ნიკოლოზ სამხარაძე: იტალიურმა მხარემ განაცხადა, რომ მხარს უჭერენ საქართველოს ევროინტეგრაციას და საქართველოსა და ევროკავშირს შორის გულწრფელი ღია დიალოგის გამართვას

იტალიურმა მხარემ განაცხადა, რომ ისინი მხარს უჭერენ საქართველოს ევროინტეგრაციას, საქართველო მათთვის ძალიან მნიშვნელოვანი პარტნიორია და შესაბამისად ისინი ყველანაირად მხარს უჭერენ და მომავალშიც დაუჭერენ საქართველოსა და ევროკავშირს შორის გულწრფელი ღია დიალოგის გამართვას, - აღნიშნა პარლამენტის საგარეო ურთიერთობათა კომიტეტის თავმჯდომარე ნიკოლოზ სამხარაძემ იტალიაში ვიზიტისას.

სამხარაძემ ვიზიტის ფარგლებში ამ დრომდე გამართული შეხვედრები ნაყოფიერად შეაფასა და აღნიშნა, რომ კიდევ რამდენიმე შეხვედრა გაიმართება იტალიის პარლამენტში.

„დასრულდა ჩვენი შეხვედრები იტალიის სენატში იტალიის საგარეო კომიტეტის თავმჯდომარესთან და ასევე სენატში მეგობრობის ჯგუფის ხელმძღვანელთან. ამ შეხვედრებზე, საუბარი გვქონდა საქართველო-იტალიის ორმხრივი ურთიერთობების შესახებ, ასევე, საპარლამენტო განზომილების, მათ შორის ვიზიტების ურთიერთგაცვლის და საპარლამენტო თანამშრომლობის უფრო მეტად გაღრმავების შესახებ. რა თქმა უნდა, ჩვენი საუბრის ძირითადი საკითხი იყო უსაფრთხოების საკითხები, ჩვენს რეგიონში მიმდინარე მოვლენები, როგორც ოკუპაციის თემა, ასევე რუსეთ-უკრაინის კონფლიქტი და ირანის ირგვლივ განვითარებული მოვლენები, თუ რა გავლენას ახდენს ეს ყველაფერი ჩვენს რეგიონზე. ასევე, საუბარი იყო საქართველოს ძალიან მნიშვნელოვან როლზე ევროპისა და მათ შორის, იტალიისთვის ენერგეტიკის უსაფრთხოების უზრუნველყოფის საკითხში. ასევე, საუბარი გვქონდა საქართველო-ევროკავშირის ურთიერთობების პრობლემატიკაზე. ჩვენ ვთხოვეთ იტალიურ მხარეს, რომ უფრო აქტიურად ჩაერთოს ბრიუსელთან, იმისთვის, რომ საქართველოსა და ევროკავშირს შორის დიალოგი აღდგეს. იტალიურმა მხარემ განაცხადა, რომ ისინი მხარს უჭერენ საქართველოს ევროინტეგრაციას. ასევე აღნიშნეს, რომ საქართველო მათთვის ძალიან მნიშვნელოვანი პარტნიორია, შესაბამისად, ისინი ყველანაირად მხარს უჭერენ და მომავალშიც დაუჭერენ საქართველოსა და ევროკავშირს შორის გულწრფელი, ღია დიალოგის გამართვას სხვა კრიტიკულ საკითხებზეც და ორმხრივი ინტერესის საკითხებზეც. ამიტომ, ვფიქრობ, რომ ეს შეხვედრები საკმაოდ ნაყოფიერი იყო. ვიზიტი გრძელდება და ჩვენ კიდევ რამდენიმე შეხვედრა გვექნება იტალიის პარლამენტში“, - აღნიშნა სამხარაძემ.