დავით მათიკაშვილი ევროკავშირში მიღებულ რეზოლუციაზე: შესაძლოა მიზანმიმართულად, რუდუნებით ხდება პროცესის წარმართვა მათი მხრიდან ისე, რომ საზოგადოებაში რაც შეიძლება გაღრმავდეს ევროპის მიმართ სკეპტიციზმი და ჩამოიშალოს ის ნდობა, რომელიც ევროკავშირის მიმართ საქართველოში არსებობდა

შესაძლოა მიზანმიმართულად, რუდუნებით ხდება პროცესის წარმართვა მათი მხრიდან ისე, რომ საზოგადოებაში რაც შეიძლება გაღრმავდეს ევროპის მიმართ სკეპტიციზმი და ჩამოიშალოს ის ნდობა, რომელიც ევროკავშირის მიმართ საქართველოში არსებობდა, - განაცხადა საპროცედურო საკითხთა და წესების საპარლამენტო კომიტეტის თავმჯდომარე დავით მათიკაშვილი რასა იუკნევიჩიენეს მიერ მომზადებულ ანგარიშთან დაკავშირებით.

მისი თქმით, ეს ანგარიში არის პირდაპირი მცდელობა, რომ საზოგადოებაში მოხდეს იმ რადიკალიზაციის მიღწევა, რაც ევრობიუროკრატებს სჭირდებათ.

„ძალიან სამწუხაროა გაიაზრო ის მოცემულობა, რომ ევრობიუროკრატები ან საკუთარ შეცდომებზე ვერ სწავლობენ ან აქ სულაც არაა შეცდომებზე საუბარი და მიზანმიმართულად, რუდუნებით ხდება პროცესის წარმართვა მათი მხრიდან ისე, რომ საზოგადოებაში რაც შეიძლება გაღრმავდეს ევროპის მიმართ სკეპტიციზმი და ჩამოიშალოს ის ნდობა, რომელიც ევროკავშირის მიმართ საქართველოში არსებობდა. თუკი გავიაზრებთ რეზოლუციების შინაარსს და იმას, რომ ვითომ რადიკალიზმს ებრძვიან, სინამდვილეში იმ სეგრეგაციით, რაც ახალ რეზოლუციაშია მოთხოვნილი, რომ საზოგადოების ერთ ჯგუფს უვიზოდ მოგზაურობის უფლება მიეცეს ევროკავშირში და ჩვენი ქვეყნის მთელი მოსახლეობა უნდა დარჩეს ამ საშუალების გარეშე, ეს არის პირდაპირი მცდელობა, რომ საზოგადოებაში მოხდეს რადიკალიზაციის მიღწევა, რაც მათ, ევრობიუროკრატებს სჭირდებათ. ჩვენ ასეთი შთაბეჭდილება გვრჩება. ერთიანობის პირობებში მათ ბევრჯერ მოუცვდათ კბილი საქართველოსთან მიმართებით", - აღნიშნა მათიკაშვილმა.

დეპუტატის თქმით, რაც მალე დაასრულებენ ორმაგ სტანდარტს საქართველოსთან მიმართებით და თანაბარ, ნამდვილად მეგობრულ, პარტნიორულ ურთიერთობაზე გადავლენ, მით უფრო უკეთესი იქნება თავად ევროკავშირისთვის.