პარლამენტის დროებითი კომისიის სხდომაზე საცალო ქსელების კომპანიების წარმომადგენლებს მოუსმინეს

სასურსათო პროდუქციის, მედიკამენტებისა და საწვავის ფასწარმოქმნის სტრუქტურის შემსწავლელი საქართველოს პარლამენტის დროებითი კომისიის სხდომაზე საცალო ქსელების ოპერატორების: „კარფურის“, „ნიკორას“, „ორი ნაბიჯის“ და „დეილი ჯგუფის“ წარმომადგენლებს მოუსმინეს, - ინფორმაციას საქართველოს პარლამენტი ავრცელებს.

უწყების ცნობით, კომისიის თავმჯდომარის შოთა ბერეკაშვილის განცხადებით, საკვები პროდუქტების და სწრაფი მოხმარების საგნების ფასწარმოქმნის ჯაჭვი მრავალსაფეხურიანია და იგი მწარმოებლებს, იმპორტიორ-დისტრიბუტორებს და საცალო ქსელის ოპერატორებს მოიცავს. მისივე თქმით, აღნიშნულ ჯაჭვში განსაკუთრებული ძალაუფლება ქსელურ მარკეტებს აქვთ, რადგან სწორედ ისინი განსაზღვრავენ ბაზარზე ფასის პოლიტიკას.

„აღნიშნული სექტორის გამჭვირვალე და ჯანსაღი მართვა უაღრესად მნიშვნელოვანია, რომ სექტორი იყოს კონკურენტუნარიანი და მომხმარებელმა საუკეთესო ფასი მიიღოს. 4 კომპანია, რომელიც დღევანდელ სხდომაზეა წარმოდგენილი, აღნიშნული სექტორის მნიშვნელოვანი მოთამაშეა, რადგან ისინი ორგანიზებული ბაზრის წილიდან დაახლოებით 71%-ს ფლობენ, რაც ჯამურად, 2024 წლის მაჩვენებლების მიხედვით, 7 მილიარდი ლარია“, - განაცხადა შოთა ბერეკაშვილმა.

სხდომაზე, საცალო ქსელის ოპერატორებმა სავაჭრო ობიექტებში პროდუქციის განთავსების, მწარმოებლებთან და დისტრიბუტორებთან ურთიერთობის, მარკეტინგული და გაყიდვების ხარჯებზე ისაუბრეს. აღინიშნა, რომ „რეტრო ბონუსი“, იგივე „ქეშბექი“ პირველადი მოხმარების პროდუქციის ფასის შემცირებისთვის გამოიყენება და ქსელური ოპერატორებისთვის მისი გაუქმება არანაირ ფინანსურ ინტერესს არ უკავშირდება.

„ქეშბექი“ ჩვენი ინიციატივა არ არის და მზად ვართ, ხვალვე გავაუქმოთ, თუ მომწოდებელი ამაზე წამოვა. თუ საჭირო იქნება ფასდაკლებებს ჩვენივე ფულით გავაკეთებთ“, - აღნიშნა „2 ნაბიჯის“ გენერალურმა დირექტორმა არჩილ მელიქაძემ.

„დეილი ჯგუფის“ სამეთვალყურეო საბჭოს თავმჯდომარის არჩილ გეგენავას თქმით, „ქეშბექის“ გაუქმება პროდუქციის ფასებზე არ აისახება და მხოლოდ ფასწარმოქმნის ჯაჭვში შემავალ სუბიექტებს შორის ურთიერთობების გამჭვირვალობას და ღიაობას შეუწყობს ხელს.

კომისიის წევრებმა და საცალო ქსელების ოპერატორებმა გაყიდული პროდუქციის საფასურის მწარმოებლებსა და დისტრიბუტორებისთვის გადაცემის საკითხებზე და მსხვილი ლოგისტიკური ცენტრების შექმნის მნიშვნელობაზეც ისაუბრეს და ამ კუთხით არაერთი მოსაზრება და იდეა გამოთქვეს.
სხდომაზე განხილული საკითხები კომისიის თავმჯდომარემ შეაჯამა.

„შეხვედრაზე არაერთი საინტერესო ინიციატივა და მოსაზრება გამოითქვა, რომელსაც კომისია შეისწავლის. ჩვენთვის მნიშვნელოვანია, რომ ფასწარმოქმნის ჯაჭვი გახდეს უფრო გამჭვირვალე და პროცესში მონაწილე სუბიექტებს შორის ურთიერთობები ჩამოყალიბდეს მკაფიო და სამართლიან ჩარჩოებში. ეს მოგვცემს შესაძლებლობას, უფრო ეფექტიანად ვაწარმოოთ აღნიშნული ურთიერთობების მონიტორინგი, რაც პირდაპირ აისახება როგორც ბაზრის გამართულ ფუნქციონირებაზე, ისე მოსახლეობის სოციალურ-ეკონომიკურ კეთილდღეობაზე“, - განაცხადა შოთა ბერეკაშვილმა.