თბილისის გენგეგმას დედაქალაქის მერიას დღეს წარუდგენენ

თბილისის მიწათსარგებლობის გენერალურ გეგმას დედაქალაქის მერიას დღეს წარუდგენენ. ამის შესახებ გეგმაზე მომუშავე ჯგუფის, „სითი ინსტიტუტ საქართველოს“ დირექტორმა მამუკა სალუქვაძემ ipn-თან ინტერვიუში განაცხადა.

„დღეს წარედგინება მერიას ჩვენი პასუხები შენიშვნებთან დაკავშირებით. რაც გასათვალისწინებელი იყო, გათვალისწინებულია, რაც არ იყო გასათვალისწინებელი, პასუხად გვაქვს მიწერილი, რომ ეს არ არის გასათვალისწინებელი და წარმოდგენილი გვაქვს ჩვენი არგუმენტები. მაგალითად, ზონირების საკითხთან დაკავშირებით მათ აქვთ თავიანთი აზრი, ჩვენ - ჩვენი და ვაყენებთ არგუმენტებს, რის გამო უნდა იყოს ისე, როგორც გენგეგმაშია მოცემული. ყველაფერი არის ტექსტში მოცემული და კარგი იქნება, რომ წაიკითხონ არქიტექტურის სამსახურში. მივუთითებთ გვერდებს, სად რა წერია და რამ გამოიწვია ზონების ცვლილება, რომელ ზონაში რა იგულისხმება და ა.შ. 1250-გვერდიანი ტექსტია და ეტყობა, დროის მცირე მონაკვეთში არქიტექტურის სამსახურს ამის გაგება უჭირს. ვდგავართ ახლა და ვუთითებთ. ავუხსენით კიდეც გარკვეული საკითხები შეხვედრებზე“, - განაცხადა სალუქვაძემ. 

მისივე თქმით, „თბილისს მიწათსარგებლობის ძალიან კარგი გეგმა აქვს“. 

"მერიას ჩვენ წინააღმდეგ მიზანმიმართულ ქმედებაში ვერ დავადანაშაულებ, რომ ამ გენგეგმის მიღება არ სურს. გენგეგმის დამკვეთი, არქიტექტურის სამსახურის ხელმძღვანელობა ახალი მოსულია, მაგრამ ჩვენც გვაქვს ჩვენი პრინციპები, რისი ღალატიც არ გვინდა, რომ თითოეული ადამიანი, რომელიც მოვა არქიტექტურის სამსახურის უფროსად, მისი შეხედულებებისამებრ ვაკეთოთ დოკუმენტი. ქალაქის ხელმძღვანელობას ნამდვილად უნდა კარგი დოკუმენტი ჰქონდეს, ეს არაერთხელ განუცხადებია, მაგრამ არის დამკვეთი, რომელსაც გარკვეული პრობლემები აქვს. ჩემთვის ძნელია ამ პრობლემების შესახებ გითხრათ. ეს ალბათ, არქიტექტურის სამსახურმა იცის და მან უნდა თქვას“, - ამბობს სალუქვაძემ. 

25 დეკემბერს თბილისის მერიამ გენგეგმის ჯგუფი 145 600 ლარით დააჯარიმა და ხარვეზების გამოსასწორებლად 10-დღიანი ვადა მისცა. 

თბილისის მიწათსარგებლობის გენერალურ გეგმაზე მუშაობა 2015 წელს დაიწყო. კომპანია „სითი ინსტიტუტი საქართველო“ მერიის ყოფილმა ხელმძღვანელობამ კონკურსის წესით შეარჩია და ქალაქის მთავარი დოკუმენტის შესაქმნელად 2 800 000 ლარი გამოყო. 

თბილისის განვითარების გენერალური გეგმის პროექტი, რომელიც 2030 წლამდეა გაწერილი, მერიას 18 ივნისს ჩაჰბარდა. მისი შემქმნელების თქმით, ეს დოკუმენტის სამუშაო ვერსიაა და მნიშვნელოვანია პროცესში მოქალაქეთა ჩართვა. თბილისის ახალარჩეული მერმა უკვე დასრულებული გენგეგმა თავიდან შესასწავლად სპეციალურ ჯგუფს გადასცა.