საგარეო ურთიერთობათა კომიტეტმა მუდმივმოქმედი დელეგაციების საქმიანობის ანგარიშები მოისმინა

საგარეო ურთიერთობათა კომიტეტის სხდომაზე საქართველოს პარლამენტის მუდმივმოქმედი დელეგაციების მიერ 2025 წელს გაწეული საქმიანობის შესახებ ანგარიშები მოისმინეს.

კომიტეტის თავმჯდომარემ, ეუთო-ს საპარლამენტო ასამბლეაში (OSCE PA) საქართველოს პარლამენტის მუდმივმოქმედი დელეგაციის ხელმძღვანელმა ნიკოლოზ სამხარაძემ კოლეგებს ეუთო-ს საპარლამენტო ასამბლეაში საქართველოს პარლამენტის დელეგაციის ანგარიში წარუდგინა.

როგორც მომხსენებელმა განმარტა, საანგარიშო პერიოდში დელეგაციამ მონაწილეობა მიიღო ზამთრისა და საშემოდგომო სხდომებში, ყოველწლიურ სესიაში და ასევე, ეუთო-ს საპარლამენტო ასამბლეის ფარგლებში გამართულ სხვადასხვა ღონისძიებებში.

ნიკოლოზ სამხარაძე სიტყვით გამოვიდა ეუთო-ს საპარლამენტო ასამბლეის პოლიტიკურ საქმეთა და უსაფრთხოების კომიტეტის სხდომაზე, რომელიც ავსტრიის დედაქალაქ ვენაში გაიმართა. საქართველოს დელეგაციის ხელმძღვანელმა გერმანელი მომხსენებლის მიერ წარმოდგენილი კომიტეტის სამომავლო ანგარიში გააკრიტიკა, სადაც რუსეთის მიერ განხორციელებულ ოკუპაციებზე საუბრისას, საქართველო არ იყო ნახსენები. ნიკოლოზ სამხარაძემ მომხსენებელს მოუწოდა, რომ ანგარიშში დამატებულიყო რუსეთის მიერ საქართველოს ტერიტორიების ოკუპაცია, რაც საბოლოო ანგარიშში აისახა.

ვიზიტის ფარგლებში ნიკოლოზ სამხარაძე სიტყვით გამოვიდა ეუთო-ს საპარლამენტო ასამბლეის სამი კომიტეტის გაერთიანებულ სესიაზე, სადაც რუსეთის მიერ საქართველოს ტერიტორიების ოკუპაციაზე ისაუბრა და აფხაზეთში ჩატარებული ე.წ. საპრეზიდენტო არჩევნები დაგმო.

საგარეო ურთიერთობათა კომიტეტის თავმჯდომარის ინფორმაციით, სამი კომიტეტის გაერთიანებულ სესიაზე საუბარი შეეხო საქართველოში ჩატარებულ საპარლამენტო არჩევნებს, რომელთან დაკავშირებითაც ანგარიშში აღნიშნულია, რომ არჩევნები საქართველოში პლურალისტურ გარემოში და ახალი ტექნოლოგიების გამოყენებით ჩატარდა.

ნიკოლოზ სამხარაძემ ვენაში ვიზიტის ფარგლებში გამართულ ორმხრივ შეხვედრებზე ისაუბრა. მან ყურადღება ასევე გაამახვილა სლოვენიის რესპუბლიკაში გამართულ ახალგაზრდა პარლამენტართა ქსელის შეხვედრაზე, რომელიც შეეხო ახალგაზრდების საპარლამენტო საქმიანობაში ჩართულობის, ლიდერული უნარების განვითარების და ინსტიტუციური გაძლიერების მიმართულებით სხვადასხვა ქვეყნის გამოცდილებას.

ნიკოლოზ სამხარაძემ ეუთო-ს საპარლამენტო ასამბლეის „სილქ როუდ გრუპ“-ის კონფერენციაში საქართველოს დელეგაციის მონაწილეობაზეც ისაუბრა, რომელიც მდგრადი ეკონომიკური განვითარებისა და ეკოლოგიის საკითებზე გაიმართა.

