ქართველიშვილი: ევრობიუროკრატიას, რომელმაც ოფიციალურად გაიფუჭა საქმე თბილისთან და ბაქოსთან, სურს წარმოაჩინოს თავისი ინტერესისა და პოლიტიკური ცენტრის გადატანა ერევნისკენ, მაგრამ ამას არაფერი სასიკეთო ერევნისთვის არ ექნება

ევროკავშირსა და ევრობიუროკრატიას, რომელმაც ოფიციალურად გაიფუჭა საქმე თბილისთან და ბაქოსთან, სურს წარმოაჩინოს თავისი ინტერესისა და პოლიტიკური ცენტრის გადატანა ერევნისკენ, მაგრამ ამას არაფერი სასიკეთო ერევნისთვის არ ექნება, - განაცხადა პარტია „ხალხის ძალის“ წევრმა დავით ქართველიშვილმა გადაცემაში „დღის ქრონიკა“ ერევნის სამიტზე საუბრისას.

როგორც ქართველიშვილმა აღნიშნა, ევრობიუროკრატია მსოფლიოს ატყუებს, თითქოს გეოპოლიტიკური ცენტრი ერევანში გადადის.

„საკუთარ თავს, სომხეთსაც და მთელ მსოფლიოს ატყუებენ, რომ ლოგისტიკური, ინფრასტრუქტურული, გეოგრაფიული, გეოეკონომიკური და გეოპოლიტიკური ცენტრი თითქოს ერევანში გადადის. ამ გაუგებარ ნარატივს ჰყვებიან ჩვენი ე.წ. ოპოზიციონერები, რომლებსაც უკვე სურთ, რომ ერევანი იყვნენ მას შემდეგ, რაც ნეპალმა და ვენესუელამ ვერ გაამართლა. დღეს ყველას უნდა იყოს ერევანი, იყვნენ ისე, როგორც არიან ერევანში, ვინაიდან ამ სამიტში დაინახეს რაღაც სასწაული და ეს სასწაული არ არის. ეს არის კონკურენციის ელემენტები და ნიშნები გაკოტრებული ევროკავშირის მხრიდან. მათ დაინახეს, რომ აშშ სამხრეთ კავკასიაში გააქტიურდა. ეს არ არის მხოლოდ ბაქოსა და ერევანში ვიცე-პრეზიდენტის ვიზიტები, ეს არის ის მოლოდინი, რომელსაც უკვე აანონსებენ ჩვენი ხელისუფლების წარმომადგენლები, რომ უახლოეს პერიოდში სახელმწიფო დეპარტამენტის დელეგაციას ველოდებით“, - განაცხადა დავით ქართველიშვილმა.