პასკალ ლოტასი: გასულ წელს ევროკავშირში მცხოვრები ევროკავშირისვე მოქალაქეებისთვის დაიწყეს სანქციების დაწესება - ამ ადამიანებს კანონი არ დაურღვევიათ, ასეთი კანონი არ არსებობს. ევროკავშირში სიტყვის თავისუფლება წარსულს ჩაბარდება

კიოტოს უნივერსიტეტის კვლევების ცენტრის პროფესორმა, ნეიტრალიტეტის საკითხზე კვლევებისა და პროგრამის ხელმძღვანელმა პასკალ ლოტასმა გადაცემაში „თბილისის დროით“ ევროკავშირის მიერ რუსეთისთვის დაწესებულ სანქციებზე ისაუბრა და აღნიშნა, რომ სანქციების რეჟიმი უკვე კონკრეტული პირების წინააღმდეგაც ამოქმედდა და ევროკავშირში ადამიანის უფლებების მხრივ ამ თვალსაზრისით დიდი გამოწვევაა.

გადაცემის წამყვანმა ბრიტანელმა დიპლომატმა, გლობალური კრიზისების მართვის ექსპერტმა, იან პრაუდმა სანქციების თემასთან დაკავშირებით სტუმარს ამგვარი კითხვით მიმართა: „კიდევ ერთი მოცემულობა გახლავთ, რომ დასავლეთში ბევრი ვერ ბედავს არსებული პოლიტიკის კრიტიკას, ნებისმიერი, ვინც რაციონალურად საუბრობს, შეიძლება საზოგადოებიდან განკვეთონ, ზოგ შემთხვევაში სანქციებიც დაუწესონ. ეს ლიბერალური ფაშიზმია, რას ფიქრობთ?".

პასუხად პასკალ ლოტასმა განაცხადა, რომ ევროკავშირის მიერ 2025 წლიდან გატარებული პოლიტიკა ძალიან შემაშფოთებელია.

„ევროკავშირმა დაიწყო რუსეთის წინააღმდეგ სანქციების რეჟიმის ამოქმედება, თავდაპირველად ეს რუსეთის სახელმწიფოს წინააღმდეგ იყო, რუსული კომპანიების წინააღმდეგ, 2022 წლიდან დაიწყეს სანქციების პერსონების წინააღმდეგ დაწესებაც, შემდეგ ეს რეჟიმი გაფართოვდა და დაიწყეს არა რუსეთში, არამედ ევროკავშირის საზღვრებს მიღმა მცხოვრებთა დასანქცირებაც.

გასულ წელს კი უკვე ევროკავშირში მცხოვრები ევროკავშირისვე მოქალაქეებისთვის დაიწყეს სანქციების დაწესება. გერმანიის მოქალაქეს, ჰუსეინ დოგრუს, მას თურქული სახელი და გვარი აქვს, მაგრამ მხოლოდ გერმანიის მოქალაქეა, გაუყინეს საბანკო ანგარიშები, მას საკვების ყიდვაც არ შეუძლია. ევროკავშირში ადამიანის უფლებების საკითხში ამ თვალსაზრისით დიდი გამოწვევაა, ბრიუსელში აცხადებენ, რომ ეს არ არის სადამსჯელო ღონისძიება, ის განათლებას ემსახურება, რომ ეს სადისციპლინო ზომაა, აღმკვეთი სიგნალი სხვებისთვის, რომ ამ ადამიანთა ქცევა ევროკავშირისთვის მიუღებელია.

პრობლემა კი ის გახლავთ, რომ ამ ადამიანებს კანონი არ დაურღვევიათ, ასეთი კანონი არ არსებობს, რომ ის დაერღვიათ, მათი ქცევა ევროკავშირს უბრალოდ არ მოსწონს. ახლა შვეიცარიის ორი მოქალაქეც დაამატეს იმავე სიას, ერთ-ერთი მათგანი აფრიკაში იყო და სამშობლოში ვერ ბრუნდება, მეორე კი ჟაკ ბოა, შვეიცარიის არმიისა და დაზვერვის ვეტერანი. მან უკრაინის ომთან დაკავშირებით რამდენიმე წიგნი დაწერა, ის ბელგიაში ცხოვრობს და ვინაიდან საზღვრის კვეთის უფლება ჩამორთმეული აქვს, ის ბელგიაშია დატყვევებული. ეს სამოქალაქო სიკვდილია, ჟაკ ბოს არ აქვს არც კუთვნილ ფულზე წვდომა. ეს გახლავთ აღმასრულებელი ბრძანებით დასჯა, ეს ყველა ავტოკრატიული რეჟიმისთვისაა დამახასიათებელი.

სწორედ ისინი წყვეტენ, ვინაა საზღვარგარეთ მტერი და ვინ შინ. ევროკავშირმა კი ეს პროცესი წამოიწყო, თან ეს არ გახლავთ ერთი დესპოტის გადაწყვეტილება, მაგალითად ურსულა ფონ დერ ლაიენის გადაწყვეტილება. ამ საკითხებს ევროკავშირის საბჭო განიხილავს, ეს ერთობლივი გადაწყვეტილებებია და ცალკეული პიროვნების პასუხისმგებლობა გამორიცხულია. ხდება იმ სამართლებრივი მოცემულობისთვის გვერდის ავლა, რომელიც მოქალაქეთა ინტერესებს იცავს სახელმწიფოს ძალისგან, ევროკავშირმა შემოვლითი გზა იპოვა ამ ადამიანების წინააღმდეგ და მომავალში შესაძლოა ამ მოცემულობის გამოყენება ნებისმიერი არასასურველი პირის წინააღმდეგ. ევროკავშირში სიტყვის თავისუფლება წარსულს ჩაბარდება“, - აღნიშნა პასკალ ლოტასმა.