შალვა პაპუაშვილი: ყველას თავისი ინტერესი აქვს, თქვენ ნუ იფიქრებთ, რომ ბრიუსელი ჩვენი ინტერესით იღვიძებს და იძინებს. ყველამ საკუთარ ინტერესზე უნდა იზრუნოს და საქართველოს ხელისუფლება ზრუნავს ჩვენს ინტერესზე

ყველას თავისი ინტერესი აქვს, თქვენ ნუ იფიქრებთ, რომ ბრიუსელი ჩვენი ინტერესით იღვიძებს და იძინებს. ყველამ საკუთარ ინტერესზე უნდა იზრუნოს და საქართველოს ხელისუფლება ზრუნავს ჩვენს ინტერესზე, - განაცხადა საქართველოს პარლამენტის თავმჯდომარემ შალვა პაპუაშვილმა ჟურნალისტებთან.

მისივე თქმით, იმას, რომ უცხოური ჩარევა გამოწვევაა, მხოლოდ ის ხალხი არ აღიარებს, რომლებიც თავად არიან დაფინანსებულები, რომ საკუთარ ქვეყანას უმტრონ.

„უცხოური ჩარევა რომ გამოწვევაა და დღევანდელ სამყაროში სწორედ ჩარევით, მეხუთე კოლონების შექმნა სხვა ქვეყნებში ეს არის იარაღი, რომელსაც იყენებენ გავლენების გასატარებლად, ამას ყველა აღიარებს. ერთადერთი, ვინც ამას არ აღიარებს არის ის ხალხი, ვინც საქართველოში თავად არის მეხუთე კოლონა და თავად არიან იმისთვის შექმნილები, დაფინანსებული, რომ საკუთარ ქვეყანას უმტრონ. 4 წელი გადის უკრაინის ომის დაწყებიდან და 4 წლის წინ, უცხოეთიდან დაფინანსებული NGO-ები და პარტიები, ზუსტად ამ სქემით - მეხუთე კოლონა, იდგნენ პარლამენტის წინ და ითხოვდნენ, რომ ჩავრთულიყავით ომში. გაგვეგზავნა მებრძოლები უკრაინაში, დაგვეწესებინა სანქციები, დაგვეკეტა ცა, შევსულიყავით ესკალაციაში, რომლის ბოლო აუცილებლად იქნებოდა ომი. ამას აკეთებდა უცხოეთიდან დაფინანსებული მეხუთე კოლონა. ამას ებრძვიან საკუთარ ქვეყნებში და ჩვენთან არ უნდათ იმიტომ, რომ აქ აფინანსებენ მეხუთე კოლონას იმისთვის, რომ კრიტიკულ მომენტებში ზურგში ლახვარი ჩასცხონ საკუთარ ქვეყანას, შეიყვანონ ომში, გამოუთხარონ ძირი დემოკრატიას, არჩევნების და დემოკრატიის არ აღიარების გზაზე იდგნენ და ა.შ.

ყველას თავისი ინტერესი აქვს, თქვენ ნუ იფიქრებთ, რომ ბრიუსელი ჩვენი ინტერესით იღვიძებს და იძინებს. ნუ იფიქრებთ, რომ ქალბატონ კალასს, რომელიც ესტონეთში პრემიერ-მინისტრობის დროს საქართველოს მიმართ მტრულ პოლიტიკას აწარმოებდა, რაიმე შეცვლილი აქვს თავის წარმოდგენებში. ყველამ საკუთარ ინტერესზე უნდა იზრუნოს და საქართველოს ხელისუფლება ზრუნავს ჩვენს ინტერესზე“,- განაცხადა პაპუაშვილმა.