ვიზიტის ფარგლებში, ნიკოლოზ სამხარაძე მონტენეგროს პარლამენტის თავმჯდომარეს, ანდრია მანდიჩს შეხვდა, სადაც მხარეებმა ევროკავშირში ინტეგრაციაზე და მათ შორის, იმ პრობლემატურ საკითხებზე ისაუბრეს, რომელიც ორ ქვეყანას ამ მიმართულებით აქვს.

საანგარიშო პერიოდში, ნიკოლოზ სამხარაძემ ქალაქ რომში ოფიციალური ვიზიტის ფარგლებში, მონაწილეობა მიიღო ეუთო-ს საპარლამენტო ასამბლეისა და იტალიის რესპუბლიკის პარლამენტის ორგანიზებით ჩატარებულ კონფერენციაში ეუთო-ს რეგიონში ორგანიზებულ დანაშაულთან ბრძოლის თემაზე.

ორდღიანი კონფერენციის ფარგლებში საქართველო შეფასდა ქვეყანად, რომელსაც ტერორიზმის გავლენის ნულოვანი მაჩვენებელი აქვს.

საქართველოს პარლამენტის დელეგაციის ხელმძღვანელმა მონაწილეობა მიიღო პორტუგალიაში, ქალაქ პორტოში გამართულ ეუთო-ს საპარლამენტო ასამბლეის ყოველწლიური სესიაში.

მუდმივმოქმედი დელეგაციის ხელმძღვანელმა საპარლამენტო ასამბლეის ყოველწლიურ ანგარიშში საქართველოს შესახებ დამატებული შესწორებები გააკრიტიკა. ნიკოლოზ სამხარაძის ინიციატივით, ეუთო-ს საპარლამენტო ასამბლეის ყოველწლიურ ანგარიშში საქართველოს ოკუპირებული რეგიონების შესახებ ჩანაწერები დაემატა.

ანგარიშში აისახა ცვლილება, რომლის მიხედვით, ეუთო-ს საპარლამენტო ასამბლეა უარყოფს ნებისმიერ მცდელობას, ლეგიტიმაცია მიანიჭოს საქართველოს ოკუპირებულ რეგიონებში ჩატარებულ არჩევნებს.

ასევე ნიკოლოზ სამხარაძის ინიციატივით, ანგარიშში დაემატა ჩანაწერი, რომელიც მოუწოდებს სირიის ახალ ხელისუფლებას, გააუქმოს როგორც საქართველოს ოკუპირებული რეგიონების - აფხაზეთისა და ცხინვალის რეგიონის, ასევე უკრაინის ტერიტორიების - დონეცკისა და ლუგანსკის ე.წ. „დამოუკიდებლობის“ აღიარება.

საქართველოს პარლამენტის დელეგაციამ მონაწილეობა მიიღო თურქეთის რესპუბლიკაში, ქალაქ სტამბოლში გამართულ ეუთო-ს საპარლამენტო ასამბლეის რიგით 23-ე საშემოდგომო სესიაში.

საქართველოს პარლამენტის დელეგაციამ მონაწილეობა ასევე მიღო ეუთო-ს საპარლამენტო ასამბლეის ეგიდით ორგანიზებულ ყირგიზეთის რესპუბლიკაში გამართულ ვადამდელ საპარლამენტო არჩევნების სადამკვირვებლო მისიაში.

ნიკოლოზ სამხარაძემ კომიტეტის სხდომაზე ასევე წარადგინა ნატო-ს საპარლამენტო ასამბლეაში (NATO PA) საქართველოს პარლამენტის მუდმივმოქმედი დელეგაციის ანგარიში.

მომხსენებლის ინფორმაციით, ასამბლეაში საქართველოს დელეგაციის მთავარი ამოცანა არის ჩვენი ქვეყნის ინტერესების დაცვა, მათ შორის, ნატო-ს საპარლამენტო ასამბლეის რეზოლუციებში იმ ჩანაწერების გაჩენა, რომელიც საქართველოს ტერიტორიულ მთლიანობას, ოკუპაციას და საქართველოს ნატო-ში სამომავლო წევრობას ეხება.

ნიკოლოზ სამხარაძემ ანგარიშის წარდგენისას ყურადღება გაამახვილა ამერიკის შეერთებული შტატების ქალაქ დეიტონში გამართულ საგაზაფხულო სესიაზე და ამ სესიის ფარგლებში გამართულ ორმხრივ შეხვედრებზე.

