მაკა ბოჭორიშვილი: ვიცით რა გვჭირდება იმისთვის, რომ ჩვენი ქვეყანა იყოს უკეთ განვითარებული, უკეთ შეასრულოს ის როლი, რა როლიც აქვს დღეს „შუა დერეფნის“ განვითარების კონტექსტში

დღეს ძალიან ბევრს საუბრობენ იმაზე, რომ დამთავრდა უნიპოლარული მსოფლიოს დრო, დღეს მსოფლიო აღარ არის ერთწერტილოვანი, უნიპოლარული და საქმე გვაქვს მულტიპოლარულ მსოფლიოსთან, - განაცხადა საქართველოს ვიცე-პრემიერმა, საგარეო საქმეთა მინისტრმა მაკა ბოჭორიშვილმა ტელეკომპანია „იმედის“ გადაცემა „დღის ქრონიკის“ ეთერში.

მინისტრის განცხადებით, მულტიპოლარული სამყაროს პირობებში დიპლომატიაც მულტივექტორული უნდა იყოს, რაც საქართველოს, როგორც გეოპოლიტიკურ გზაჯვარედინზე მდებარე ქვეყნისთვის, განსაკუთრებულ მნიშვნელობას იძენს.

„თუკი მსოფლიო არის მულტიპოლარული, დიპლომატიაც უნდა იყოს მულტივექტორული, ამასაც ბუნებრივად მოითხოვს ეს გეოპოლიტიკური მოცემულობა, მით უმეტეს პატარა ქვეყნებისთვის, ისეთი ქვეყნისთვის, როგორც არის საქართველო, რომელსაც აქვს გამოკვეთილი გეოგრაფიული მდებარეობა დაკავშირებადობის კუთხით. საქართველო არის გზაჯვარედინზე და ეს გზაჯვარედინი არ არის მხოლოდ გეოგრაფიული გადაკვეთის წერტილი. ჩვენ კარგად უნდა გავაცნობიეროთ ეს რა გზაჯვარედინია. სწორედ აქ იკვეთება ძალიან ბევრი ინტერესი, ბევრი განსხვავებული პოლიტიკური მიმართულება და ეს ჩვენგან მოითხოვს განსაკუთრებულ სიფრთხილეს, შორს მხედველობას და პრაგმატულობასაც, რაც აისახება მულტივექტორულ დიპლომატიაში, რაც ნიშნავს, რომ სხვადასხვა მიმართულებით საქართველომ უნდა განავითაროს ურთიერთობები, საქართველოს სჭირდება პარტნიორობები, კავშირები სხვადასხვა გეოგრაფიულ არეალთან, სხვადასხვა გეოგრაფიულ სივრცესთან, სხვადასხვა სისტემასა და ქვეყანასთან. ეს უნდა მოხმარდეს საქართველოს მთავარი ფუნქციის, თუ მთავარი როლის, დღეს რაც აქვს „შუა დერეფნის“ კონტექსტში, სწორედ ამის განვითარებას. ამაზე მხოლოდ ჩვენ არ ვსაუბრობთ, ამაზე საუბრობს ძალიან ბევრი, მათ შორის დიდი მოთამაშეებიც საუბრობენ გეოპოლიტიკაში თუ რამდენად საჭიროა კავშირების გაღრმავება,“ - განაცხადა მაკა ბოჭორიშვილმა.

ვიცე-პრემიერის თქმით, მულტივექტორული დიპლომატია არ ნიშნავს პარტნიორების ჩანაცვლებას, არამედ გულისხმობს სხვადასხვა მიმართულებით თანამშრომლობის გაძლიერებას.

„თუმცა გარკვეული კრიტიკის ქარცეცხლში მხოლოდ საქართველო ეხვევა, როდესაც ის საგარეო პოლიტიკურ ნაბიჯებს დგამს. საქართველო ამას არც უნდა შეუშინდეს. ჩვენ ჩვენი გზა გვაქვს, ვიცით რა გვჭირდება იმისთვის, რომ ჩვენი ქვეყანა იყოს უკეთ განვითარებული, უკეთ შეასრულოს ის როლი, რა როლიც აქვს დღეს „შუა დერეფნის“ განვითარების კონტექსტში. ამას სჭირდება კავშირების გაძლიერება სხვადასხვა მიმართულებით. რაც არამც და არამც არ ნიშნავს პარტნიორების ჩანაცვლებას, ეს არ არის ის, რაც ჩვენ გვამოძრავებს და არც მულტივექტორული დიპლომატიის მიზანია ჩავანაცვლოთ პარტნიორები, პირიქით, ჩვენ ვსაუბრობთ იმაზე, როგორ უნდა განვავითაროთ უფრო მეტად პარტნიორობა იმ მიმართულებით, სადაც ამის პოტენციალი არის. გარკვეული დისბალანსი, ჩვენს საგარეო პოლიტიკაში არის, წლების განმავლობაში ჩვენი საგარეო პოლიტიკა ძირითადად ერთი მიმართულებით იყო მიმართული და სწორედ აქეთ ვითარდებოდა და ნაკლები ყურადღება ექცეოდა სხვადასხვა რეგიონებს და სხვადასხვა რეგიონის ქვეყნებთან ურთიერთობების გაძლიერებას და გაღრმავებას. დღეს ჩვენ აღმოვჩნდით ისეთ სიტუაციაში, რომ სწორედ ეს გეოგრაფიული რეგიონები ვითარდებიან, მათი მნიშვნელობაც იზრდება გეოპოლიტიკურ მოცემულობაში, მსოფლიო გეოპოლიტიკურ რუკაზე და საქართველოს სჭირდება მათთან, რა თქმა უნდა, ძლიერი კავშირები და სწორედ ამას ემსახურება ის, რომ განსაკუთრებული აქცენტი დღეს კეთდება სწორედ იმ მიმართულებით ურთიერთობების გაღრმავებაზე, სადაც გასულ ათწლეულებში რაღაც არ იყო ისეთ დონეზე, რა დონეზეც შეიძლებოდა რომ იყოს ურთიერთობები,“ - აღნიშნა მაკა ბოჭორიშვილმა.