა ვხედავთ, იქ 10 ქვეყანა იყო წარმოდგენილი მხოლოდ, ვინც ზამთრის ოლიმპიურ თამაშებში იღებდა მონაწილეობას, ვინც მიიღო ეს ლიცენზია. ხომ წარმოგიდგენიათ მთელს მსოფლიოში ამ დიდ ქვეყნებთან როგორ გამორჩეულად ფრიალებდა ჩვენი დროშა, 10 დიდ ქვეყანაში წარმოდგენილი ეს პატარა ქვეყანა და ეს იყო ყველაზე დიდი გადადგმული ნაბიჯი, როცა ჩვენ შევძელით და ხუთეულში [მოვხვდით], ეს იყო ისტორიული შედეგის დაფიქსირება, როცა სხვა სახეობებში, ეს არის ერთ-ერთი დიდი შედეგის მიღწევა და მინდა ჩვენმა საზოგადოებამ კარგად გაიგოს, რომ ათ ქვეყანას როცა ჩამოთვლი და იმ 10 ქვეყანაში შენი გუნდი შეძლებს, რომ მოხვდეს პირველ ხუთეულში, ეს იყო საოცრება“, - განაცხადა მიხეილ ყაველაშვილმა.

მისივე თქმით, ქართველი სპორტსმენები კონკურენტუნარიანნი და საამაყონი არიან.

„ეს ხომ ოლიმპიადაა, იქ ესწრები და როცა შენი ქვეყანა ასე პოზიციონირებს და შემდეგ ყველა ამას აღნიშნავდა, ეს ცალკე რიტუალია, როცა გილოცავენ და როცა ხედავენ საქართველო ესეთ დიდ წარმატებას აღწევს. ეს არის ბედნიერება და ეს არის ჩვენი გაერთიანების პირდაპირი, ემოციური მნიშვნელობის შესაძლებლობა, რომ ამით ვიამაყოთ და ვამაყობთ კიდეც. იმიტომაც გვაქვს ეს დამოკიდებულება სპორტის განვითარებასთან დაკავშირებით, რომ ჩვენ სპორტსმენებს ყველა პირობა შევუქმნათ იმისათვის, რომ მათ მაღალ დონეზე იასპარეზონ. ისინი არავის ჩამოუვარდებიან და მართლაც თითით საჩვენებელია, შეიძლება ვერც დამისახელოთ სხვა ქვეყანა, როცა ამდენ სახეობაში შენ გყავს კონკურენტუნარიანი სპორტსმენები და გუნდები, რომ ყველასთვის ანგარიშგასაწევი ძალა იყოს“, - აღნიშნა საქართველოს პრეზიდენტმა.