დელეგაციის ხელმძღვანელმა ასევე ისაუბრა ერევანში ჩატარებულ ასამბლეის „როუზ-როთ“-ის რიგით 108-ე სემინარზე, რომლის მთავარ თემას წარმოადგენდა სამხრეთ კავკასიაში მიმდინარე გეოპოლიტიკური პროცესები და ამ კონტექსტში რეგიონალური ქვეყნების დემოკრატიული განვითარება, უსაფრთხოების გარემო და პოლიტიკურ-ეკონომიკური დინამიკა.

ნიკოლოზ სამხარაძის განცხადებით, საქართველოს დელეგაციამ მონაწილეობა მიიღო სლოვენიის რესპუბლიკის ქალაქ ლიუბლიანაში გამართულ ასამბლეის რიგით 71-ე წლიურ სესიაში, სადაც საქართველოს დელეგაციის წევრებმა ასამბლეის კომიტეტების მიერ მომზადებული ანგარიშებისა და რეზოლუციის განხილვისას რიგი ცვლილებები წარადგინეს, რომლებიც საბოლოო დოკუმენტში აისახა.

დემოკრატიისა და ეკონომიკური განვითარების ორგანიზაციის, სუამ-ის საპარლამენტო ასამბლეაში (GUAM PA) საქართველოს პარლამენტის მუდმივმოქმედი დელეგაციის 2025 წლის ანგარიში, დელეგაციის ხელმძღვანელმა დავით მათიკაშვილმა წარადგინა.

მისი განცხადებით, საანგარიშო პერიოდში, აზერბაიჯანის თავმჯდომარეობით, ვირტუალურ ფორმატში გაიმართა სუამ-ის საპარლამენტო ასამბლეის ყოველწლიური სესიის სამუშაო შეხვედრა.

ასამბლეის დღის წესრიგით გათვალისწინებული თემები იყო სუამ-ის რეგიონში ტერიტორიული მთლიანობისა და სუვერენიტეტის ხელშეუხებლობის დაცვა, ეკონომიკური და ჰუმანიტარული მდგრადობის შენარჩუნება.

დელეგაციის წარმომადგენლებმა მონაწილეობა ასევე მიიღეს საპარლამენტო ასამბლეის კომიტეტების ერთობლივ სხდომასა და ბიუროს სხდომაში, სადაც დასკვნითი დოკუმენტი - ასამბლეის კომუნიკე დაამტკიცეს.

მართლმადიდებლობის საპარლამენტთაშორისო ასამბლეაში (IAO) საქართველოს პარლამენტის მუდმივმოქმედი დელეგაციის ანგარიში სხდომაზე დელეგაციის ხელმძღვანელმა, ირაკლი ქადაგიშვილმა წარადგინა.

მისი ინფორმაციით, დელეგაციამ მონაწილეობა მიიღო მართლმადიდებლობის საპარლამენტთაშორისო ასამბლეის საერთაშორისო სამდივნოს საგაზაფხულო და საშემოდგომო სხდომებში, ასევე, ასამბლეის 32-ე ყოველწლიური გენერალური ასამბლეის სხდომაში.

მომხსენებლის განცხადებით, მართლმადიდებლობის საპარლამენტთაშორისო ასამბლეის (IAO) საერთაშორისო სამდივნოს საგაზაფხულო სხდომა კაიროში გაიმართა.

მომხსენებელმა ისაუბრა ბუქარესტში გამართულ IAO-ს 32-ე ყოველწლიური გენერალური ასამბლეის სხდომაში საქართველოს დელეგაციის მონაწილეობაზე, სადაც განხილვის მთავარ თემას წარმოადგენდა „საპარლამენტო და რელიგიური ინსტიტუტების თანამშრომლობა ხელოვნური ინტელექტის გამოყენების სახელმძღვანელო პრინციპების ჩამოყალიბებაში: IPU-ს მარაქეშის კომუნიკეს მნიშვნელობა“.

მან ყურადღება გაამახვილა იორდანიის ჰაშიმიტურ სამეფოსა და ისრაელში მართლმადიდებლობის საპარლამენტთაშორისო ასამბლეის საერთაშორისო სამდივნოს შემოდგომის სხდომასა და პროგრამით გათვალისწინებულ შეხვედრებსა და ღონისძიებებში საქართველოს დელეგაციის მონაწილეობაზე.

