ნანა კაკაბაძე: უწმინდესის ცხედარი არ გაციებულა და უგულავები და ძმანი მისნი სპეცოპერაციას ატარებენ, რისი მიზანიც ეკლესიაში და მის გარშემო გაერთიანებულ ერში შფოთის, განხეთილების შემოტანაა - ეშმაკი ყოფს, ხოლო უფალი აერთიანებს

უწმინდესის ცხედარი არ გაციებულა და ესენი (უგულავები და ძმანი მისნი) უკვე სპეცოპერაციას ატარებენ, რისი მიზანიც ეკლესიაში და მის გარშემო გაერთიანებულ ერში შფოთის, განხეთილებისა და დაპირისპირების შემოტანაა, - ასე ახმაურება არასამთავრობო ორგანიზაცია „მოძრაობა ნეიტრალიტეტის“ დამფუძნებელი, ნანა კაკაბაძე სოციალურ ქსელში სრულიად საქართველოს კათოლიკოს-პატრიარქის, ილია მეორის გარდაცვალების შემდეგ ოპოზიციის ნაწილის მხრიდან გაკეთებულ განცხადებებს.

„ეშმაკი ყოფს, ხოლო უფალი აერთიანებს

პატრიარქის გარდაცვალების შემდეგ ქართველი ერის სიყვარულსა და მის მიმართ დამოკიდებულებას გვაჩვენებს ის უწყვეტი და უკიდეგანო ზღვა ხალხი, რომელიც მთელი თბილისის სივრცეებზეა გადაჭიმული და ბოლო არ უჩანს.

ამან აფიქრებინა და ბევრს ათქმევინა კიდეც, პატრიარქის გარდაცვალებამ ერი გააერთიანაო.

მართლაც, აშკარაა, რომ ერის აბსოლუტური უმრავლესობა გაერთიანებულია პატრიარქის სიყვარულში, თუმცა, მეორე მხარეს, ამ საკითხის საპირისპიროთაც უცბად გაერთიანდა (ერის ღალატს მიჩვეული) ერის აბსოლუტური უმცირესობა და დღესაც, ისევე როგორც ყოველ დროს, უკვე მერამდენედ, ერთიანი ძალით შემოუტიეს ერს და ეკლესიას.

ერთის მხრივ, პატრიარქის მიმართ მთელი ერის მხრიდან გამოხატული გულწრფელი გრძნობების დანახვით გამწარებულები და გულდათუთქულები ერთ-ერთი პარტიული ტელევიზიიდან მოთქვამდნენ, პატრიარქისგან კულტი შექმნეს, რაც არაქრისტიანულია, ეს წარმართობააო.

პატრიარქის ნეშთთან, გამოთხოვებისთვის, საათობით რიგში მდგარ მოქალაქეებს წარმართები, ანუ ჩამორჩენილი, გონებაშეზღუდული მასა უწოდეს.

მეორეს მხრივ ავაზაკობაში დაუზარელმა და სისხლიანი რეჟიმის წარმომადგენელმა გიგი უგულავამ, უსამშობლოების კლასტერის პოზიცია გულწრფელად გამოხატა შემდეგი სიტყვებით:

„საპატრიარქოში შეთქმულებაა. მსოფლიო პატრიარქ ბართლომეს წირვაზე უარი უთხრეს, რათა მოსკოვის საპატრიარქოდან გამოგზავნილი ბელარუსის ეგზარქოსი მიიღონ და წირვაზე დააყენონ.

რუსეთის ეკლესიას კონსტანტინოპოლთან გაწყვეტილი აქვს ევქარისტიული კავშირი მას შემდეგ, რაც მან უკრაინის ეკლესიას ავტოკეფალია მიანიჭა.

შესაბამისად, თუ სწირავს ბართლომე, მას არ დაესწრებიან რუსები. მეტიც ჩვენი ძვირფასი იერარქების ნაწილი თურმე იმუქრება პატრიარქ ბართლომესთან არ ვწირავთო.

