ლევან მაჭავარიანი „იმედისა“ და „პოსტივის“ სანქცირებაზე: ლუსტრირება მოხდა იმის, რაზეც „ქართული ოცნება“ საუბრობდა

ლუსტრირება მოხდა იმის, რაზეც „ქართული ოცნება“ საუბრობდა, - განაცხადა ფრაქცია „ქართული ოცნების“ თავმჯდომარის პირველმა მოადგილემ ლევან მაჭავარიანმა, რომელმაც დიდი ბრიტანეთის მიერ „იმედისა“ და „პოსტივის“ სანქცირების საკითხზე კომენტარი გააკეთა.

მისივე თქმით, აღნიშნული ფაქტი რადიკალური ოპოზიციისთვის გარკვეულწილად ჟანგბადს წარმოადგენს.

„ამ ყველაფრით ლუსტრირება მოხდა იმის, რაზეც „ქართული ოცნება“ საუბრობდა. ისიც ნიშანდობლივია, რომ ბრიტანეთის ელჩი, ევროკავშირის ელჩი, გერმანიის ელჩი, თუნდაც ბოლო ღონისძიებაზე, ეძახიან მხოლოდ „ტვ პირველს“ და „ფორმულას“, რითაც კიდევ ერთხელ ადასტურებენ, რომ ჩვეულებრივად რადიკალური პარტიის აქტივისტები არიან“, - განაცხადა მაჭავარიანმა.

როგორც ცნობილია, დიდი ბრიტანეთის მთავრობამ ქართული ტელეკომპანიების, „იმედისა“ და „პოსტივის“ წინააღმდეგ სანქციები შემოიღო. შესაბამისი ინფორმაცია ბრიტანეთის მთავრობის ვებ-გვერდზეა გამოქვეყნებული.

თავისუფალ მედიაზე დიდი ბრიტანეთის თავდასხმის გამო საქართველოში დიდი ბრიტანეთის ელჩი საგარეო საქმეთა სამინისტროში იყო დაბარებული. მან შეხვედრა კომენტარის გარეშე დატოვა.

საგარეო საქმეთა მინისტრ მაკა ბოჭორიშვილის განცხადებით, 40 წუთის განმავლობაში მას არ მოუსმენია არც ერთი არგუმენტი, რომელიც გაამართლებდა იმ გადაწყვეტილებას, რომელიც მიიღო ლონდონმა.