მაკა ბოჭორიშვილი: სახელმწიფო მდივნის მხრიდან ცალსახად ითქვა, რომ არსებული მემკვიდრეობა არის რთული და სჭირდება გადახედვა. ჩვენი მოლოდინია, რომ ეს მოხდება უფრო მალე, ვიდრე გვიან

სახელმწიფო მდივნის მხრიდან ცალსახად ითქვა, რომ ის მემკვიდრეობა, რომელიც არსებობს, არის რთული და მას სჭირდება გადახედვა. ჩვენი მოლოდინია, რომ ეს მოხდება უფრო მალე, ვიდრე გვიან. ფიქრის პროცესი უკვე დაწყებულია, - განაცხადა გადაცემაში „იმედი Live” საქართველოს საგარეო საქმეთა მინისტრმა მაკა ბოჭორიშვილმა ჯეი დი ვენსთან და მარკო რუბიოსთან მილანში გამართულ კომუნიკაციაზე საუბრისას.

მინისტრს მიაჩნია, რომ კრიტიკა ეკუთვნით მათ, ვინც მონაწილეობა მიიღო იმ პროცესში, რომელმაც წინა ადმინისტრაციის პერიოდში საქართველო-ამერიკის ურთიერთობები დააზიანა.

“ამ ყველაფერში ჩართული იყვნენ და არიან დღესაც ჩვენი მოქალაქეები, პოლიტიკური წრეების წარმომადგენლები, არასამთავრობო ორგანიზაციები, ის ადამიანები, რომლებიც დღესაც კვებავენ ჯო უილსონს და სხვადასხვა ორგანიზაციას არასწორი ინფორმაციებით და ნარატივებით, რომელიც მიმართულია ერთადერთი რაღაცისკენ - კიდევ უფრო დაზიანდეს აშშ-სა და საქართველოს ურთიერთობები ან არ შეიქმნას ამ ურთიერთობებში პოზიტიური დინამიკა“, - განაცხადა ბოჭორიშვილმა.

მინისტრი აშშ-ს ვიცე-პრეზიდენტის აზერბაიჯანსა და სომხეთში გამართულ ვიზიტსაც გამოეხმაურა.

„ძალიან მარტივი საფუძველი ჰქონდა ამას, იცით რა დონეზე დგას სამშვიდობო შეთანხმება აშშ-ს პრეზიდენტის დღის წესრიგში, აზერბაიჯანი და სომხეთი გახლავთ ისე შედეგი, რომელიც ერთგვარად არის თეთრ სახლში 8 აგვისტოს ხელმოწერილი შეთანხმების ასე ვთქვათ გაგრძელება და სწორედ ამის დემონსტრირება იყო ვიცე-პრეზიდენტის ვიზიტი სამხრეთ კავკასიის ორ ქვეყანაში, რომლებმაც მრავალწლიანი კონფლიქტი დაასრულეს“, - აღნიშნა მაკა ბოჭორიშვილმა.