შალვა პაპუაშვილი: კოლონიალური მიდგომაა ტერმინოლოგია, რომელსაც ზოგიერთი სახელმწიფო ირჩევს, რომ ქართველ ხალხს, 3000-წლოვანი სახელმწიფოებრიობით მიგვიჩნევენ მეორეხარისხოვან ადამიანებად, რომლებიც ცხოვრობენ ჯგუფურად ტერიტორიაზე და ხინკალს, ხაჭაპურს ვუმზადებთ, როცა ჩამოდიან

ის ტერმინოლოგია, რომელსაც ზოგიერთი სახელმწიფო ირჩევს, ამჟღავნებს დამოკიდებულებას, რომ ქართველ ხალხს, 3000-წლოვანი სახელმწიფოებრიობით მიგვიჩნევენ მეორეხარისხოვან ადამიანებად, რომლებიც ცხოვრობენ ჯგუფურად ტერიტორიაზე და ხინკალს, ხაჭაპურს ვუმზადებთ, როცა ჩამოდიან. მოსწონთ ჩვენი ცეკვა-თამაში, სუფრაზე დაგვისვამენ და თავის ჭკუაზე უნდა ვიაროთ ჩვენს ქვეყანაში, - განაცხადა პარლამენტის თავმჯდომარე შალვა პაპუაშვილმა.

მისი თქმით, თუ ვინმეს უნდა ქართველ ხალხს სცეს პატივი, მაშინ მან პატივი სახელმწიფოს უნდა სცეს.

„ის ფორმულირება, რასაც ირჩევს ზოგიერთი სახელმწიფო და თვითონ ბრიუსელი, რომ ქართველ ხალხს უჭერენ მხარს, ეს არის ყველაზე დიდი დამცირება საქართველოსი, რომელსაც საბჭოთა კავშირის დროს თუ გვაყენებდნენ, ან არ ვიცი. ასეთი დამცირება ქართველი ხალხის რთულია ჩვენი ისტორიიდან გაიხსენო და პარალელები გააკეთო. საქართველო არ არის პირველყოფილი თემური წყობილება, სადაც არიან ხალხები და ტომები, რომლებსაც არ აქვთ რაიმე ფორმა, სტრუქტურა და მოწყობა. საქართველო არის სახელმწიფო, ქართველი ხალხი არ არის რაღაც აბსტრაქტული ცნება, ამ ტერიტორიაზე რაღაც ადამიანების ჯგუფი არ ცხოვრობს. ეს არის სახელმწიფო, თავისი საზღვრებით, ტერიტორიით, კონსტიტუციით, ინსტიტუციებით და თუ ვინმეს უნდა პატივისცემა, მან პატივი უნდა სცეს სახელმწიფოს. ეს საუბრები აჩვენებს, რომ ისინი სინამდვილეში მიიჩნევენ ქართველ ხალხს მეორე ხარისხოვან ერად. ეს არის სწორედ კოლონიალური აზროვნება, რომელთანაც უნდა ჩახვიდე, მოახდინო მათი კოლონიზება, ასწავლო როგორ უნდა ააწყონ სახელმწიფო, რადგან თვითონ არ იციან და არიან აბორიგენები. უნდა ასწავლო როგორ უნდა შეარჩიონ თავისი მმართველები, რადგან ეს არ იციან და არიან პირველყოფილ მდგომარეობაში. ეს ტერმინოლოგია ამჟღავნებს ამ დამოკიდებულებას, რომ ქართველ ხალხს, ჩვენი 3000-წლოვანი სახელმწიფოებრიობით მიგვიჩნევენ მეორეხარისხოვან ადამიანებად, რომლებიც ცხოვრობენ აქ ჯგუფურად ტერიტორიაზე და ხინკალს, ხაჭაპურს ვუმზადებთ, როცა ჩამოდიან. მოსწონთ ჩვენი ცეკვა-თამაში და სუფრაზე დაგვისვამენ და თავის ჭკუაზე უნდა ვიაროთ ჩვენს ქვეყანაში. ასე რომ ყოველ ჯერზე, როცა შეეცდებიან, რომ ქართველი ხალხი გამიჯნონ სახელმწიფოსგან, ყოველ ჯერზე მე პირადად ვაპირებ, რომ სათანადო პასუხი დავუბრუნო ყველას, ვინც ამას გააკეთებს", - აღნიშნა შალვა პაპუაშვილმა.