პასკალ ლოტასი: ყველაფერ ცუდთან ერთად, ნატო არ აპირებს უკრაინის ალიანსის რიგებში მიღებას. არც ევროკავშირი გეგმავს უკრაინის გაწევრიანებას, ისინი მხოლოდ განცხადებებს აკეთებენ, რომ უკრაინა მათი ნაწილი უნდა იყოს

შევხედოთ მოვლენათა განვითარების მიმართულებას, ყველაფერ ცუდთან ერთად, ნატო არ აპირებს უკრაინის ალიანსის რიგებში მიღებას, - განაცხადა გადაცემაში „თბილისის დროით“ კიოტოს უნივერსიტეტის კვლევების ცენტრის პროფესორმა, ნეიტრალიტეტის საკითხზე კვლევებისა და პროგრამის ხელმძღვანელმა პასკალ ლოტასმა რუსეთ-უკრაინის ომზე საუბრისას.

მისივე თქმით, არც ევროკავშირი გეგმავს უკრაინის გაწევრიანებას, ისინი მხოლოდ განცხადებებს აკეთებენ, რომ უკრაინა მათი ნაწილი უნდა იყოს.

„როგორც კი უკრაინა ამას ადასტურებს, გვესმის საუბარი, რომ იგულისხმება გაწევრიანება მომავალში, ომში გამარჯვების შემდეგ, ალბათ ერთ მშვენიერ დღეს. ისინი გაწევრიანების დაპირებას როგორც სატყუარას იყენებენ, მოუწოდებენ უკრაინას მეტი ბრძოლისკენ, მეტი ჯარისკაცის გაწირვისკენ, სანაცვლოდ კი ერთ დღეს შეიძლება წევრობა აღირსონ. ეს გულისამრევი თამაშია! საბოლოო ჯამში არ არსებობს არცერთი დებულება, რომელიც ხელს უშლის ნატოს, რომ უკრაინა დღესვე მიიღოს ალიანსის რიგებში, არაფერი უშლის ხელს ნატოს ჯარები გააგზავნოს უკრაინაში. მათ ეს შეუძლიათ, მაგრამ ამ ნაბიჯს არ დგამენ, რადგან ეს არ არის მიზანი. მიზანია რუსეთის წინააღმდეგ სუროგატი ომის წარმოება.

ნატო მეტად ფრთხილობს, რომ უკრაინის ომი მის საზღვრებში არ გადმოვიდეს. გვახსოვს ორი წლის წინ პოლონეთში ჩამოვარდნილი რაკეტები და შედეგად დაღუპული პოლონელი ფერმერები. მაშინ ზელენსკიმ მეხუთე მუხლის ამოქმედებაზე დაიწყო საუბარი და შედეგად ბაიდენის ადმინისტრაციამ და ევროპელებმა ის დატუქსეს და გააჩუმეს. საბოლოოდ ეს არა რუსული, არამედ არასწორი მიმართულებით გასროლილი უკრაინული რაკეტა აღმოჩნდა. დასავლეთისთვის ეს სუროგატი ომია და უკრაინა დასავლეთისთვის იბრძვის!

ეს ირიბად იმედისმომცემიც არის, რომ ნატოს რუსეთთან პირდაპირი ომი არ სურს. მიუხედავად ამისა შედეგია, რომ უკრაინა არის ომის ქარცეცხლში გახვეული, არადა უნდა იყოს ხიდი ევროპასა და რუსეთს შორის. ორივე მხარისგან სარგებლის მაგიერ, უკრაინა ორივესგან ზარალს იღებს. უკრაინისგან მოითხოვენ სისხლისგან დაიცალოს და ბოლო უკრაინელამდე იომოს, ევროპელები ამას პატრიოტიზმად ნათლავენ.

ბოლო ორი წელიწადია მიმდინარეობს გამოფიტვის ომი და რუსეთი ანადგურებს არამარტო უკრაინას, არამედ ნატოს სამხედრო რესურსს. რუსეთის მიერ უკრაინაში განადგურებული სამხედრო ინფრასტრუქტურა ნატოს სამხედრო ინფრასტრუქტურაა. ამ კონფლიქტის ლოგიკაც შემდეგია, ნატო აწვდის შეიარაღებას უკრაინას, რუსეთი კი მას ანადგურებს. ვლადიმერ პუტინი აცხადებს, რომ ის ამერიკელებთან საუბრისთვის ყოველთვის მზად არის, მაგრამ ეს არ ნიშნავს, რომ ომს შეწყვეტს. დიპლომატია და ომი ერთად იწარმოება, უკრაინა კი შესაწირის როლშია“, - აღნიშნა პასკალ ლოტასმა.