დებატების წარმატებული სტარტი „იმედზე“ - არ იქნება გადაჭარბებული, თუ ვიტყვით, რომ მთელმა საქართველომ უყურა „ღია ეთერს“ - ირაკლი ჩიხლაძის მონოლოგი

ტელეკომპანია „იმედის“ გენერალური დირექტორის მოადგილემ, გადაცემა „იმედის კვირის“ წამყვანმა ირაკლი ჩიხლაძემ „იმედის“ ეთერში გუშინ გასულ დებატებზე ისაუბრა, სადაც პრემიერისა და განათლების მინისტრის წინააღმდეგ სადებატოდ დარგის ექსპერტები იყვნენ მიწვეული. დებატების თემა უმაღლესი განათლების ფუნდამენტური რეფორმა იყო.

„დებატების წარმატებული სტარტი „იმედზე“ - არ იქნება გადაჭარბებული, თუ ვიტყვით, რომ მთელმა საქართველომ უყურა „ღია ეთერს“. თითქმის, ორსაათიანი გადაცემა ისე დასრულდა, რომ ხელისუფლების ოპონენტებმა არგუმენტირებული მსჯელობის ნაცვლად მაინც პოლიტიკური სპეკულაციები არჩიეს. მეტიც, ხელისუფლების პირისპირ მყოფმა ოპონენტმა თავიდანვე აღიარა, რომ სტუდიაში სადებატოდ არ იყო მოსული.

გადაცემის დაწყებიდან მალევე ვიხილეთ იაფფასიანი, უნიჭო პერფორმანსი, რაზეც მთავრობის მეთაურის პასუხი სიმონ ჯანაშიასთვის იმდენად მძიმე აღმოჩნდა, რომ ამ დრომდე სოცქსელებში მისივე აქტივის მოგერიებით და თავის მართლებით არის დაკავებული.

თემა იყო განათლების ფუნდამენტური რეფორმა - რეფორმა, რომლის გარშემოც პრეტენზიები ხშირად გვესმის, მაგრამ ეთერში პრემიერისა და განათლების მინისტრის პირისპირ - რექტორი, ლექტორი და ექსპერტები არა მხოლოდ საგნობრივ დისკუსიასაც გაექცნენ, არამედ კითხვებიც ვერ დასვეს. ასეთი შანსის ხელიდან გაშვება ჩემი სუბიექტური აზრით, მიანიშნებს მხოლოდ იმაზე, რომ მათ არ აინტერესებთ რეფორმის შინაარსი. მათ აინტერესებთ რადიკალების დღის წესრიგი, რომელმაც უნივერსიტეტების კედლებში სააკაშვილის მმართველობის პერიოდში შეაღწია და ქვეყანას დღემდე შემორჩა პოლიტიზებული საგანმანათლებლო სისტემა, რომ აღარაფერი ვთქვათ განათლების დაბალ ხარისხზე“, - განაცხადა ჩიხლაძემ.

კობახიძის მასტერკლასი და დებატისთვის მოუმზადებელი ოპონენტები - დეტალები ნახეთ ანუკი გუმბერიძის სპეციალურ რეპორტაჟში.