შალვა პაპუაშვილი: ასე იწყებოდა ყველა ომი და ასე მთავრდებოდა. ერთადერთი კითხვა არის - ვინ ზიანდებოდა ამ ომისგან. როგორც წესი პატარები იჭყლიტებიან, როდესაც აქლემები ჩხუბობენ და ასე გავიჭყლიტებოდით. ჩვენი როლი განსაზღვრული იყო თავიდანვე

ოპორტუნიზმი - ეს არის ის, რაც დღევანდელ ევროკავშირის ზოგიერთ ლიდერს თუ პოლიტიკურ ჯგუფს გამოარჩევს. ფარისევლობა - მეორე, რაც გახსენდება, როდესაც უყურებ ამ პოლიტიკურ ლანდშაფტს დღეს ევროკავშირში, - ასე გამოეხმაურა გადაცემაში „იმედი LIVE“ საქართველოს პარლამენტის თავმჯდომარე შალვა პაპუაშვილი, ევროკავშირის წევრი ქვეყნების ზოგიერთი ლიდერის განცხადებას, რომელიც რუსეთთან ურთირთობების დალაგებას ეხებოდა.

მისი თქმით, განცხადებები, რომელიც კეთდება ღიმილის მომგვრელია და ეს ადამიანები დღეს იგივეს იტყოდნენ იმ შემთხვევაშიც თუ საქართველოს ხელისუფლება, მათ მოწოდებებს აჰყვებოდა და შევიდოდა რუსეთთან ესკალაციაში, თუმცა სხვაობა იქნებოდა ის, რომ საქართველო იქნებოდა მიწასთან გასწორებული.

„ირონიულად ითქვა საბჭოთა კავშირის დროს, რომ „მზე ჩრდილოეთიდან ამოდისო“. დღეს არის ჯგუფი, რომელიც ჩვენი ქვეყნის დაქცევას ცდილობს შიგნიდან და ციხის შიგნიდან გატეხას. მათი კრედო ეს არის, რომ „მზე დასავლეთიდან ამოდის“. აი, ეს არის შექმნილი. ამ ადამიანებს ასე გაუმრუდეს ცნობიერება. ზოგისთვის მზე ჩრდილოეთიდან ამოდის, ზოგისთვის დასავლეთიდან ამოდის. ჩვენთვის და საზოგადოების უმრავლესობისთვის კი უბრალოდ დედამიწა ბრუნავს. ჩვენ ეს უნდა გვესმოდეს, რომ ასე ბრუნავდა ყოველთვის დედამიწა, არაფერი სინამდვილეში არ ხდება, ასე იწყებოდა ყველა ომი, ასე მთავრდებოდა ყველა ომი, ერთადერთი კითხვა არის ვინ ზიანდებოდა ამ ომისგან. და როგორც წესი პატარები იჭყლიტებიან, როდესაც აქლემები ჩხუბობენ და ასე გავიჭყლიტებოდით. ჩვენი როლი განსაზღვრული იყო თავიდანვე. ზოგმა შეიძლება ვერ გაიგო 2022 წელს, როდესაც ომი დაიწყო, რატომ იყო ჩვენი რეაქცია ასე მკვეთრი, ასე ცალსახა და ასე გაჭრილი და რატომ არ შევაპარეთ ევროპელებს ნელ-ნელა, რომ იცით რა, მთლად სანქციებს ვერ დავაწესებთ მაგრამ... თავიდანვე გაჭრილი იყო რა იყო ჩვენი როლი. ჩვენ უნდა მსხვერპლად შევწიროდით იმ ამოცანას, რომელსაც ღიად ამბობდნენ: რუსეთის იზოლაცია, ცეცხლის რკალის შექმნა რუსეთის გარშემო, რუსეთის დამარცხება, დაქუცმაცება. ოღონდ საკუთარი ხელით და მათი სისხლით და ოფლით კი არა, სხვების - უკრაინელების და ქართველების. პირდაპირ გვიბიძგებდნენ, რომ წადით ესკალაციაზე რუსეთთან, დააწესეთ სანქციები, ჩაკეტეთ ცა. და ეს დღე დადგებოდა, 2026 წელი მოვიდოდა, დედამიწა ბრუნავს, მაკრონი იტყოდა იმას, რაც თქვა, ბალტიელები იტყოდნენ იმას, რაც თქვეს. უბრალოდ ხელისუფლებაში, რომ ყოფილიყვნენ ეს „ენჯეოები“ და ოპოზიცია დღეს ვიქნებოდით ჩვენ დანგრეული ქვეყანა“, -განაცხადა შალვა პაპუაშვილმა.