ბოჭორიშვილი: ჩვენ აღმოვჩნდით დემოკრატიის დაცვის სახელით განხორციელებული მიზანმიმართული და უსამართლო თავდასხმების წინაშე, რომელიც იყო რეალურად მიმართული ქართველი ხალხის ნების, არჩეული ხელისუფლებისა და სახელმწიფოს წინააღმდეგ

საქართველოს საგარეო საქმეთა მინისტრმა მაკა ბოჭორიშვილმა ბუდაპეშტის გლობალურ დიალოგის მონაწილეებისთვის სიტყვით მიმართვაში საქართველოზე განხორციელებულ თავდასხმებზე გაამახვილა ყურადღება, რომლებიც მინისტრის შეფასებით მიზანმიმართული და უსამართლო იყო.

ბოჭორიშვილმა ასევე ისაუბრა იმის შესახებ, თუ როგორ დაიცვა საქართველომ საკუთარი სუვერენიტეტი დეზინფორმაციული კამპანიების მიუხედავად.

„ბოლო წლებში საქართველო უპრეცედენტო საერთაშორისო ყურადღების ქვეშ მოექცა.

ჩვენ აღმოვჩნდით დემოკრატიის დაცვის სახელით განხორციელებული მიზანმიმართული და უსამართლო თავდასხმების წინაშე, რომელიც იყო რეალურად მიმართული ქართველი ხალხის ნების, მათი არჩეული ხელისუფლებისა და სახელმწიფოს წინააღმდეგ.

ჩვენ ნათლად დავინახეთ, როგორ შეიძლება საერთაშორისო ინსტიტუტები და ჩვენი გულწრფელი ევროპული მისწრაფებები გამოყენებულ იქნეს სუვერენულ სახელმწიფოებზე ზეწოლის ინსტრუმენტად.

ჩვენ ასევე ვიხილეთ, თუ რა მძიმე შედეგები შეიძლება მოიტანოს შიდა საქმეებში საგარეო ჩარევამ და გარე აქტორების მონაწილეობამ ქვეყნის საშინაო პოლიტიკაში. ასეთ დროს საზოგადოების მდგრადობა და სიმწიფე ჩვენი სახელმწიფოებრიობის უმტკიცესი საყრდენია.

მიუხედავად დეზინფორმაციული კამპანიებისა და გარე ზეწოლისა, საქართველო იდგა მტკიცედ. ეროვნულ ინტერესებზე დაფუძნებული პოლიტიკით ჩვენ პასუხისმგებლობით ვიმოქმედეთ, დავიცავით ჩვენი სუვერენიტეტი და უზრუნველვყავით ჩვენი სახელმწიფოს მომავალი.

საქართველოს გამოცდილება ამას ნათლად ადასტურებს.

გეოპოლიტიკურ გზაჯვარედინზე მდებარე, გადაუჭრელი კონფლიქტებისა და მუდმივი გარე ზეწოლის პირობებში, საქართველომ აირჩია სტაბილურობა და არა პროვოკაცია, დიალოგი და არა იზოლაცია, გრძელვადიანი ეროვნული ინტერესი და არა მოკლევადიანი პოლიტიკური სარგებელი.

ეს მიდგომა სისუსტის ნიშანი არ არის. აქ გადარჩენასა და მშვიდობაზეა საუბარი. საქართველოსთვის მშვიდობა არა აბსტრაქტული იდეალი, არამედ სასიცოცხლო აუცილებლობაა.

ჩვენი ტერიტორიის თითქმის 20 პროცენტი კვლავ რუსეთის მიერ არის ოკუპირებული, რაც გვახსენებს თუ რა არის კონფლიქტის ფასი და რამდენად მყიფეა უსაფრთხოება.

ჩვენი მოქალაქეების ყოველდღიური ცხოვრება და მომავალი ამ რეალობით არის განსაზღვრული“, - განაცხადა მინისტრმა.