ლევან მაჭავარიანი აშშ-თან ურთიერთობაზე: სასიამოვნოა ის სიგნალები, რომელიც იგივე ბატონი რუბიოს მხრიდან, ბატონი ვენსის მხრიდან მოდის. ჩვენ მზად ვართ დავსხდეთ ამერიკულ მხარესთან და დროსა და სივრცეში გავწეროთ კონკრეტული გზამკვლევი

ძალიან სასიამოვნოა ის სიგნალები, რომელიც იგივე ბატონი რუბიოს მხრიდან, ბატონი ვენსის მხრიდან მოდის. ჩვენ მზად ვართ დავსხდეთ ამერიკულ მხარესთან და დროსა და სივრცეში გავწეროთ კონკრეტული გზამკვლევი, - განაცხადა „დღის ქრონიკასთან“ საპარლამენტო ფრაქცია „ქართული ოცნების“ თავმჯდომარის პირველმა მოადგილემ, ლევან მაჭავარიანმა აშშ-თან ურთიერთობების გადატვირთვასთან დაკავშირებით.

მისი თქმით, პოზიტიური სიგნალები ვაშინგტონიდან მოდის და ახლა მთავარია რა ნაბიჯები გადაიდგმება ორ ქვეყანას შორის ურთიერთობების გადატვირთვის კუთხით.

„ძალიან სასიამოვნოა ის სიგნალები, რომელიც იგივე ბატონი რუბიოს მხრიდან, ბატონი ვენსის მხრიდან მოდის და ასევე, ის შეხვედრები, რომელიც ბატონ მამუკა მდინარაძეს ჰქონდა ვაშინგტონში. ეს ყველაფერი გვანარჩუნებინებს იმის იმედს, რომ შესაძლებელია აშშ-თან გადაიტვირთოს ჩვენი ურთიერთობები და დაიწყოს რეალური ურთიერთობა.

ხაზს გავუსვამდი, რომ პრემიერ-მინისტრის დონიდან დაწყებული, რიგითი დეპუტატით დამთავრებული ჩვენ ძალიან ხშირად ვიმეორებთ ამ კონკრეტიკას, რომ მზად ვართ დავსხდეთ ამერიკულ მხარესთან და დროსა და სივრცეში გავწეროთ კონკრეტული გზამკვლევი, სადაც დეტალურად იქნება გაწერილი, თუ რა ნაბიჯები არის გადასადგმელი ჩვენი მხრიდან, რა ნაბიჯები არის გადასადგმელი აშშ-ის მხრიდან იმისთვის, რომ ორივე ქვეყნის ინტერესები იყოს გათვალისწინებული და დაცული.

რა თქმა უნდა ოპტიმიზმი შენარჩუნებული გვაქვს სწორედ იმ სიგნალებიდან გამომდინარე, იმ შეხვედრებიდან გამომდინარე, რაზეც ზემოთ ვისაუბრე და ხაზი გავუსვი. აქედან გამომდინარე ჩვენ ამ ყველაფერს, რა თქმა უნდა, ველით და ეს ეტაპი როდესაც დადგება, ჩვენ ამ ყველაფერს საზოგადოებას მოვუყვებით.

ოპტიმისტურად ვართ განწყობილები, თუმცა ბურთი თავიდან ბოლომდე აშშ-ის მოედანზეა“, - განაცხადა ლევან მაჭავარიანმა.

ცნობისთვის, 6 თებერვალს საქართველოს პრეზიდენტი და საგარეო საქმეთა მინისტრი აშშ-ის ვიცე-პრეზიდენტ ჯეი დი ვენსსა და აშშ-ის სახელმწიფო მდივანს მარკო რუბიოს შეხვდნენ.