დავით ჩიხელიძე: გადაწყდა დასჯის ოპერაცია და განახორციელეს გლობალური ძალების დავალება, რადგან რეალურად საქართველოში „იმედი“ არის ყველაზე რეიტინგული ტელეკომპანია, რომელსაც ჰყავს საკმაოდ დიდი აუდიტორია

ეს არის დასჯა, რომელიც არ ეფუძნება არავითარ ფაქტობრივ გარემოებას - ეს არის მოცემულობა, - განაცხადა გადაცემაში „დღის ქრონიკა“ ექსპერტმა, დავით ჩიხელიძემ, რომელმაც ტელეკომპანია „იმედისა“ და „პოს ტვ“-ის სანქცირებასთან ბრიტანეთის ხელისუფლების მიერ მიღებული გადაწყვეტილება შეაფასა, რომელიც ითვალისწინებდა.

მისივე თქმით, აღნიშნული ტელევიზიების დასანქცირება მოხდა არა რაიმე რეალურ ფაქტებზე დაყრდნობით, არამედ აღქმებით.

„ჩემთვის, დოკუმენტში იყო საინტერესო ნიუანსი - ერთი ის არის, რომ თითქოს და, რაღაც დესტაბილიზაციას იწვევდა ეს ორი არხი უკრაინაში და ეს გამორიცხულია. არავითარი დეზინფორმაცია არ გავრცელებულა, რასაც შესაძლოა, გავლენა მოეხდინა უკრაინაში. ასევე, არის ქართული მაუწყებლობა და აუდიტორია იქ არ ჰყავს. მეორე ის, რომ თითქოს, ეს ტელევიზიები ავრცელებდნენ სიცრუეს - ომს იგებს რუსეთი.

მინდა ვთქვა, რომ „ტელეგრაფმა“ რამდენიმე კვირის უკან დაწერა, რომ ომს იგებს რუსეთი და მოლაპარაკების დროს პუტინი უკარნახებს პირობებს უკრაინას. თუ მათ ლოგიკას გავყვებით, იგივე „ტელეგრაფი“ უნდა იყოს დასანქცირებული. აქედან ჩანს, რომ დასანქცირება მოხდა არა რაიმე რეალურ ფაქტებზე დაყრდნობით, არამედ აღქმებით, როგორც მათ სჩვევიათ, ანუ შინაარსში არ შედიან. გარკვეულ რაღაც ბრიუსელის კაბინეტებში და ასე შემდეგ, გადაწყდა დასჯის ოპერაცია და მათ განახორციელეს გლობალური ძალების დავალება, რადგან რეალურად საქართველოში „იმედი“ არის ყველაზე რეიტინგული ტელეკომპანია, რომელსაც ჰყავს საკმაოდ დიდი აუდიტორია და ის ხელს უშლის და მრავალ საკითხში ამხელს დასავლეთს, რომელიც არის ქვეყნის წინააღმდეგ მიმართული“, - აღნიშნა ჩიხელიძემ.