სასურსათო პროდუქციის, მედიკამენტებისა და საწვავის ფასწარმოქმნის სტრუქტურის შემსწავლელმა პარლამენტის დროებითმა კომისიამ პირველი სხდომა გამართა

სასურსათო პროდუქციის, მედიკამენტებისა და საწვავის ფასწარმოქმნის სტრუქტურის შემსწავლელი პარლამენტის დროებითი კომისიის სხდომაზე პირველადი მოხმარების პროდუქციის - ხორცპროდუქტების, რძის პროდუქტების და კვერცხის ადგილობრივი მწარმოებელი კომპანიების წარმომადგენლებს მოუსმინეს.

კომპანიების წარმომადგენლებმა წარმოების პროცესის და შემდგომ მზა პროდუქციის სასურსათო ქსელებში განთავსების საკითხებზე ისაუბრეს და კომისიის წევრებს ის პრობლემები და გამოწვევები გააცნეს, რაც აღნიშნულ პროცესს უკავშირდება.

კვერცხის წარმოებასთან დაკავშირებულ საკითხებზე შპს „პოულტრი ჯორჯიას“ და „დილის პროდუქტების“ წარმომადგენლებმა ისაუბრეს. აღინიშნა, რომ მწარმოებლებისთვის ერთ-ერთ მნიშვნელოვან გამოწვევას დამატებითი ღირებულების გადასახადი წარმოადგენს. მათივე თქმით, პროდუქციის ფასების მატებას ე.წ. ქეშ-ბექი იწვევს, რომელიც დაახლოებით 22-25%-ს შეადგენს.

საოპერაციო ნაწილის ხარჯებზე, იგივე „ქეშ-ბექის“ საკითხზე ისაუბრა ხორცპროდუქტების მწარმოებელი კომპანიის შპს „ლიდერფუდის“ დირექტორმა ირაკლი დუმბაძემ. მისი თქმით, კომპანია ქსელურ მარკეტებს გაყიდული პროდუქციის 35%-მდე თანხას უკან უბრუნებს და აღნიშნული ხარჯი ყოველწლიურად იზრდება. პრობლემებზე და გამოწვევებზე საუბრისას ირაკლი დუმბაძემ მუშა-ხელის დეფიციტსა და ვადაგადაცილებული პროდუქციის უტილიზაციასთან დაკავშირებულ საკითხებზეც გაამახვილა ყურადღება.

კომპანია „ჩირინას“ დირექტორის, რევაზ ვაშაკიძის თქმით, ადგილობრივი წარმოების განვითარებისთვის მნიშვნელოვანია, რომ იმპორტირებული პროდუქციის კვოტირება მოხდეს, რაც ქართულ ბაზარს ჭარბი იმპორტირებული პროდუქციის შემოტანისგან დაიცავს.

კომისიის სხდომაზე, რძის პროდუქციის მწარმოებელი კომპანიების: შპს -„სანტე ჯი-ემ-თი პროდუქტები“, „ყვარლის ბაგა“ და „ვიმ-ბილ-დან საქართველოს“ წარმომადგენლებმა მათ სფეროში არსებული საკითხები მიმოიხილეს. აღინიშნა, რომ რძის პროდუქტების მწარმოებლებისთვის მნიშვნელოვან გამოწვევას რძის ფასი წარმოადგენს, რაც რქოსანი პირუტყვის საკვებ იმპორტირებულ ნედლეულს უკავშირდება. მწარმოებელთა ინფორმაციით, ადგილობრივი საკვები ნედლეულის წარმოების განვითარების შემთხვევაში, რძის წარმოების თვითღირებულება მნიშვნელოვნად შეიცვლება და სექტორი კიდევ უფრო გაჯანსაღდება.

დროებითი კომისიის სხდომა კითხვა-პასუხის ფორმატში წარიმართა, სადაც კომისიის წევრებმა ადგილობრივი მწარმოებლებისგან დამატებითი ინფორმაცია მოისმინეს.