საანგარიშო პერიოდის განმავლობაში, საერთაშორისო სამდივნოს (ბიუროს) შემადგენლობის ახალ წევრად საქართველოს პარლამენტის მუდმივმოქმედი დელეგაციის ხელმძღვანელი ირაკლი ქადაგიშვილი აირჩიეს.

მომხსენებლის განცხადებით, მართლმადიდებლობის საპარლამენტთაშორისო ასამბლეის საერთაშორისო სამდივნოს საგაზაფხულო სხდომა საქართველოში, ქალაქ თბილისში გაიმართება.

შავი ზღვის ეკონომიკური თანამშრომლობის საპარლამენტო ასამბლეაში (PABSEC) საქართველოს მუდმივმოქმედი დელეგაციის წლიური ანგარიში დელეგაციის ხელმძღვანელმა ირაკლი მეზურნიშვილმა წარადგინა.

მისი განცხადებით, PABSEC -ის საპარლამენტო ასამბლეაში საქართველოს დელეგაციამ აქტიური მონაწილეობა მიიღო როგორც კომიტეტების სხდომებში, ასევე, გენერალური ასამბლეის რიგით 65-ე და 66-ე სხდომებში.

ჩრდილოეთ მაკედონიაში, ქალაქ სკოპიეში გამართულ სამართლებრივ საკითხთა და საერთაშორისო თანამშრომლობის კომიტეტის სხდომაზე განხილვის მთავარ თემას „შავი ზღვის რეგიონში ორგანიზებულ დანაშაულთან ბრძოლა“ წარმოადგენდა, სადაც სიტყვით გამოსვლისას, ირაკლი მეზურნიშვილმა ხაზი გაუსვა შინაგან საქმეთა სამინისტროს თანმიმდევრულ და მტკიცე ძალისხმევას, გამოიყენოს ყველა საჭირო რესურსი ორგანიზებული დანაშაულის წინააღმდეგ ეფექტური და ყოვლისმომცველი რეაგირების უზრუნველსაყოფად.

დელეგაციის ხელმძღვანელმა ისაუბრა გენერალური ასამბლეის რიგით 65-ე სხდომაში საპარლამენტო დელეგაციის მონაწილეობაზე, რომელიც აზერბაიჯანის რესპუბლიკაში, ქალაქ ბაქოში გაიმართა. ასევე, ისაუბრა სერბეთის რესპუბლიკაში, ქალაქ ბელგრადში გამართულ ეკონომიკური განვითარების კომიტეტის სხდომაში დელეგაციის მონაწილეობაზე.

ირაკლი მეზურნიშვილის განცხადებით, სამართლებრივ საკითხთა და საერთაშორისო თანამშრომლობის კომიტეტის სხდომა საქართველოში, ქალაქ ბორჯომში გაიმართა, სადაც ხელოვნური ინტელექტის როლსა და მნიშვნელობაზე, ასევე, სამართლებრივ საკითხებსა და არსებულ გამოცდილებაზე ისაუბრეს.

ირაკლი მეზურნიშვილმა ასევე ისაუბრა ბულგარეთის რესპუბლიკის ქალაქ სოფიაში გამართულ გენერალური ასამბლეის რიგით 66-ე სხდომაში საქართველოს პარლამენტის დელეგაციის მონაწილეობაზე, რომელსაც პარლამენტის თავმჯდომარე შალვა პაპუაშვილი ხელმძღვანელობდა.

ირაკლი მეზურნიშვილის ინფორმაციით, გენერალური ასამბლეის დებატების მთავარ თემას წარმოადგენდა: „თანამშრომლობა ევროკავშირთან და სხვა საერთაშორისო რეგიონულ ორგანიზაციებთან“.

სესიაზე დელეგატებს სიტყვით მიმართა საქართველოს პარლამენტის თავმჯდომარემ და სხდომის დასასრულს, მომდევნო 6 თვის ვადით გადმოიბარა PABSEC-ის თავმჯდომარეობა.

2026 წლის ივნისამდე საქართველო შავი ზღვის ეკონომიკური თანამშრომლობის ორგანიზაციის საპარლამენტო ასამბლეის თავმჯდომარე ქვეყანაა, ხოლო საქართველოს პარლამენტის თავმჯდომარე შალვა პაპუაშვილი კი PABSEC-ის პრეზიდენტი.