ირაკლი კირცხალია: თეა წულუკიანმა ძალიან მოკლე, ისტორიულ-ბიოგრაფიული ექსკურსი ჩაუტარა ზურაბიშვილების „გულანთებულ პატრიოტ“ ოჯახს

საპარლამენტო უმრავლესობის ლიდერმა ირაკლი კირცხალიამ ჟურნალისტის კითხვას უპასუხა, რომელიც თეა წულუკიანის მიერ სალომე ზურაბიშვილის თაობაზე გამოქვეყნებულ პოსტს ეხებოდა. კერძოდ, ჟურნაისტი დაინტერესდა, როდესაც სალომე ზურაბიშვილს „ქართული ოცნება" საპრეზიდენტო არჩევნებში მხარს უჭერდა, მაშინ იცოდნენ თუ არა ზურაბიშვილის წინაპრების ქმედებების შესახებ და თუ იცოდნენ, რატომ დაუჭირა მხარი მას ბიძინა ივანიშვილმა.

კირცხალიას თქმით, ბევრი სახელი და გვარი შეგვიძლია ვთქვათ, ვინც ადრე იყვნენ მმართველ გუნდში, თუმცა ბიძინა ივანიშვილი ყოველთვის ხვდებოდა და მიხვდება მათ ჩანაფიქრებს და გაუთვლის მათ ორი-სამი ნაბიჯით წინ - ამაზე არიან ისინი დღეს გამწარებულები.

„სალომე ზურაბიშვილთან ერთად იყო გიორგი გახარია და კიდევ ბევრი. ბევრ სახელსა და გვარს დავასახელებ, ვინც აღმასრულებელ ხელისუფლებაში, პარლამენტის დარბაზშიც, რომელშიც ძალიან ბევრი მიზეზის გამო იყვნენ იქ, სადაც იყვნენ, იმაზე არიან გამწარებულები და გაგიჟებული, რომ ბატონი ბიძინა ივანიშვილი და მისი ლიდერობით მისი გუნდიც ყოველთვის ხვდებოდა, მიხვდება და გაუთვლის ორი-სამი ნაბიჯით წინ მათ ჩანაფიქრებს. ბევრი რამ შეიძლება ვიცოდით მაშინაც ზურაბიშვილზეც და გახარიაზეც. ასე რომ როდესაც ვსაუბრობთ ქალბატონი თეა წულუკიანის პოსტზე, ძალიან მარტივად უნდა შევაფასოთ. თეა წულუკიანმა ძალიან მოკლე, ისტორიულ-ბიოგრაფიული ექსკურსი ჩაუტარა ზურაბიშვილების „გულანთებულ პატრიოტ“ ოჯახს",- აღნიშნა კირცხალიამ.

პარლამენტარმა თეა წულუკიანმა სოციალურ ქსელში პოსტი გამოაქვეყნა, სადაც სალომე ზურაბიშვილის წინაპრების ფაშისტებთან კავშირზე საუბრობს. „ცნობილი და საინტერესო ფრანგი მწერალია ემანუელ კარერი. მისი ბაბუა, გიორგი ზურაბიშვილი და პრეზიდენტყოფილი სალომე ზურაბიშვილის მამა, ლევან ზურაბიშვილი, ძმები იყვნენ. 2007 წელს, ემანუელ კარერმა გამოსცა წიგნი "რუსული რომანი" (გამომცემლობა პ.ო.ლ.), რომელშიც ოჯახის საიდუმლოს ფარდა ახადა: მისი ზემოხსენებული ბაბუა, გიორგი ზურაბიშვილი, გერმანელ ოკუპანტთან თანამშრომლობდა და საფრანგეთის გათავისუფლების შემდეგ დახვრიტეს. თმა ვერ გადახოტრეს, როგორც ეს მოღალატე ფრანგ ქალებს გაუკეთეს. ალბათ, არ ჰქონდა. ეს ხდებოდა „მაშვინ“, როცა ჩვენი ბაბუები ფრონტზე ფაშიზმის წინააღმდეგ იბრძოდნენ“.