ლევან მაჭავარიანი ევროკომისიის კვლევაზე: ამ შემთხვევაში ქალბატონმა ურსულა ფონ დერ ლაიენმა ალბათ, რუკას დახედა და გაიაზრა, რომ გეოგრაფიას ვერ შეცვლის - როგორც ჩვენ გვჭირდება ევროკავშირი, არანაკლებ სჭირდება ევროკავშირს საქართველო

ამ შემთხვევაში ქალბატონმა ურსულა ფონ დერ ლაიენმა ალბათ, რუკას დახედა და გაიაზრა, რომ გეოგრაფიას ვერ შეცვლის, - განაცხადა გადაცემაში „იმედი LIVE“ საპარლამენტო ფრაქცია „ქართული ოცნების“ თავმჯდომარის პირველმა მოადგილემ, ლევან მაჭავარიანმა ევროკომისიის კვლევის შეფასებისას, რომელიც ქვეყნის და მთლიანად რეგიონის სატრანსპორტო პოტენციალს ეხება.

მისივე თქმით, როგორც ჩვენ გვჭირდება ევროკავშირი, არანაკლებ სჭირდება ევროკავშირს საქართველო და აღნიშნულმა დასკვნამ ეს გამოავლინა.

„ჩვენ ყოველთვის ვსაუბრობთ, რომ ურთიერთობები ევროკავშირთან აუცილებლად გადაიტვირთება, მხოლოდ ან ერთი წინაპირობა უნდა იყოს, ან მეორე - ან ეს ბიუროკრატები უნდა შეეგუონ იმას, რომ საქართველოს სახით მათ ვასალი არ ეყოლებათ და აგენტურასაც ვერ მოიყვანენ რევოლუციის გზით საქართველოში და დასხდნენ და ჩვენ გვესაუბრონ. ხშირად ვამბობ-ხოლმე ამ ფრაზას, რომ როგორც ჩვენ გვჭირდება ევროკავშირი, არანაკლებ სჭირდება ევროკავშირს საქართველო და ამ დასკვნამ ეს ყველაფერი გამოაჩინა.

ან მეორე წინაპირობა უნდა იყოს, რომ თუ ისინი ვერ შეეგუებიან, რომ ვერ ჩაანაცვლებენ „ქართულ ოცნებას“ ვერც არჩევნების გზით და ვერც რევოლუციის გზით, მაგ შემთხვევაში, როდესაც წავლენ ეს ევრობიუროკრატბი და სხვები მოვლენ, ამის ნიშნები არის, ევროპელმა ხალხმა გამოღვიძება დაიწყო - ჩეხეთში ცვლილებები მოხდა და ნელ-ნელა ეროვნული ძალები იკრებენ რეიტინგს. ასეთ შემთხვევაში ამ გზას უნდა დაველოდოთ და 2030 წლამდე, როდესაც გაფართოება არის დაანონსებული, არჩევნები უნდა იყოს ევროპარლამენტის - მანამდე იქ ბევრი რამ მოხდება და ჩვენ დარწმუნებული ვართ, ეს ევრობიუროკრატია შეიცვლება და ყველაზე მომზადებული ვიქნებით დანარჩენ კანდიდატ ქვეყნებს შორის იქიდან გამომდინარე, რომ ყველა პარამეტრი და მოცემულობა ამაზე მეტყველებს“, - განაცხადა მაჭავარიანმა.

მისივე თქმით, ევროკომისიის აღნიშნული კვლევა ოფიციალური დასკვნაა და იგი ევრობიუროკრატებისა და მმართველი კლასის გარეშე ვერ შემუშავდებოდა.

„ამ დასკვნაში მკაფიოდ არის გამოხატული საქართველოს როლი, ჩვენი უნიკალური ადგილმდებარეობიდან გამომდინარე და მკაფიოდ არის განსაზღვრული, თუ რაში სჭირდება ევროკავშირს საქართველოსთან მჭიდრო პარტნიორობა. ისინი ძალიან მსხვილ სავაჭრო ურთიერთობებში არიან შუა აზიასთან, ჩინეთთან და ასე შემდეგ და იაზრებენ, რომ ეს არის ძალიან მნიშვნელოვანი მარშრუტი და როგორც იქნა თქვეს, რომ ამ მარშრუტში საკვანძო ადგილს სწორედ საქართველო თამაშობს“, - აღნიშნა მაჭავარიანმა.

ევროკომისიის სახელწოდებით - Advancing a Cross-Regional Connectivity Agenda („რეგიონთაშორისი კავშირების განვითარების დღის წესრიგი“), კვლევას აქვეყნებს. „ტრანსკასპიური სატრანსპორტო დერეფანი სასურველიდან სტრატეგიულად აუცილებელ მარშრუტად იქცა, რაც გეოპოლიტიკურ ცვლილებებსა და „ჩრდილოეთის დერეფნის“ მოწყვლადობას ასახავს“, - აღნიშნულია კვლევაში.