ირაკლი კობახიძე დებატებზე: კარგია, რომ არსებითად კონსტრუქციულ რეჟიმში წარიმართა დისკუსია. დარწმუნებული ვარ, ასეთ რეჟიმში გაგრძელდება დებატები ტელეკომპანია „იმედში“

„კარგია, რომ არსებითად კონსტრუქციულ რეჟიმში წარიმართა ეს დისკუსია. დარწმუნებული ვარ, ასეთ რეჟიმში გაგრძელდება დებატები ტელეკომპანია „იმედში“, - განაცხადა საქართველოს პრემიერ-მინისტრმა ირაკლი კობახიძემ „იმედის“ ეთერში დებატების დასრულების შემდეგ.

პრემიერის თქმით, დებატების თემა ძალიან საინტერესო იყო.

„ასეთ პირობებში როდესაც უარს ამბობენ ადამიანები დებატებზე, იქ ჩანს, რომ მათ აქვთ შიში, რეალურად, დისკუსიის შიში. ეს, ზოგადად, სხვადასხვა თემასთან დაკავშირებით ძალიან მკაფიოდ გამოჩნდა.

თემა არის ძალიან აქტუალური საზოგადოებისთვის. აქამდე, ძირითადად მონოლოგის რეჟიმში იღებდა საზოგადოება ამ თემაზე ინფორმაციას, მიგრაციაზე, „იგლ ჰილსის“ პროექტზე და როდესაც მონოლოგის რეჟიმში გესაუბრებიან, ამ შემთხვევაში, ბუნებრივია, სრულფასოვან ინფორმაციას ვერ იღებ.

დღეს იყო დისკუსიის შესაძლებლობა და ალბათ, საზოგადოებამ ბევრად მეტი ინფორმაცია მიიღო ორივე თემასთან დაკავშირებით. კარგია, რომ არსებითად კონსტრუქციულ რეჟიმში წარიმართა ეს დისკუსია. დარწმუნებული ვარ, ასეთ რეჟიმში გაგრძელდება დებატები ტელეკომპანია „იმედში“, - აღნიშნა ირაკლი კობახიძემ.

მისივე განცხადებით, მიგრაცია და დემოგრაფია ერთ-ერთი რთული, მტკივნეული საკითხია.

„ჩვენ მაქსიმალურად ვზრუნავთ, ბუნებრივია, ამ მიმართულებით ვითარების გაუმჯობესებაზე და ამ კუთხით კონკრეტული ინიციატივებიც გავაჟღერეთ. საზოგადოებისთვის საინტერესო იყო ეს ინფორმაცია, რაც მიგრაციას და დემოგრაფიას უკავშირდება.

რაც შეეხება „იგლ ჰილსის“ ინვესტიციას, იყო ძალიან დიდი კამპანია ე.წ. არაბიზაციასთან დაკავშირებით, რაც, ალბათ ყველა უკვე დარწმუნდა, რომ ჩავარდა. როდესაც 257 ბინიდან 8 ბინა იყიდება არაბ მოქალაქეებზე, აქედან ჩანს, რომ აბსოლუტურად თითიდან გამოწოვილი იყო ეს კამპანია. ასევე ჩვენ გვქონდა ფინანსურ მხარეზე საუბრის შესაძლებლობა და საზოგადოება ალბათ, დარწმუნდა იმასთან დაკავშირებით, რომ ეს ინვესტიცია არის აბსოლუტურად რეალური და ძალიან წაადგება ჩვენი ქვეყნის ეკონომიკურ განვითარებას“, - აღნიშნა პრემიერმა.