მაღლაფერიძე ევროსტრუქტურების წარმომადგენლებს: რამდენად მოდის ევროპულ ღირებულებებთან თანხვედრაში, როდესაც თავისთავად საეჭვო რეპუტაციის ევროპარლამენტარები, ევროპის სახელით დასანქცირების მუქარით ცდილობენ მედიის დაშინებას

ვინ არიან ის პოლონელი ევროპარლამენტარები, ვინც ქართული მედიის დასანქცირებას ითხოვენ - ამ თემაზე „საზოგადოებრივი მაუწყებლის“ სამეურვეო საბჭოს თავმჯდომარემ ვასილ მაღლაფერიძემ ბრიფინგი გამართა.

მაღლაფერიძემ მათ შორის ისაუბრა ორ ევროპარლამენტარზე, მარიუშ კამინსკსა და მალგოჟეტა გოშევსკაზე და მათ პოლიტიკურ წარსულზე.

„ჩვენ დავინტერესდით ვინ არიან ის ევროპარლამენტარები, რომლებიც დასანქცირებას ითხოვენ და როგორი რეპუტაციით სარგებლობენ. ბატონი მარიუშ კამინსკი, პოლონეთის სეიმის რამდენიმე მოწვევის წევრია, 2006-2009 წლებში იყო პოლონეთის ანტიკორუფციული ბიუროს უფროსი, 2015-2023 წლებში, პარტიის, რომლის მმართველობაში იყო ვიცე-პრეზიდენტი.

პოლონეთის გენერალური პროკურორის მოთხოვნის საფუძველზე 2025 წლის 1 აპრილს, ევროპარლამენტმა კამინსკის ხელშეუხებლობის იმუნიტეტი მოუხსნა, საქმე აღძრულია ე.წ. მიწის ნაკვეთის საქმეებთან დაკავშირებით.

2007 წელს პოლონეთის პარტია „კანონი და სამართალი“, კოალიციურად მართავდა „სამა აბორონასთან" ერთად, რომლის ლიდერი ან­ჯეი ლე­პე­რი, ვიცე-პრემიერი და სოფლის მეურნეობის მინისტრი იყო. ლეპერის გავლენის შესუსტების მიზნით მისი მოცილება გადაწყვიტეს. ლეპერმა ქრთამი არ აიღო და ეს ოპერაცია ჩაუვარდა.

დადგინდა, რომ ანტიკორუფციულმა ბიურომ თავად შექმნა დანაშაული იქ, სადაც მანამდე კორუფციის ნიშნები არ იყო. დაადგინა, რომ აგენტები იყენებდნენ მოსმენებსა და ოპერატიულ მეთოდებს სასამართლოს სათანადო ნებართვის გარეშე. მიუხედავად იმისა, რომ ოპერაცია ჩავარდა, მარიუშ კამინსკის უწყებამ ლეპერი წარმოადგინა არა როგორც ეჭვმიტანილი, არამედ უკვე მხილებული დამნაშავე. ამის შედეგად ლეპერის კარიერა განადგურდა და 2001 წელს ლეპერმა თავი მოიკლა.

ახლა მალგოჟეტა გოშევსკა, ეს მეორე პარლამენტარია, რომელიც დასანქცირებას მოითხოვს, ეს მისი თანაპარტიელია. ღიად აცხადებს, რომ მისი მიზანია რაც შეიძლება მეტი საქართველოს მოქალაქე დაასანქციროს. მალგოჟეტა გოშევსკა აქტიურად იყო ჩართული მიხეილ სააკაშვილის მხარდამჭერ კამპანიაში და მოითხოვდა პოლონეთში მის სამკურნალოდ გადაყვანას. ის იყო ერთ-ერთი ორგანიზატორი 2023 წლის ივლისში, როდესაც ევროპელ ექიმთა ჯგუფი რომ ჩამოვიდა, სინამდვილეში ესენი პოლონელი მედიკოსები იყვნენ, რომელთაც პროტოკოლის დარღვევით, ფარულად აიღეს ბიოლოგიური მასალა.

2026 წლის დასაწყისში პოლონეთის საგადასახადო ადმინისტრაციამ (KAS) დაასრულა მასშტაბური შემოწმება, რომელმაც სხვადასხვა სახელმწიფო უწყებაში 100 მილიარდ ზლოტზე მეტი ღირებულების დარღვევა გამოავლინა და მათ შორის ერთ-ერთია პოლონეთის სეიმის დეპუტატის, შემდეგ სეიმის მარშლის მოადგილის და ამჟამად ევროპარლამენტის წევრის მალგოჟეტა გოშევსკას საქმე, რომელიც პოლონეთში განიხილება არა როგორც ცალკეული შემთხვევა, არამედ როგორც „სადეპუტატო რესურსების არასათანადო გამოყენების“ ტიპური მაგალითი.

კითხვა ჩნდება, საქართველოში ევროსტრუქტურების წარმომადგენელთა მიმართაც, რამდენად მოდის ევროპულ ღირებულებებთან თანხვედრაში, როდესაც თავისთავად საეჭვო რეპუტაციის ევროპარლამენტარები ევროპის სახელით, დასანქცირების მუქარით ცდილობენ მედიის დაშინებას და საკუთარი კონტროლის ქვეშ დაქვემდებარებას“, - აღნიშნა ვასილ მაღლაფერიძემ.