„კომისიის მიზანია შეისწავლოს თუ რა პრობლემები აქვს სექტორს და მნიშვნელოვანია, რომ ბიზნესის წარმომადგენლები საკითხის მიმართ დადებითად და კონსტრუქციულად არიან განწყობილი. ვთანხმდებით, რომ პროდუქციაში ფასნამატი მაღალია, რომელიც სტრუქტურულ პრობლემებზე მიუთითებს, რაც სისტემურ მიდგომას საჭიროებს. გვსურს ისეთი ცვლილებები მივიღოთ, რომ სექტორი სისტემურად გაჯანსაღდეს, რაც პროდუქციაზე ფასების დაწევას განაპირობებს.

ადგილობრივ მწარმოებლებთან შეხვედრაზე ხუთი ძირითადი პრობლემა გამოიკვეთა, რომელთა სწორად იდენტიფიცირება უაღრესად მნიშვნელოვანია, რადგან თუ გვეცოდინება პრობლემის არსი შემდგომ სწორი ანალიზით შევძლებთ შესაბამისი მექანიზმების ჩართვას. ეს კი სექტორის გაჯანსაღებამდე და კმაყოფილ მომხმარებლამდე მიგვიყვანს“, - განაცხადა კომისიის თავმჯდომარემ შოთა ბერეკაშვილმა.

მისივე თქმით, შეხვედრის ფარგლებში მოსმენილი ინფორმაციებიდან შემდეგი გამოწვევები გამოიკვეთა:

• პირველი - მწარმოებლები მნიშვნელოვანწილად დამოკიდებული არიან იმპორტირებულ ნედლეულზე, რაც თავის მხრივ, იმპორტის ინფლაციურ წნეხს ქმნის;
• მეორე - საოპერაციო ხარჯების ნაწილში მნიშვნელოვანი წილი უკავია გაყიდვებისა და მარკეტინგის ხარჯებს. ეს მოიცავს „ქეშ ბექს“, ქსელში შესვლის საფასურს, თაროს გადასახადს და სხვა, რაც პროდუქტის საბოლოო ფასს მნიშვნელოვნად ზრდის;
• მესამე - მწარმოებელს, დისტრიბუტორსა და ქსელურ მარკეტებს შორის შეინიშნება ასიმეტრიული ურთიერთობები, რაც ზედა რგოლს უფრო მეტ შესაძლებლობას აძლევს განსაზღვროს კომერციული პირობები;
• მეოთხე - სამუშაო კაპიტალის მოცულობა, კაპიტალის ღირებულება და გადახდის დაგვიანების შემთხვევები პირდაპირ აისახება თვითღირებულებაზე. გადახდების გაჭიანურება ზრდის ფინანსურ ხარჯებს და საბოლოოდ ქმნის დამატებით ზეწოლას პროდუქციის ფასზე;
• მეხუთე - მარაგების არაეფექტიანი მართვა და ნაშთების დაგროვება, რაც ფინანსურ ტვირთს ზრდის.

სხდომის დასასრულს, შოთა ბერეკაშვილმა პირველადი მოხმარების საგნებსა და საკვებ პროდუქტებზე ფასწარმოქმნის საკითხის შესწავლის მიზნით საერთაშორისო კომპანიის მოწვევის ინიციატივაზე ისაუბრა, რომლის შერჩევაც ტენდერის წესით მოხდება.

„ინიციატივა გვაქვს, რომ მივმართოთ საქართველოს პარლამენტის თავმჯდომარეს, რათა პარლამენტმა, კომისიის მუშაობის პარალელურად, საერთაშორისო კომპანია მოიწვიოს, რომელსაც პირველადი მოხმარების საგნების და საკვები პროდუქტების სექტორის შესწავლის კარგი გამოცდილება აქვს. კომპანია, რომელიც შეისწავლის ჩვენი სექტორის სტრუქტურას, ბიზნეს პროცესებს, არსებულ პრობლემებს და რეკომენდაციებს დაწერს. ვფიქრობ, ეს კარგი ნაბიჯი იქნება, რადგან კომისიის მუშაობის პარალელურად, გვექნება განსხვავებული თვალით დანახული, გარედან შეფასებული დოკუმენტი, რაც მნიშვნელოვნად დაეხმარება დროებითი კომისიის მუშაობას“, - აღნიშნა შოთა ბერეკაშვილმა.

კომისიის თავმჯდომარის ინიციატივას კომისიის წევრებმა ერთხმად დაუჭირეს მხარი.