გურამ მაჭარაშვილი 6 წელზე მეტი წლოვანების ავტომანქანების ქვეყანაში შემოყვანის აკრძალვაზე: პრობლემასა და საზოგადოების თითქმის უმრავლესობის ინტერესებს შორის ბალანსი უნდა მოიძებნოს

პარტია „ხალხის ძალის“ აღმასრულებელმა მდივანმა, დეპუტატმა გურამ მაჭარაშვილმა მედიასთან საუბარში კომენტარი გააკეთა ხელისუფლების გადაწყვეტილებაზე ექვს წელზე მეტი წლოვანების ავტომანქანების ქვეყანაში შემოყვანის აკრძალვასთან დაკავშირებით.
მისი თქმით, აღნიშნულ საკითხთან დაკავშირებით აუცილებელია კონსულტაციების გამართვა და იმ ბალანსის მონახვა, რომელიც საკითხსა და საზოგადოების თითქმის უმრავლესობის ინტერესებს შორის არის.

მაჭარაშვილი საპარლამენტო პოლიტიკური ჯგუფის „ხალხის ძალის“ თავმჯდომარის მიერ აღნიშნულ საკითხზე გაკეთებულ განცხადებასაც გამოეხმაურა და აღნიშნა, რომ დიმიტრი ხუნდაძემ მისი განცხადებით სწორედ ის იგულისხმა, რომ ამ საკითხს ფრთხილი მიდგომა სჭირდება და საკითხზე არსებობს ჯანსაღი ოპონირების რესურსიც.

„ჩვენ ვიცით და გვესმის ყველა იმ გამოწვევის შესახებ, რაზეც ხელისუფლება ამ საკითხთან დაკავშირებით აპელირებს, მათ შორის გარემოს დაცვის კუთხით და ა.შ. თუმცა აქ საჭიროა ფრთხილი მიდგომა, რაც იგულისხმა კიდეც დიმიტრი ხუნდაძემ თავის განცხადებაში. 6 წელზე ნაკლები წლოვანების ავტომანქანები შემოვიდეს ქვეყანაში და დანარჩენი არა, საკითხის ასეთი დაყენება საზოგადოების გარკვეული ნაწილისთვის მისაღები არ არის და უკმაყოფილოა ამით. აუცილებელია მოიძებნოს გარკვეული ბალანსი. იმ მიზანს, რის გამოც მთავრობამ მიიღო ეს გადაწყვეტილება ჩვენ ვეთანხმებით, მაგრამ საკითხსა და საზოგადოების თითქმის უმრავლესობის ინტერესებს შორის ბალანსი უნდა მოიძებნოს.

პირობითად ვამბობ, შეიძლება იყოს აკრძალვა წლოვანების მიხედვით, შემდეგ წლების მიხედვით და ა.შ. ბევრი ვარიანტი შეიძლება არსებობდეს. ეს საკონსულტაციო თემა უნდა გახდეს, რაც არის სწორედ ჯანსაღი ოპოზიციის მიზანი. „ქართულ ოცნებასთან“ ჩვენ არასდროს გვქონია პრობლემა და არც „ქართულ ოცნებას“ ჰქონია პრობლემა კონსულტაციების ვინმესთან, ეს შემიძლია თამამად გითხრათ. ჩვენ ვხედავთ, რომ ამ საკითხთან დაკავშირებით არსებობს კონსულტაციების, თუ ჯანსაღი ოპონირების რესურსი. ეს იგულისხმა კიდეც დიმიტრი ხუნდაძემ, როდესაც თქვა, რომ საჭიროა უფრო მეტი დეტალიზაცია, უფრო მეტად ჩაღრმავება ამ საკითხზე. ხელისუფლების მხრიდან ამ საკითხის დაყენების მიზანი გასაგები და მისაღებია, ნამდვილად გასაკეთებელია რამე იმიტომ რომ, ძალიან დიდი რაოდენობის მანქანაა და გარემო დაბინძურებული,“ - განაცხადა გურამ მაჭარაშვილმა.