ზვიად შალამბერიძე: საქართველოს ხელისუფლება გააგრძელებს იმ პოლიტიკას, რომელიც პასუხისმგებლობას, პრაგმატიზმს და ქვეყნის ეროვნული ინტერესების დაცვას ეფუძნება

თანამედროვე სამყაროში პოლიტიკა შეიცვალა. თუ ადრე სახელმწიფოებზე ზეწოლა ხშირად პირდაპირი კონფლიქტებით, სამხედრო დაპირისპირებით ან ღია პოლიტიკური კრიზისებით ხორციელდებოდა, დღეს სულ უფრო ხშირად გამოიყენება სხვა მეთოდები - უფრო დახვეწილი, გრძელვადიანი და ბევრად უფრო რთულად შესამჩნევი, - განაცხადა პლენარულ სხდომაზე საპარლამენტო უმრავლესობის წარმომადგენელმა ზვიად შალამბერიძემ.

მისი თქმით, დღეს სახელმწიფოებზე გავლენას არა ერთი დიდი დარტყმით, არამედ მრავალი მცირე შეტევის მეშვეობით ახდენენ.

„ეს შეიძლება იყოს კრიტიკული ანგარიშები, მიზანმიმართული საინფორმაციო კამპანიები, პოლიტიკური განცხადებები, რომლებიც დროდადრო ჩნდება სხვადასხვა პლატფორმაზე და თანდათან ქმნის საერთო ფონს. თითოეული ასეთი ეპიზოდი, ცალკე აღებული, შეიძლება უმნიშვნელოდაც კი გამოიყურებოდეს, მაგრამ როდესაც ისინი სისტემურად, დროულად და მეთოდურად ჩნდება, საბოლოოდ იქმნება საზოგადოებრივ განწყობებზე გავლენის მცდელობა“, - განაცხადა ზვიად შალამბერიძემ.

მისი თქმით, გლობალურ პოლიტიკაში უკვე დიდი ხანია, ჩამოყალიბებულია მეთოდები, რომლებიც საზოგადოებრივი განწყობების, საინფორმაციო სივრცისა და პოლიტიკური პროცესების სიღრმისეულ შესწავლას ეფუძნება. ზუსტად არის განსაზღვრული, რომელ თემებზე შეიძლება იყოს საზოგადოების მგრძნობელობა მაღალი, როგორ უნდა გავრცელდეს ინფორმაცია, რა დროს უნდა გაჩნდეს ახალი განცხადება ან ახალი ბრალდება, რათა თანდათან შეიქმნას ეჭვისა და დაძაბულობის ატმოსფერო.

„ამიტომ მნიშვნელოვანია, ჩვენ ყველამ, როგორც საზოგადოებამ, კარგად გავიგოთ, როგორ მუშაობს ეს მექანიზმი. ხშირად ასეთი შეტევების მიზანი არ არის ერთი კონკრეტული განცხადება ან ერთი ანგარიში. მათი მიზანია, საზოგადოებაში ნელ-ნელა დაგროვდეს ეჭვი, გაჩნდეს გაურკვევლობა და გარკვეულ ნაწილს გაუჩნდეს საკუთარი სახელმწიფოსა და ინსტიტუტების მიმართ უნდობლობის განცდა. სწორედ ამიტომ, ასეთი პროცესები განსაკუთრებით ეფექტიანი ხდება მაშინ, როდესაც საზოგადოება მათზე ემოციურად რეაგირებს და იწყებს ამავე თემების გაუთავებელ გამეორებას. ასეთ შემთხვევაში, პროვოკაციის ავტორები აღწევენ მთავარ მიზანს… ისინი თავად კი არ ავრცელებენ ნარატივს, არამედ ამას უკვე საზოგადოება აკეთებს. ამიტომ, დღეს განსაკუთრებით მნიშვნელოვანია ერთ რამეს გავუსვათ ხაზი - ძლიერი საზოგადოება ის საზოგადოებაა, რომელიც ხედავს არა მხოლოდ ცალკეულ მოვლენას, არამედ მთლიან სურათს“, - განაცხადა საპარლამენტო უმრავლესობის წარმომადგენელმა.

მისი თქმით, საქართველო წარმოადგენს ეკონომიკურ და სატრანსპორტო კავშირს სხვადასხვა რეგიონს შორის და ბუნებრივია, ასეთ გარემოში სხვადასხვა ძალა ცდილობს გავლენის მოპოვებას - ზოგჯერ პოლიტიკურ პროცესებზე, ზოგჯერ საინფორმაციო სივრცეზე, ზოგჯერ კი საზოგადოებრივ განწყობებზე.

„ძალიან მკაფიოდ უნდა ითქვას, რომ საქართველოში ძლიერი სახელმწიფო ინსტიტუტები, გამოცდილი პოლიტიკური სისტემა და საზოგადოება არსებობს, რომელმაც უკვე არაერთი რთული პერიოდი გამოიარა. ჩვენ, როგორც სახელმწიფო, ყურადღებით ვაკვირდებით ყველა პროცესს. ჩვენ ვაანალიზებთ ყველა ფაქტორს, ვხედავთ რისკებს და კარგად გვესმის, როგორ მუშაობს თანამედროვე საინფორმაციო და პოლიტიკური ზეწოლის მექანიზმები. ამიტომ, ჩვენი პასუხი ასეთ მცდელობებზე არ არის პანიკა, არ არის ემოციური რეაქცია და მუდმივი თავის მართლება. ჩვენი პასუხია სტრატეგიული სიმშვიდე, პასუხისმგებლიანი პოლიტიკა და ქვეყნის ინტერესებზე დაფუძნებული გადაწყვეტილებები“, - განაცხადა ზვიად შალამბერიძემ.

მისი თქმით, დღეს ყველაზე მნიშვნელოვანია, ყველამ ერთად შევინარჩუნოთ სიმშვიდე და სიფხიზლე, არ გავხდეთ პროვოკაციების ნაწილი, არ დავუშვათ, რომ ეჭვი და გაურკვევლობა გახდეს საზოგადოებრივი განწყობის საფუძველი.

„სწორედ ასეთ პირობებში იწყებს მუშაობას ყველაზე ძლიერი დაცვა - საზოგადოების გააზრებული პოზიცია. როდესაც საზოგადოება ხედავს მთელ სურათს, როდესაც ესმის პროცესების ლოგიკა, მაშინ ნებისმიერი საინფორმაციო შეტევა კარგავს თავის მთავარ ძალას - გავლენას საზოგადოებრივ განწყობებზე. უნდა გვესმოდეს, რომ მომავალშიც იქნება მსგავსი მცდელობები. იქნება სხვადასხვა განცხადებები, შეფასებები და საინფორმაციო კამპანიები. საქართველოს ხელისუფლება გააგრძელებს იმ პოლიტიკას, რომელიც პასუხისმგებლობას, პრაგმატიზმს და ქვეყნის ეროვნული ინტერესების დაცვას ეფუძნება. დარწმუნებული ვარ, რომ სწორედ საზოგადოების სიფხიზლე, ერთიანობა და გააზრებული პოზიცია იქნება ის ძალა, რომელიც ნებისმიერ მსგავს მცდელობას საბოლოოდ აზრს დაუკარგავს“, - განაცხადა ზვიად შალამბერიძემ.