ანუ კირილის ვირეშმაკობას, რუსის ნაცვლად, ბელარუსი იერარქი რომ გამოგვიგზავნა, წყალობად ვიღებთ, ხოლო მსოფლიო პატრიარქს უარს ვეუბნებით „თავის ქრისტესმიერ ძმასა და სულიერ მეგობარს“ კვირის წირვაზე დაემშვიდობოს?! და ამას თურმე ვხსნით იმით, რომ ბართლომე წირვაზე დიდ ჩამონათვალში უკრაინის ეკლესიის მეთაურს უნეტარეს ეპიფანეს მოიხსენიებს?!”

საპატრიარქოში აცხადებენ, რომ მსოფლიო პატრიარქი ბართლომეოს I ლიტურგიას არ გაუძღვება და ის ილია მეორის წესის აგების მსახურებაში მიიღებს მონაწილეობას.

იბადება ლეგიტიმური კითხვა კი მაგრამ, წირვას რატომ უნდა გაძღოლოდა ბართოლომეოსი?

გასაგებია, რომ ის სხვა იერარქ სტუმრებთან ერთად მონაწილეობას მიიღებს წირვაში, მაგრამ წირვას გაუძღვება და წირვაში მონაწილეობას მიიღებს ორი სხვადასხვა მოცემულობაა.

თუმცა, პოლიტიკაში და თეოლოგიაში “განსწავლულმა” უგულავამ ეს ვითომ “აღმოჩენა” იმიტომ წაუმძღვარა შესავლის სახით თავის პოსტს, რომ შემდეგი ორღობის ჭორის საფუძვლად და დასაბუთებად გამოიყენოს. აი, ისიც:

“მეგობრებო, ეს ეგზარქოს შიო მუჯირის პირველი ღია ნაბიჯია მიიტაცოს პატრიარქის ტახტი რუსების დახმარებით.
საზოგადოებამ უნდა იცოდეს, რომ ის შარშან პატრიარქს ფაქტობრივად გაძევებული ჰყავდა.

უნდა იცოდეს, რომ პატრიარქის ანდერძი არსებობს და მას არ ანახებენ ხალხს, მოტივით რომ 15 სეიფია და სად ვეძებოთო. უწმინდესის ცხედარი არ გაციებულა და ესენი უკვე სპეცოპერაციას ატარებენ”.

ამ ჭორების მტკიცებით ფორმაში გადმოცემით უგულავამ უკვე გვაუწყა, რომ შიო მუჯირი მეუფე კი არ არის, არამედ ეგზარქოსია (ანუ რუსეთის ხელდასმულია) და რომ ის შარშან პატრიარქს ფაქტობრივად გაძევებული ჰყავდა.

თურმე ეს “ფაქტობრივად გაძევებული” მეუფე შიო პატრიარქმა მაინც მოსაყდრედ დატოვა, ხოლო ჩვენი პატრიარქი, თურმე მსოფლიო პატრიარქს ყველაზე მეტად გამოარჩევდა როგორც იერარქთა შორის, ისე პირად ურთიერთობაში, როგორც „თავის ქრისტესმიერ ძმასა და სულიერ მეგობარს“-ო.

ამავე ზღაპრიდან, თურმე რაღაც 15 სეიფიც ყოფილა, სადაც პატრიარქს ანდერძი დაუტოვებია და ეს ჩვენი “რუსეთუმე” მეუფეები მალავენ და არ აჩენენ.

მოკლედ, ამით გავიგეთ ის, რომ გიგი უგულავა, რომელიც ილია მეორესაც "რუსეთუმეს" ეძახდა (იმიტომ რომ არ აღიარებდა უკრაინის ეკლესიის ავტოკეფალიას) საქართველოს აბსოლუტური უმცირესობის სახელით საყვედურობს ჩვენს მეუფეებს, რატომ არ წარმოაჩენთ მსოფლიო იერარქებს შორის პირველ იერარქად მსოფლიო პატრიარქს, რომელმაც უკრაინის ეკლესიის ავტოკეფალია აღიარაო.

სწორედ ამაზე ითქმის, უწმინდესის ცხედარი არ გაციებულა და ესენი (უგულავები და ძმანი მისნი) უკვე სპეცოპერაციას ატარებენ, რისი მიზანიც ეკლესიაში და მის გარშემო გაერთიანებულ ერში შფოთის, განხეთილებისა და დაპირისპირების შემოტანაა.

არც გვიკვირს, რადგან ვიცით, რომ ეშმაკი ყოფს, ხოლო უფალი აერთიანებს", წერს ნანა კაკაბაძე..